عنوان غريب مش كده
بس بجد انا في حالة
مش عارف اوصفها
بتكلم مع واحده صديقتي جدا دلوقتي ومش عارف اتكلم برضه
قريت النهارده مدونات كتير اثرت عليا وعلى مودي النهارده اوي اوي
تدوينة ستورم الاخيره راهن على نفسك
ومدونات مش عايز احطها عندي ومش ناوي اعوز اني احطها عندي
ادامي سؤال واحد بسأله لنفسي
ليييييييييييه ؟
وسؤال تاني
هو لحد امتا
لحد امتا حفضل اغلط واعرف اني غلطان وافضل اراهن اني حفضل عايش لحد مييجي الوقت اللي اتوب فيه
لحد امتا ناس بحبهم اوي اشوفهم بيغلطوا واتكلم معاهم
ويقولوا ربنا يهدينا
لحد امتا
كلنا عارفين
كل واحد فينا عارف كويس اوي اوي انه يوم مييجي يموت
حيعرف ان الله حق
حيعرف ان كل القاذورات اللي في دماغه دي حتروح
وحيقول زي فرعون لما جه يموت
امنت برب موسي وهارون
بس بعد فوات الاوان
واحده مش بتصلي
ليه مش بتصلي هي الصلاه دي فيها كلام
ويكون الرد اللي يدمرني نفسياً
ومش ببالغ انه يدمرني نفسياً
اصلي بحس ان الصلاه تقييد للحرية
الصلاه تقييد للحرية
!!!!!!!!!!!!!!!!
نفرض جدلا وحاشا لله انها تبقا كده
بس نفرض جدلا انها تقييد للحرية
قولولي مش الجلوس في محاضره مع دكتور رخم ده تقييد للحرية
مش الامتحانات دي تقييد للحرية
مش نومك في حد ذاته ده تقييد للحرية في انك تعمل حاجه في وقت جسمك مش شغال
جسمك في حد ذاته بيقيد حركتك ومتقدرش تستخدمه غير بحساب
يبقا بعد كل ده تيجي للصلاه
وتتكبر على الله
الله
الكبير الواسع الهادي
وتقول الصلاه تقييد
وتسأل طيب الحجة الوالده عندك بتصلي؟
برضه لأ
قولولي فين البركة بقا لو حتى حنبص للصلاه انها بركه وبرضه حاشا لله ونستغفر الله العظيم
سؤال تاني
مفيش حد في الكرة الارضية ميعرفش ان فيه ربنا
حتى الملحدين
حتى الكفره
لازم فيه حد خلقك
كونك
عملك انسان
ليه متبحثش عنه
ليه متدورش عليه
متتخيلوش انا مشحووووووووون اد ايه النهارده
مشحون من ترحيب الناس بأصحاب هذه الافكار الشاذة
مستغرب لحد امتا حفضل اراهن على نفسي
اراهن على توبتي ؟
اراهن على ذنبي؟
لحد امتا مش حتتحجبي ؟
لحد امتا مش حتصلي ؟
لحد امتا حتبطل وتبقا انسان كويس ادام نفسك؟
قبل متكون ادام الناس
لحد امتا حستنا تبكي عيني على ذنبي وما لاقيت من كربي
تجاربي مع الموضوع ده عديده ومتنوعة
بحمد ربنا وبشكر فضله انه حطني في التجربة
وحطني في الثواب
وكمان حطني في العقاب
اعتقد ان ناس كتير اوي اوي حتوافقني الرأي
لو انت روحت قرأت قرءان دلوقتي
ورتلته
وانت عاصي ووحش
حتحس انك مش قادر تقرأ
والله فعلا
مش قادر تقرأ
حاسس انك وحش ومش قادر تقرأ
طيب صبر نفسك
واقرأ
وتاني يوم اقرأ
وثالث يوم اقرأ
ها
ايه اللي حصل ردوا عليييييا
لقيت نفسك بدل مبتقرأ صفحة بقوا 10
ومش قادر تبطل تقرأ
ليه
دي حلاوة الطااااااااااااااااااعة حلاوة الثبات على الحق
حتى لو كان ورد يومي صغير
شوف حياتك حتتغير ازاي
شوف المشاكل حتتسهل ليك ازاي
انما نرجع
ونبقا زي الحيوانات اللي معندهاش مخ
مفيش تفكير
لا يلدغ المؤمن من جحر مرتين وادينا اتلدغنا 1000 مره
ومش بنحرم
بقول لنفسي الكلام ده قبل مأكون بقوله لأي حد علشان اللي بكتبه ده هو اللي بيحصل معايا
تعالى واعمل معصية
طبعاً مش بقولك اعمل بس لو وقعت
شوف بقا
هي مره
وحتجر مرات كتير
بص لنفسك وانت مشغل اغاني وانت قاعد على الكمبيوتر
استمرارك ده حيحطك في حالة نفسية حلوة
صح؟
ايوه بقول حلوة
علشان الشيطان حيشد حيله علشان يخليك متسلطن
بص بقا لنفسك في بيتك
حتتخانق مع البيت
لو مسكت نفسك حتقابل مشاكل في حياتك
ده في معصية بسيطة
بلاش الاغاني علشان الناس حتيجي تقولي مأنت كنت من كام يوم في حفلة
حقولك لو فتحت النت وعملت اي حاجه وحشة
سرحت على حد مثلا في شات
حتلاقي نفس الاعراض
انت دخلت الشيطان بإيدك
انا مش عارف فكرتي وصلت واللا لأ انا عمال اقول كلام كتييييييييييييييييييييييييير اوي اوي
بعد قراءاتي كتير في تدوينات كتير النهارده لناس كتير معرفهمش
ومتشرفش اني اعرفهم
لقيت الدين بقا مهمل وقالهالي واحد صاحبي
دلوقتي الناس بتتكلم عن ربنا بقولها انت تعرف ربنا ؟
سؤال مستحيل يكون موجود من وجهة نظري
انا مش بقول كلنا نبقا شيوخ علشان مستحيل نبقا
وبرضه مش بقولك اجري روح افضل قاعد 30 ساعة في الجامع
انا بقولك
كلمة واحده بس
انت بتراهن ؟
وهو انت قد الرهان ده ؟
عايز اعرف بجد عايز اعرف
هوا انا قد الرهااااااااااااااااااااااااااااان واللا حد فينا قد الرهااااااااااان
حد يفهمني يا جدعان
انا شفت حاجات مش قادر اقول ايه
مش قادر اتكلم
حالتي وحشة جدا بسبب اللي بشوفه ده
حتكلم عن كل الوحش اللي شوفته بالتفصيل بما اني اتكلمت عن الحلو
بس مش دلوقتي
في تدوينة تانيه
بس برضه عايز اعرف
هوا انا قد الرهان ده ؟
---------------------------------------------
على الهامش
اسمعوا النشيد اللي انا حاطه بقالي قرن ده
اسمعوه وانتوا مغمضين وقولولي حسيتوا بإيه
رحماااااااااااك يارب
30 comments:
آآآه يا نوفا .. بجد جاي على الوجع .. جاي على حتة بجد سبب كبير في ضيقتي و خنقتي .. كلامك و إحساسك وصلني أوي بجد .. حسيت حروفك في البوست ده ملتهبة .. انا مكتئبة لسبب قد يكون قريب أوي كمان من سبب .. و ممكن يكون هو .. مخنوقة يا نوفا من المجاهرة بفعل الحرام .. مخنوقة من التجني على ذات الله بإن مخلوق يقول ربنا خلقني كده ... لا حول ولا قوة إلا بالله .. على قد ما بيصعب عليااا دماغ في بني آدام وصلت للمرحلة دي من الانحطاط .. بتخنق من نفسي إن ممكن أواجه مخلوقات عجيبة بالمنظر ده .. طب ليه ؟؟ ده ربنا إللي خلقنا ... ده احنا مولودين على الفطرة .. زي ما بتقول ده حتى الملحد عارف إن فيه ربنا ..
ألف شكر على البوست .. و بجد إللي دخل الرهان ده .. فهو بيراهن على خسارته ..
مش حقولك احنا مش حنغير الكون وحقولك سيبهم ربنا يبدهم بس متهيالى احنا كمان علينا عامل بالدعاء باننا نقول مره واتنين وتلاته ومش نكل مش معنى كده اننا معصومين لا احنا كمان مخطئين فى حق نفسنا وحق الى خلقنا يا رب يا رب يهدينا ويهدى المسلمين اجمعين ونبقى بجد عند ظن خالقنا بينا زى ما هو دايما كريم معانا بالنسبه للنشيد فهو بجد جميل جدا يا ريت تبقى تدعيلى انى ابطل اغانى لانى بجد كده ربنا يهدينى يا رب
روزاليا
الكلام كله كان خارج مني بعد بتاع 5 او 6 ايام بشحن
عمال اشوف حاجات
وتغيير في المفاهيم بشكل مفجع
حبيت اخرج الطاقة اللي جوايا
وبدعى ربنا انها توصل بالاحساس لكل واحد يقرأ
والحمد لله انها وصلتك
مشمشه اولا عايز اقولك
ان مدونتك عجبتني جدا
ومكنتش متخيل انك حتشرفيني في مدونتي بالسرعة دي
بالنسبة لموضوع الاغاني فأنا لقيت فيه
اختلاف وكلام كتير
انا بميل اني مسمعش
ولو سمعت مسمعش العنب والبلح والحنطور اكيد يعني
حسمع فيروز حسمع حاجه نظيفة وكويسة
شكراً لردودكم ودعمكم
للأسف كلنا بنبقى عارفين الغلط و بنكابر
عارفين الحرام و بنبسط من شأنه و احيانا ننكر حرمانيته
عودة لكلام زوا: المجاهرة بالكبائر ده علامة من علامات القيامة هتستمر فى التزايد
لن نستطيع الانتصار عليها ألا بتأسيس الاسر الاسلامية الرشيدة القادرة على تنشئة ابنائهم تنشئة صالحة
أما كلام مشمشة : لإانا بختلف معاكى احنا لو عندنا اصرار بجد هنغيير كتير جدا جدا جدا
اما المطلوب منا احنا اننا نبدا نصلح فى انفسنا و نساعد بعض ع كده
و الله فى عون العبد مادام العبد فى عون اخيه
و النشيد يا نوفا انت تعرف انا بحبه قد ايه
و التدوينة جميلة جدا و فى وقتها
و جزاك الله خير عنها
و بعدين ملاحظ من كلامك و من كلام روزا ان الموقف اللى انتوا تقصدوه ده ماثر فيكم
لأ انا شايف انه ميستهلش كل ده النسبة ده ضعيفة جدا و الاسلام بخير جدا جدا جدا
ربنا يعز الاسلام و المسلمين
علي فكرة انا كنت اول واحدة تقرا البلوج دة
وكنت اول واحد اعلق بس لما جيت ابعتوا حصلت حاجة غريبة فاحبطت
عامة مش موضوعنا
بص اللي انت بتقول عليه دة بقي ظاهرة غريبة
انا لما بتكلم مع صحابي عن الصلاة بسمع حجج غريبة منهم اللي بتقولي اصل اصلاة تقيلة عليا
واللي بتقولي لسة ربنا مش هداني
يعني منالخر حجج واهية ومش ليها اي اساس من الصحة والمنطق
هما مش بيراهنوا
بس هي بترجع ان هم مش اتعلموا بجد يعني ايه اسلام ودين وصلاة وربنا
بالنسبة للمدونات
فهم كتير جدا
منهم اللي بيشيع افاحشة ومنهم اللي بيجاهربمعصيته بحجة ان ربنا عايز كدة او خلقه كدة
انا عارفة ان الموضوع يخنق ويحبط كمان
بس للاسف هو دة المجتمع اللي انت عايش فيه
وبعدين في ظاهرة غريبة اوي لقيتها
اللي بيدخل علي المدونات الي انت بتقول عليها جانب الموعظة فيها مش موجود
يعني بشوف ناس بتشتم وبتنتقد باسلوب لاذع
ومش دة اللي هيخلي الناس دي ترجع عن اللي هي بتكتبه او تعملوا
خاطبوهم باللين وبالتي هي احسن
انا بدعيلهم وبدعي لنفسي ان ربنا يهدينا ويهديهم
بس اسمحلي اقولك ان اللي يعيش ياما يشوف
ومش تزعل نفسك وقول يارب
يا خايف عايز اقولك انه مش موقف واحد اللي ممكن يعمل فينا حاجه زي دي
تأكد مش موقف واحد
لو قعدت انا وانت وفصصنا كل اللي بيحصل من وجهة نظري
حتشوف كتير يتعب
انا في التدوينة الجاية ان شاء الله ناوي اذكر كل حاجه
والاسم اللي احنا مغيرينها ليه
وده مع الوقت بيطمس الحقيقة
وبيخفيها
وده بيخلينا نتمادى في الغلط
على انه صح
اي كان بقا
اكيد فاهمني
وطبعاً نصلح نفسنا الاول وانا كاتب في التدوينة اني بقول كده لنفسي قبل مأكون بقوله لأي حد
اتنصحون الناس وتنسون انفسكم
اعتقد انك متفق معايا
كنت متنظر تعليقك يا سمراء النيل
في ضمن الناس اللي مستني تعليقهم على هذا الموضوع ده بالذات وهم كتير
وانتي منهم
ده مجتمعنا انا مش بقول لا
انما دورنا
واللي انا شايفة
ان زي مالناس دي
بتجمع بعض
يعني واحد يلم اصحابه ويروحوا بار مثلا
اهم كده لموا بعضهم واتوحدوا
ليه احنا منتوحدش
نلم بعضنا ونقف صف واحد
صف واحد نغير اسلوبنا ويكتر الصف يوم عن يوم
تخيلي 3 واقفين
شوية بقوا 4
شوية بقوا 20
مش ده حيلفت نظر الناس في الشارع ويبدأ كل واحد يسأل دول بيعملوا ايه
اهو ده اللي احنا عايزينه
معنوياً نلم بعض ونبقا صف واحد وكتله واحده
مناهضة للغلط
لما الواحد بيحس انه نفسه يغير وبياقي نفسه لوحده
بيحس بالوحده وبييأس بسرعة علشان انصار الغلط بيتجمعوا علشان يقووا احساسهم انهم صح
علشان دائماً الغلط ليه خوف في القلب ورهبة والم
نلم بعضنا
ونبدأ نتكلم عن الحاجات بمفهومها الصح
علشان نبدأ نثبت
ونزيد
ونتحرك
طبعاً مش حنعمل مظاهرات والكلام الفاضي ده
انا كل غرضي اننا نتلم معنويا
وفكريا
علشان نتحسن
واللا ايه رأيكم؟؟
بصراحة يا نوفا الموضوع دا فى الجون
فعلا حاجات كتير عارفين انها غلط و مع ذلك بنعملها و المكابرة و المجاهرة كمان سببيين لانتشار الحاجات دى
و دا بيكون دافع للتنافس فى كل حاجة غلط
بس فعلا يا نوفا موضوع فى الجون
المشكله من وجهة نظري يا زيرو ان الموضوع ده بدأ ينتشر
وحنا زي مأنت بتقول
مش عارفين نلم نفسنا علشان نبقا ايد واحده
نوحد افكارنا ونتحد مع بعض علشان نبقا في فكرنا حاجات
تزيل الوحش من نفسنا وحولينا
مش حنعرف نشيله خالص
بس ييكفينا شرف المحاولة
انا جيت اشوفك زعلان ولا لسة واجيبلك معايا وردة
ولا عايز ساندوتش
بص يا سيدي ليه مش نتوحد دي
كلمة كبيرة اوي
يعني
انا لو راجل وقاعدة معاكم
وبوقلكم يلا يا جماعه نستهدي بالله ونروح نصلي
في اللي هيقوم معايا
وفي اللي هيقولي شوية كدة وفعلا يقوم
وفيه اللي هينيمني في الدرة
ساعتها من وجهه نظرك بقي دة تعمله ايه
ولا تعمل فيه ايه
التوحيد والتوحد والايد الواحدة مهما سمنيها من مسميات
لازم يكون الدافع من جوانا الاول
انا من شوية كنت بتناقش مع واحد في مبدأ قريناه
الا وهو
ان الشخص لا يفعل اي شئ الا من خلال ايمانه وفهمه
هو قال لا في حاجات بديهية لازم نمشي وراها من غير ما نفهمها وندركها لمجرد ان ربنا قال كدة
طب مما ربنا قال اعملوا دة ومش تعملوا دة
وساب لينا الحرية كاملة في التنفيذ او الترك
وعشان اعمل شئ لازم علي الاقل اكون مدركاه وفاهماه ومؤمنة بيه بغض النظر عن تكليف ربنا ليا
يعني الصلاه ممكن اكون اتعلمتها من صغري
وبقت عادة
بس اكيد لما كبرت وادركت فوايدها والاضرار اللي هتعود من تركها اتمسكت بيها لاني مؤمنة بيها
انت فاهم انا عايزة اوصل لايه
اللي انا عايزة اوصله اني الناس دي لازم تفهم براحة خطورة اللي هي فيه
وتكون مؤمنة بالتغيير للاحسن عشان يقدروا يحددوا هدفهم في الحياه ويبقوا ناس صالحين لرفع شعار الاسلام
والكلام اللي انا بقوله برضه ينطبق علي المدونين اللي بيجهروا بالمعصية
بس لا نستطيع اغفال ان هم بشر
ولازم نتعامل معاهم لانهم بني اديمن بغض النظر عن ايه هي ميولهم او ديناتهم
انا احيانا بحترم فيهم حاجة ان هما واضحين
عكس واحد ينافقك ويقولك انا بعمل كذا وكذا وهو مبهدل الدنيا
انا مش بشفع لاصحاب المدونات الفاحشة
انا بس بقول لا يضر اني اتعامل معاهم باللين واجذبهم ناحيتي
واخاطبهم بالتي هي احسن
فاهمني يا زحل ولا المريخ دخلت عليك
قرأت البوست وجميع التعليقات
حقيقى مستمتعة بمناقشاتكم مع بعض
إنتم شباب يفرح حقيقى
يمكن أكون متفقة مع رأى بعضكم ومختلفة مع البعض الآخر
لكن سعيدة إن فيه شباب واعى وبيشغل مخه زيكم
MAMA-SAHER
اولا يا مرحب بيكي يا سمراء النيل مره تانيه في المدونة
نتكلم بورة اوضح شوية عن وجهة نظري في الموضوع ده
انا متفق معاكي تماما ان محدش بيعمل حاجه غير لو كان مقتنع بيها (او) متعود عليها
واللي بيتعود عليه بييجي الوقت اللي يعرف فيه هل هو صح واللا غلط
موضوع اني بقول نوحد فكرنا يعني ايه
يعني انا وانتي مثلا متفقين ان كذا غلط وكذا صح
يبقا انا وانتي اتفقنا واتوحدنا
ييجي بعد كده نناقش ازاي الغلط ده يتصلح
بحيث كل واجد فينا حيصلح في مكانه
الحاجه اللي وحدنا فكرنا فيها
فهمتي ايه قصدي
وبرضه انا عايز أأكد اننا لازم نعامل كل الناس كويس زي مأنتي قولتي
لو كنت فظ غليظ القلب لانفضوا من حولك
يبقا لازم نتعامل باللين اكيد
وده شئ مفيش عليه اي خلاف
تقبلي تحياتي
وانا مش زعلان دلوقتي بالعكس انا متحمس جدا
منورة
ماما سهر سعيد اوي انك نورتي المدونة
والحمد لله اننا قدرنا نسعد حضرتك بفكر كويس
ونتمنى ان الفكر ده يكون منتشر بين الناس اكثر واكثر
امييييييين
مش عارفه
اللى لاقياه هو ان ربنا يهدينا جميعا و يجعلنا كمان سبب فى هداية بعض
لو كل الناس تنشنت من هوى الدماغ يبقى خربت
لازم اللى عارف الصح يحاول يعرف اللى مش عارف
مش بالوسيله اللى نفعت معاه لا بالوسيله اللى تنفع اللى بينصحه
و فى النهايه
اللى بياكل على ضرسه بينفع نفسه
ينفع اقول حاجه سخيفة
لسبب شخصى انا حذفت اخر بوست اللى انت لسه معلق فيها
انا اسفه جدا
عارفه ان ده ممكن يضايقك
عموما انا هكتبلك ردى عليك هنا
انا كمان سعيده انك من اول المعلقين
انا بحب الصور عموما مرسومه متاخده و كمان من كتر حبى للصور
قدرتى على لقط التفاصيل او الصور الواقعيه بيزيد يوم بعد يوم
بس انا بنبهر بالصور و بخزن كل تفاصيل الاحساس لنفسى
ممكن اتناقش مع حد لو بيشوف نفس الصورة
او حابب يعرف رأيى
بس لو انا لوحدى بجد
بنبهر كان كل الذبذبات اللى فى الصورة متسلطه عليا لوحدى
________________
سورى بجد
ينفع ما تضايقش علشان انا بيتهيألى ان الاحساس ده بيخنق
يادنيا انقلبت فيها الموازين
الحق فيكى بقى باطل
والنور فيكى بقى ضلال
الدين فيكى تخلف
والصدق فيكى ابتذال
ايه اللى بيحصل حوالينا
وايه اللى ممكن يحصل تانى
انا مقدره مقدار الشحنه اللى جواك يا زحل.. كل حاجه بقت متلخبطه
والشيطان شادد حيله ونازل رقص فوق روسنا
ممكن يكون احنا علينا الحق فى كل اللى بيحصل ده
لكن مش احنا لوحدنا المسئولين
لما الموظف يعطل امورك وحالك عشان خاطر 10 جنيه رشوه..دا يبقى اسمه ايه؟
لما شرطى المرور يافقلك مخالفه وربنا يكرمك يابيه عشان تدفع المعلوم دا يبقى اسمه ايه
لما البنت المنقبه يعملولها قلق على باب الجامعه وجوا لجنة الامتحان وكأنها مجرم هربان..وبص على اللى لابسين البادى والاستريتش بيضربولهم تعظيم سلام
دا يبقى اسمه ايه؟؟
لما تبقى كل حاجه ضدك وقدامك حل من اتنين..ياتتغير يا تنفجر
يبقى ايه النظام
عليه العوض ومنه العوض
انا حره
سعيد بزيارتك الاولى لمدونتي
لأ وايه بتعليقين
:)
بالنسبة لموضوع التدوينة
فأنا معاكي ان اللي بياكل على ضرسة بينفع نفسه
لكن لو ملقاش ياكل بقا يعمل ايه ؟
عتقد ان اللي شايف انه معاه الاكل
لازم يعزم على اللي مش معاه الاكل
وبالنسبة لتدوينتك مفيش ي مشاكل مش زعلان خالص كفايه انك رديتي عليا هنا ومفيش اي مشاكل
اه يا وينكي متقوليليش على المرور يا وينكي بالله عليكي
لسه واخد علقة في المرور
310
مخالفات
مع اني مش بخلع الحزام خالص
ومش بكسر اشاره
والعربية اساسا تعبانه علشان اجيب 60 ببقا على الثالث
حسبي الله ونعم الوكيل
يمكن المفاهيم مقلوبة
لكن بإيدينا نصلحها
على الاقل منكونش زيها
صح ؟
والله عندك حق
ربنا يهدينا جميعا يااااااارب
فكرة ربنا يجازيك عليها خير
يا اخي كلامك جميل ..و عليك نفسك..و كل انسان له عقله و كل انسان مسير لما خلق له ...نسال الله السلامه في الدنيا و حسن الختامه..يقول الله سبحانه و تعالي..من عمل صالحا فلنفسه و من اساء فعليها و ما ربك بظلام للعبيد....و يقول ربنا سبحانه و ما ظلمناهم و لاكن كانوا انفسهم يظلمون...الانسان هو الذي يظلم نفسه بالذنوب و المعاصي..و الله يا اخي هي داخلي عقيده راسخه كاجبال من وجد الله فماذا خسر و من خسر الله فماذل ربح....و الكلام يطول جداااا.. و لاكن لابد ان نفر الي الله ليس لنا ملجاء منه الا اليه.....بوست رائع تحياتي لك اخي
أنا بقى يا زحل بيه مش عكمل قراااية البوست بتاعك ده !!!!
كثروا قوووووووووي يا سوبر نوفا !!! أنا مخنوق من نفسي ، مش عارف أعمل إيه ؟!!!
أنا ههرب من مدونتـك دي بصراحة !!!!
شفت جبن زي ده ف حياتـك ؟ م
انا قلت اجي امسي واجيبلك معايا شوكولاتة
اخبارك ايه
اتفائلت ولا لسة
اولا بشكر كل اللي رد عليا في المدونة بجد شكراً ليكم جدا جدا على الدعم
والشكر الاكبر على المناقشة علشان انا بعشق النقاش في الكلام المكتوب بكتير
----------------------------
اولا يا قلبي يا غريب
انا بشكرك على تعليقك
وفعلا قول الحق سبحانه وتعالى
وما ظلمناهم ولكن كانوا انفسهم يظلمون
اسأل الله العفو والعافية وان يثبتنا جميعا
على صراط مستقيم
-----------------------------
اخي ابراهيم معايا
اولا عايز اقولك اني من ساعت مشوفتك في الحفلة وانا حاسس اني اعرفك من فتره
وحسيت انك دماغك عالية ومتكلفة بصراحة
ولما دخلت مدونتك شدتني جدا
وفرحان اوي انك زرت مدونتي
وكمان علقت
وبالنسبة للهروب
فلو قلبت بعكننة ..الجري جدعنة
على رأي تيمون صاحب بومبا في كارتون ديزني
بس لو تيجي للحق
اعتقد ان الواحد في حالة الفتن الكبيره يحاول شوية ولو وجد انه ممكن يتأثر
يبقا يهرب
ومنور والله
--------------------------------
سمراء النيل
منورة
ومسي يا ستي براحتك يسعد مساكي
وهاتي الشيكولاته بقا
طعمها حلو على فكره
:D
منورة جدا جدا
----------------------------------
واخيراً اسف على التأخير علشان كنت في معشوقتي الاولى
الاسكندرية
طبعاً معشوفتي بعد بورسعيد بلدي طبعاً
وكنت هناك بقالي اهو 3 ايام
وان شاء الله قريب اوي حنزل بوست بالصور
استنوني
عمرو احمد
اسف اني مرديتش عليك في الترتيب
نورت المدونة
وربنا يهدينا يااااااااااااااااااارب
يسمع من بقك ربنا
امين
thanks, mohammed for such a post, you put a great deal of sense in that, it's really bizzare to know about such people and they REALLY are so away! away from being rational! man i cannot type anything it's just disgusting!
ahmad basha
1st thank u 4 ur comment
2nd i know what u feel now
u r one of my oldest friends and i really know how u feel that
but we can do man
we can do everything we want
we can channge
if we want
and only if we really want
thankx again 4 ur comment
الموضوع حلواوي يانوفا والمناقشه جميله جدا
بس في سؤال عايزا اسأله
هل من اافضل ان الواحد يبقي عايش في غيبوبه مش عارف اللي بيحصل وميعرفش الناس دي ومابيشفهمش غير في الافلام
ولا يبقي عارفهم بيتكلم معاهم بيناقشهم ويتنرفز ويتضايق ويتخنق ويحس ان الدنيا باظت ويكتئب ويبقي في الحاله اللي كنت فيها او مازلت فيها
هل من الاحسن انو يبقي في حاله بيعرف ناس كويسه هما دول مجتمعه وبيحاول يصلح نفسه
هل من المفيد انك تكتب كل الوحش اللي شفته او سمعته زي ماقلت انك هتعمل
مفيد اننا نعرف العدو عشان نهزمه بس السؤال احنا مطلوب مننا دا
ولو الاجابه اه حد يقولي احنا مطلوب مننا ايه ولا ايه
نعمل في نفسنا ايه
انا قصدي احنا مطلوب مننا نصلح الناس كلها
انا حسه ان الادوار دخلت في بعض وكل واحد بقا مطلوب منه يعمل كل حاجه
عشان مش لاقي حد يعمل عنه الحاجه دي وبالتالي مبيتقنش حاجه
ربنا معانا ويهدينا ويقوينا والنشيد حلو اوي
الموضوع فعلا ذو أهمية لأن الحالة العامة بتزداد سوء يوم عن يوم والبعد عن دين الله وقيم وشرع الإسلام بقت فجوة رهيبة...
ومش هقدر أقول بعق قول الله تعالى :
" أفأمن أهل القرى أن يأتيهم عذابنا بغتاً وهم يلعبون "
وياريت يسمعو نداء الحق :
" ألم يئن للذين آمنوا أن تخشع قلوبهم لذكر الله وما نزل من الحق "
" يريد الله الذين يتبعون الشوات أن تميلو ميلا عظيما "
اللهم لا تجهل مصيبتنا في ديننا
واهد المسلمين والمسلمات
تعرف يا نوفا كل اللى انت مخنوق منهم دول ضحايا... اه والله ضحايا فراغ قلوبهم وعقولهم من نور المعرفة... تعالى كده ناقش حد فيهم هتلاقيه فااااااضى من جواه من كل حاجة غير انه عايز يبقى زى القرد بيقلد وبس حاسس ان الغرب هو المتفوق عشان كده بيقلده ويا ريت فى معرفتهم لاء فى جهلهم بحق الله دى مشكلة جيل بحالة ... ربنا يعيننا احنا الاباء والامهات على افراز جيل معرفة ربه اهم عنده من معرفه المطرب او النجم الفلانى وربنا يستر علىاولادنا واولادكم مستقبلا... وربنا هو الهادى
رباب
Post a Comment