من النادر بل محصلتش قبل كده اني اكتب بوستين في يوم
لكن اللي حصل دلوقتي
محصلش قبل كده
انا مش زعلان من حد
انا مش متضايق من حد
انا بس
معنتش باقي على حد
لما تعمل حاجات محدش طلبها منك وتعملها بحب علشان ناس كتير
وبعدين متلاقيهمش باقيين عليك
لما تضحك في وشهم وانت فعلا بتحبهم
وبعدين تلاقيهم مش باقيين عليك
لما يجروا عليك علشان محتاجينك ومتتأخرش عن اي حد فيهم بالرغم من ان اللي مطلوب منك مش سهل
وبعدين تلاقي نفسك بتجري عليهم
ده يدور وشه
وده يضحلك ويقولك اسف
وده يعمل نفسه اول مره يشوفك
وده ميبقاش عليك
لما تتلخص معاملة الناس ليك مش لشخصك
لكن لأضعف جانب في شخصيتك بس
والجانب ده انت واثق انه مش ضعيف
لكنهم بناء على اعتقاد خاطئ ان الجانب ده ضعيف
يهملوك
ومحدش يبقى عليك
انا كمان معنتش باقي على حد
والبيعة دي
اكبر بيعة في حياتي اتعملت فيا
مش حغير تعاملي معاكم
مش حبوظ صورتي اللي رسمتها لنفسي من 4 سنين وعايز افضل راسمها لنفسي متغيرش عنها للأبد
مش حضيع احلى وقت في عمري علشان انتقم
انا مش بتاع انتقام
لكني
وبكل بساطة
معنتش باقي علي حد منكم
ولا اي حد
خااااااااااااااااااااااااالص
معادتش تنفع كلمات التخفيف
ولا عادت تنفع كلمات التهوين
انتم كده حكمتوا عليا
ولكن للأسف حكمكم خطأ
اتوقع ان الايام مش حتثبتلكم خطأ حكمكم
علشان الوضع اللي حطيتوا نفسكم فيه وضع صح اوي
لكن افكركم
اني مديت ايدي ليكم
واحتاجتلكم
لكن
خلص البوست المقرف ده
11 comments:
لما تعمل حاجات محدش طلبها منك وتعملها بحب علشان ناس كتير
وبعدين متلاقيهمش باقيين عليك
لما تضحك في وشهم وانت فعلا بتحبهم
وبعدين تلاقيهم مش باقيين عليك
لما يجروا عليك علشان محتاجينك ومتتأخرش عن اي حد فيهم بالرغم من ان اللي مطلوب منك مش سهل
وبعدين تلاقي نفسك بتجري عليهم
--------------
مش عارفه اقولك ايه
بس تعممش على كل الى تعرفهم بس
حاول تنسى وتعيش بدماغك وماتغيرش نفسك
يوم ما تعمل حاجة حلوة لحد .. لازم تبقى عارف إنك بتعملها علشان ربنا .. و عائد الإحسان من ربنا مش من حد تاني ..
دي نقطة ..
النقطة التانية ..
يوم ما تقابل الإحسان بالإساءة .. إتأكد إنها كانت غلطتك في الاختيار .. مش غلطة حد تاني .. فا راجع حساباتك من أول و جديد ..
فكرتني بسؤال كان سأله واحد للشعراوي الله يرحمه .. لما قاله إن جاره بيقابل دايماً إحسانه بإساءة .. و مش عارف يعمل ايه ..
رد عليه الشعراوي .. بجملة بترن في وداااني كل لما أضايق من رد فعل حد مش متوقع .. قاله .. لو كنت بتعمل الخير للبني الآدام فاليك حق تزعل لما مايردش عليك الخير باللي أحسن منه ..
لكن لو بتعمله لربنا .. يبقى مالكش الحق في إنك تزعل .. لأن إللي عند ربنا مش بيروح أبداً ..
فكر كده .. و عييد حساباتك .. و هتلاقي كلامي صح ..
لاء اوعى تبقى زيهم
ياعزيزى ربنا خلق كل البشر دول وأنعم عليهم كل النعم ده شوف كده كام واحد عبده وكام واحد كفر بيه عشان طبيعه الجحود ونكران الجميل ده فى البشر مع الى خلقهم فما بالك مع بشر ذيك ذيه
اذا طعنت من الخلف فاعلم أنك فى المقدمه
وبعدين انت فى نعمه المفروض تحمد ربنا عليها انت المساء اليه مش المسىء المجنى عليه مش الجانى احمد ربنا واوعى تبقى زيهم عشان محدش فى يوم من الأيام يقول عليك كده
صدقنى ياأخى متعه العطاء أجمل من متعه الأخد اعمل الخير ومتستناش رد الجميل على فكره انا كنت عايزه أنزل بوست جديد بس مش هانزله الاّ لما تقره البوست الى عندى فى انتظارك وربنا يهون عليك يارب
سلام
زحل باشا و اسمحلى أديلك لقب المجروح..
دلوقتى انت طيب و مؤدب و ده مش افترا عليك ما تزعلش ده انا استنتجته من كلام لما قلت انا مش حغير معاملتى معاكو و جيت بعدها بشوية قلت انا معنديش وقت للانتقام و ده ملهوش عندى غير تفسير واحد انك محترم و ده كفايه ولو انت رسمت لنفسك صورة خليك وراها و اقتنع بيها و كل ما تقتنع بيها اكتر الناس حتقتنع بيها عشان انت واثق ف نفسك.
نصيحتى انك متبالغش ف معاملة الناس معاملة كويسه..يعنى عاملهم حلو بس من غير ما تكون اوفر عشان الناس طماعة و دايما افترض الأسوأ و حقولك على حاجة كان عندنا مدرس زى أبويا و أكتر كان له كلمه حلوة أوى يقولك ايه: افترض الأسوأ و سوء النيه ف الناس كلها إلى ان يثبت العكس..
احكم على الناس بعقلك و قلبك مع بعض و متحاولش تتمادى فى علاقه مش جايبة همها و مفيش وراها غير تضييع الوقت..
ربنا معاك و حط حدود و تخطى الموقف و لا تكره أحد..سلام
ان احرزت تقدماً ..فأبداً لا تسمح لنفسك بالتراجع
الله يسامحك
ستعلمك اﻷيام ان تدخل في العلاقات بهذه الروح منذ البداية
فيه بوست عند
sakayar.blogspot.com
ابقى اقراه
والكاظمين الغيظ ـ والعافين عن الناس ـ إن الله يحب المحسنين
بص كدة.. أمامك ثلاث مراتب من البشر كل واحد فيهم أعلى درجة من الثانية
أولاً: الكاظمين الغيظ:
ودي أول مرتبة وهي إنك تحاول بقدر الإمكان تكظم غيظك يعني متحاولش تعصب نفسك أو تفقد السيطرة على رد فعلك.. والرسول صلى الله عليه وسلم علمنا لو غضب أحدكم إن كان قائم فليجلس وإن كان جالسًا فليقم.. عشان تحاول إبعاد الشيطان عنك..
ثانيًا: والعافين عن الناس
بعد ما يحدث الموقف تعفوا يعني يتسامحوا بصدق ولا تبيت له أي سوء بسبب فعله، بجد والله التسامح ده أعظم شئ ولما ربنا بيُدخل في قلب عبد نقطة التسامح سبحان الله بيظهر على وجهه تسامح قلبه ده غير الراحة النفسية..
ثالثًا: إن الله يحب المحسنين
وكمان بعد التسامح تحسن له تعامله معاملة طيبة طالما أنك سامحته مش كل مرة تشوفه تقوله دا أنت عملت وسويت فيا لا.. يبقى كدة مفيش تسامح
كل هذا له ضوابط ومبادئ بتحكمه مش في كل مرة بفعل هذا بل في بعض الحالات بيبقى في شخص عاوز ردع بمثل إنك ترفض محادثته لمدة يسيرة لا تتجاوز الثلاث أيام أو المعاتبة بلطف ولين.. وكله بيتحدد حسب الموقف..
أخي الكريم
الدنيا مش كلها سوداء.. ولنتعلم إن أي بشر ممكن يخطأ إلا المعصوم صلى الله عليه وسلم (كلاً يؤخذ منه ويرد إلا رسول الله ـ صلى الله عليه وسلم)
ربنا يثلج صدرك وييسر لك أمرك ويذهب همك وحزنك
الأستاذ زحل
أول حاجه أنا مبدأي في الحياه أن عمري ما أزعل من حد
وإذا تلقيت طعنه في ظهري أقول لطاعني ... شكرا لأنك نبهتني بوجودك خلفي ...حتى ولو بطعني
و أنا مؤمن بأن الحاجه الحلوه اللي أن عملتها و موجهها لحد و ما حسش بيها
هتلاقي حد تاني خالص عجبته الحاجه دي و بيشكرك
بعدين أنا أول مره أحس بكم الإكتئاب ده خارج من بوست حاول تبتهج
والله الدنيا حلوه
روّق بأه هه
سلاااااااام
سلام عليك يا زحل
اول ما قريت البوست بتاعك مكنتش عارفة ارد لان كتير بنعمل حاجة جميلة لناس ..بس مش بيفهموا قد ايه انت تعبت عشان تحاول ترسم ابتسامه علي وجوههم
بس في الاخر بقول لنفسي لما يحصل موقف زي ده
ان مش كل الناس بتفكر بطريقة واحدهو كمان مش بيفكروا زيك ...و برضه انت متعرفش ظروف الاخرين ايه ؟
يعني المفروض نلتمس اعذار ليهم لان ممكن يكونوا مشغولين او عندهم ظروف تمنعهم من انهم يتفاعلوا معانا بالطريقة اللي توقعناها و توقعنا بيها رد الفعل عليهم
المشكلة ان فيه ناس كتير بيكون عندها عشم في الناس و اظن ان انت منهم
يعني بتعمل الحاجة و فرحان و حاسس انك بكده هتفرحهم ..بس ممكن ميقدروش كده
معلش متزعلش ...اكيد زي ما كان في نيتك انك تدخل الفرحة في قلب حد ...
ربنا هيفرحك اكتر مما تتصور لان
اولا لانك كنت عايز تفرح الناس
ثانيا انك لم تقابل برد الفعل اللي توقعته
متزعلش يازحل
:)
سلام
مها
ياه يا محمد ؟؟
بص يا محمد
انت بجد حد غالى عندى اوى اوى اوى وربنا يعلم
وعايزاك تثق من حاجه واحده كويس اوى انك بجد مش هتكون خسارتك اد خسارتهم
يعنى ثق ان اللى هما خسروه اكيد اكتر
انت بجد اخ يعتمد عليه جدا جدا
ومش عايزاك تكون للدرجه دى مضايق
لانك اتعلمت مش خسرت
"si tu ne gagnes pas ne perds pas facilement"
"لو مش كسبت مش تخسر بسهوله"
انا الحكمه دى بحبها اوى وبعمل بيها اوى على الاقل يعنى بحاول انى اتعلم من التجربه انى ما اكرش الى عملته وادى بيا لكدا
شكرا ليك ويا رب تكون بخير
السلام عليكم ورحمة الله وبركاته
ولا يهمك دايما الصديق الحقيقي بيبان في وقت الحاجه اليه ، واحمد ربنا انه كشفهم لك علي حقيقتهم ، بدل ماكنت تقعد مخدوع فيهم طول الوقت
ان شاء الله ربنا يعوض عنهم وتلاقي اصدقاء مخلصين قريب
تحياتي
Post a Comment