Sunday, April 29, 2007

وقد سطعت في ثوبها الجديد



في وقت من الاوقات

سطعت الفكره

وفي لحظة من اللحظات

نفذتها

لا اعرف كيف جائت اللحظة

ولا كيف ستستمر

لكنها

هنا

موجوده

بين الحين والحين اذهب اليها

احاول ان اقترب منها

احاول ان اتحدث معها

احاول ان اخرج كل طاقاتي معها

مكان مريح اوي اللي بكون موجود فيه معاها

اكيد عرفتوها


مدونتي الجديده


Wednesday, April 18, 2007

طفولة حبيسة...والافكار ايضاً ....وبعدين؟؟

السلام عليكم ورحمة الله وبركاته
اولا يا جماعة بشكر كل اللي ساهم معانا في حملة الدعم لضحايا الاتوبيس
وربنا يسكنهم فسيح جناته
ويلهم اهلهم الصبر والسلوان
--------------------------------------



ندخل في موضوعنا الجديد
امبارح قرأت عند فوكيره
عيون خفيه
بتتكلم عن طفولتها
وانها يجب ان تتوارى
وتبدأ في الاختباء
حيث لا مكان للطفوله الان
لقيت عندي موضوع في دماغي متشابه
كتير من اصدقائي قالوهالي انت قرد
واللي يقولي ارحم نفسك
واللي يقولي اهدى واللي يقولي انت دينامو
طبعاً ممكن كتير منكم يفتكر اني بقول الكلام ده فخر مثلا
منكرش اني مبسوط من الكلام ده
الا اني برضه بعمل كل اللي بعمله ده علشان مش عايزها تتسجن
ايوه
الطفولة اللي جوا الواحد مش عايزها تتسجن
ابداً
لما امشي اكل مصاصة في الكلية
واللا امشي اتنطط في الشارع
واللا العب سوليتير
واللا اتفرج على كابتن ماجد واتفاعل معاه اوي
ولما اشوف مازنجر ابقا قاعد بتفرج ولو فيه صوت اسكته
واللا واللا واللا
اعتقد اوقات كتير ان طفولتي دي بدأت تموت
لكن
كل لما ابدأ اتعلم اكثر واجد فيه متعة معينة في تعلمي في الكلية في مجال بحبه وطبعاً ده مادة او 2 بس من المواد اللي علينا
الا اني وجدت نفسي بتكلم عن العلم بتاع الاتصالات ده بحماس عجيب
لقيتني بكلم ناس من مختلف الطبقات
وبحاول اديلهم امثلة عن العلم ده
ولدهشتي فهموني
ساعتها كنت جوايا بتنطط واسقف لنفسي
اه
زمان كانوا بيقولوا سقف لنفسك لما تعمل حاجه وتحس انها حلوة
لاحظت اني طفولتي مماتتش
ولا استخبت حتى
دي كبرت
ورعرعت
وزادت اوي
وخرجت للي حوليا
اجري هنا اروح هناك
اتكلم مع ده وده وده
مركزش في حته
انزل تحت المكتب
واقعد على الارض

مهي طفوله بقا

لكن

اللي حسيت بجد انه بدأ يتسجن
وده اكثر حاجه ضايقتني
هي افكاري
اتصدمت بكتير من الاحباطات
مع اني وانا بفكرها
وبحلمها
بحطلها كل انواع المعوقات
لدرجة عقلي مش متخيل انها ممكن تلاقي عقبه توقف افكاري
اللي هي مصمم انها حره
طب افكار زي ايه
افكار زي جامعة افضل
تقولي ازاي
اقولك مش محتاجة غير انك تفتح الباب لنشاط سليم بخطة كويسة واللي بعدك يمشي على الخط ويطور
مش لازم بالتفصيل علشان ممكن افكاري تكون متخصصة شوية

الا انها بدأت تتسجن

حلمت بتغيير جو الارض
اه
ازرع فكره في اللي حوليك انهم يزرعوا شجره
وبدأت
وبعدين
........

حلمت بدورات تدريبيه بأسعار كويسة لي ولكل اللي زيي علشان نخرج نبقا مفيدين لكل الناس ومفيدين لنفسنا في الاول ونكون علينا القيمة
وبالفعل اتفقنا مع المهندسين على كورسات بأسعار رمزية في معامل الكلية والعميد وافق
وبعدين
..........

حلمت بنادي علوم مع اصحابي في كليتنا وفي كل مكان
والموافقات اشتغلنا فيها وبعدين
اصل الشعار مش حلو

وبعدين
.........

حلمت اني بمد ايدي لغيري علشان اساعده
وامد ايدي لنفسي انا كمان
وبعدين
..............

حلمت بفن هادف ومسرحيات كويسة وبدأنا وعملنا 4 مسرحيات اقوى من بعض
اولها انت حر وبعدين قصاقيس بورسعيدية وبعدين أغنية على الممر
وسواقي الدم
وبعدين
انشغلت عن المسرح بسبب الكلية وتطلع مسرحية دون المستوى ومعالجة مش ظريفة اطلاقا من وجهة نظري
وبعدين
..........

حلمت بإختلاف وبعد عن التعصب على الاقل بيني وبين نفسي لكن لقيت
زي مكل واحد وجد
تعصبة هو نفسه قوي منه
طب وبعدين
............

حفضل اتكلم كتير وعندي شيت محليتوش
طب وبعدين

Tuesday, April 10, 2007

تحديث جديد من مدونة مدونين بورسعيد

تحديث
طلب من مدوني القاهره نرجوا منكم المساهمة معنا في دعم ضحايا الحادث الاليم
بزياره الضحايا في معهد ناصر بالقاهره وتقديم لهم الدعم النفسي
ولكم الثواب ان شاء الله
-----------------------------------------
بدء حملة التضامن من قبل عدد من مدوني بورسعيد مع المصابين
نص الموضوع
الاخوة الاحباء
زورا مدونتنا السلام عليكم و رحمة الله
كنا امبارح اتكلمنا عن فكرة حملة التضامن و المساعدة
مع اسر الضحايا و المصابين و طلاب كلية تربية نوعية
ببورسعيد
=======
نشكر كل المدونين على تعاونهم الممتاز
و ايمانهم باننا جميعا ممكن نقوم بدور ايجابى تجاه
اخواتنا المصابين و اهالينا اسر الضحايا
و بالفعل حماسكم الشديد
و اللى مش غريب عليكم و حبكم للتجمع دائما على الخير
وصلنا للافكار اللى هتعرض الآن
و طبعا اللى اخدت موافقة اغلبية المدونين
اللى عرفنا ناخد رأيهم نظرا لضيق الوقت
=======
يوم الاربعاء 11 أبريل
------
تم الاتفاق على
تجمع المدونين امام ابواب مستشفى آل سليمان
فى تمام الساعة الثامنة مساءا
غدا
و ذلك للوقف على ما يمكن ان نقدمه للمصابين
و معرفة فصائل الدم المطلوبة
و تقديم دعم معنوى لاسر المصابين
========
يوم الخميس 12 أبريل
------
تم الاتفاق بين مدونى بورسعيد على صوم يوم
الخميس 12 ابريل
و توحيد الدعاء قبل تناول وجبة الافطار
للمتوفين بالرحمة و المغفرة
و للمصابين بالشفاء و الرحمة
=====
و نشكركم على التعاون الصادق
و جعله الله فى ميزان حسناتكم
******
رجاء من الاخوة الالتزام بموعد الاربعاء فى تمام الثامنة امام المستشفى

Monday, April 09, 2007

حـــــداد




تحديث جديد في القسم الثاني من هذه التدوينة
اعلن توقفي عن التدوين لمدة ثلاث ايام بداية من اليوم
حدادا على زملائي الطلبة والاساتذة بكلية التربية نوعية ببورسعيد الذين توفاهم الله
في الحادث الاليم بعد عصر امس
حيث انقلب الاتوبيس الذي كان يقلهم في رحلة العوده من مدينة شرم الشيخ
عدد كبير من الضحايا
والمصابين عددهم كبير وحروق رهيبة حسب ما وصلني من معلومات
انا لله وانا اليه راجعون






اللهم ثبتهم عند السؤال

اللهم ثبتهم عند السؤال


اللهم ثبتهم عند السؤال


اللهم اغفر لهم وارحمهم واسكنهم فسيح جناتك


اللهم اجعل قبورهم روضه من رياض الجنه ولا تجعلها حفره من حفر النار


اللهم اجعلهم في الفردوس الاعلى يارب العالمين


امين امين امين
------------------------------------

تحديث

كتب خايف في مدونته بحري


مش لاقيين كلام نقوله من شدة الحزن
لا إله إلا الله
و إنا لله و إنا إليه راجعون
بس اللى حصل خلانا لازم نتكلم
لازم كمدونين البلد دى
نقف ايدينا فى ايد بعض فى محن بلدنا
و ولاد بلدنا
اللى حصل كان صعب اوى
كان قاسى اوى
=======
الحادثة
الاتوبيس358البحر الاحمر
تابع لشركة " انتر جولف للسياحة
كان فى طريق عودته بشباب بورسعيد
لحضن بلدهم بورسعيد
لكن القدر و امر الله طبعا
و رعونة و استهتار بارواح ابرياء
منعهم من الحصول على اخر امانيهم فى الحياة الدنيا
بس ان شاء الله هيحققوا كل امانيهم فى الحياة الاخرة
لما كان كل حلمهم فى اللحظات دى
انهم يلاقوا اهاليهم فى انتظارهم فور دخولهم بورسعيد
وجدوا فعلا اهالي بورسعيد كلهم ينتظروهم
ليودعوهم لمثواهم الاخير
نعم اهالى بورسعيد اهاليكم
كلها تبكيكم
و ناخد العزاء فيكم
و ننتظر الصبر عن مصيبتنا
وداعا اخواتنا فى بورسعيد
اهالينا اسر الشهداء
فقد مات ابنائكم شهداء
و لكن الآن لكم آلاف الابناء
فهل تقبلوننا ابناء لكم
نعلم اننا مهما قلنا لم نستطيع ان ننسيكم آلامكم و آلامنا
و حزنكم و احزاننا على فراق احبابكم و احبابنا
و اصدقائكم و اصدقائنا
و لكننا نعلم ان الايمان بالله عامر فى قلوبكم
فلنصبر و لنحتسب
======
اخوانى مدونى بورسعيد فى مدونتنا
نعلن مبادرة مدونى بورسعيد
للتضامن مع اسر الضحايا و المصابين و طلاب كلية تربية نوعية
فى مصابهم و مصابنا الأليم
قررنا نحن مدونى بورسعيد أن
يكون لنا دور ايجابيا فى هذه المأساة
اكيد فى حاجات محتاجنها للمصابين
اكيد عايزين دم
اكيد زمايلهم محتاجين دعم معنوى
لازم نكون اقرب من الحدث علشان نعرف اكتر
ممكن نعمل ايه
الاول احنا هنسأل على موضوع حاجة المصابين للدم دى
هننزل الكلية للطلبة و نحاول نكون جنبهم
ساعدونا بالمعلومات
اللى ممكن من خلالها نساعد و لو بحاجة بسيطة
احنا هنستقبل أى اقتراحات من اى مودن فى مصر كلها
او فى أى حتى فى العالم
من اى انسان عايز يكون معانا فى العمل ده
فكر معانا
دى اقتراحات اللى اتعرضت دى
و متروكة للنقاش
======
ينعى مدونى بورسعيد
اخوانهم من أبناء بورسعيد الذين
راحوا ضحايا لحادث أليم
و يدعون الله لهم بالرحمة و المغفرة
و لاسرهم الصبر و السلوان
و نعلن الحداد فى مدوناتنا لمدة أسبوع
و إنا لله و إنا إليه راجعون
======
للتواصل معانا بالافكار
عن طريق الكومنتات فى البلوج
http://www.portsa3ed.blogspot.com/
او الايميل
portsa3ed@hotmail.com
ولمتابعة تفاصيل الحادث
زورا موقع
www.4portsaid.com
و لانى مدون من مدونى بورسعيد و من الناس اللى متأثرة بالحادث
ادعوكم جميعا للمشاركة فى هذه الحملة
و فى انتظار تواصلكم معنا
----------------------------------------------
وانا بدروي اسألكم الدعاء للضحايا الاموات بالمغفرة والرحمة
وللأحياء بأن يعجل الله شفائهم
واطلب منكم نقل هذه التدوينة ونشرها في المدونات لجمع اكبر عدد من الافكار لدعم هؤلاء الضحايا
اخيراً النهارده بلغني ان لسه فيه عدد من المصابين ميعرفوش حجم الكارثة ومتخيلين ان زمايلهم لسه احياء
واحد منهم النهارده بيقول احمد هو اللي اصر اني اطلع الرحلة دي
لما اشوفه بس حخنقه
بيتكلم بهزار
وهو في العناية المركزة
وميعرفش ان احمد اللي بيتكلم عليه ده توفاه الله
ربنا يصبر اهلهم
ويصبر اصدقائهم على فراقهم
وانا لله وانا اليه راجعون


Thursday, April 05, 2007

حكايتي مع المدونات

النهارده عايز احكي حكايتي

حكايتي الطويلة

حكايتي مع المدونات

صحيت الصبح وبعد لما فطرت وقولت انزل جري علشان اسدد فاتورة التليفون التي تعدت حاجز المائة وخمسين جنيه بالتأكيد

وبعد لما افوت على التموين والاقيهم بيعتذروا عن صرف التموين لمراجعة الدفاتر

قولت ارجع بقا اطمن على اصحابي

وعلى المدونات

بدأت وقولت الدنيا حر والواحد عايز يفرفش بنسمة هواء

حره

جريت على
فوكيره جوسي لقيتها بتقولافكارها الحره

فضلت افكر بعد مود الحرية ده والتأمل في معنى هذا الكلام ممكن اروح فين ملقيتش غير البحر

جريت على
البحر بتاع خايف

لقيته بيتكلم وبيتناقش وبيتحاور على البحر
بين عقل الانسان وقلبه

قولتله خلينا نركز شوية

مش شايف البحر ..شايف السماء..شايف القمر

قالي سبحان الله

تعرف ان
اجزوتك ماتر كان اقرب للقمر مننا دلوقتي
الكلام ده كان من كام يوم
قولتله اه عرفت
حتى بالاماره كان معاه
ستورم ولقيت خالد بيسبح وبيسأل على لسان قمرنا اوتدرون من أكون

فعلا تأملات جميله ..جعلتني احن ان اجلس واستمع الى
حواديت روزاليا

لأجدها لازالت تبحث عن وطن لجبينها

بالرغم مما قاله نزار
ووصفته روزاليا

وما قاله نزار ايضا
وعاشته روزاليا

التفت قليلاً حتى اجلس قليلاً
مع نفسي

لأتأمل ..ولكني وجدت احمد فؤاد قد جلس مع نفسه كثيراً

وفهمها تقريباً
الى ان توصل الى ان يقوم ويفتح
علبة الوانه ليخرج منها الى عالم طفولته

يداعب الاطفال ويشعر بسعادته معهم

وفي وقت جلوسي وجدت من تتمتم
بحكايات من قلبها

نعم تسنيم التي تتسائل
ايهما اولى بالتسجيل

هل ذكرياتها السعيده ام الاليمة


فقلت لها تعالى نروح نسمع شعر عمنا دكتورنا
الدكتور زيفاجو

لقيته بيتكلم عن على وحسة المرهف

وعن الكيمياء اللي بين شخصيته وشخصية على

ودعانا علشان نستمع لعلى


فجرينا جري على
على الالفي

لقيته في تفاصيله

وهو بيسمع اغانية الهادية ..الشقية
كان بيتكلم عن زيفاجو وازاي الشخص ده فهمه

وعرف يخرج احساسه بالكلمات

دعيتلهم ربنا يخليهم لبعض ..واعتذرت لهم لأنسحب لأني شعرت بالحنين الى الذهاب الى صفحة النيل

وذهبت لأنظر لى صفحة النيل
معتمة هي في ظلمة الليل بالرغم من الضوء المنعكس عليها من جميع الانحاء
من المباني الشاهقة التي نافست الطيور في مكانها

وسط السحاب

اخذت اتأمل منظر القمر على صفحة النيل

وجدتها هناك
سمراء هي كليل بهيج

تنظر الى صفحة النيل ..نعم هي
سمراء النيل

عمالة تحكي حكيتها اي حاجه في اي حاجه
لما وصلتلها لقيتها بتحكي قصتها العجيبة
وعودتها الى الحياة

جلست استمع لها.. ولازلت اتعجب من قصصها
جلسنا من وقتها

حتى الشروق ..واذا به قادم يتأمل شروق الشمس وهذا المنظر الجميل

ايوه
راسبوتين..لقيته واقف بيتأمل
يمكن يلاقي
الشنطة اللي بيحلم بيها

والناس كلها بتحلم بيها

فضلت واقف معاه

اتكلمنا كتير لحد لم لقينه دوشة كتير وناس واقفة

كل واحد بيعمل حاجه..اللي بيكلم نفسه ..واللي بيلعب هناك..واللي بيتكلم هنا

ولقيت واحده عاقلة شوية عماله تدش كلام سياسه..سألتها مين دول؟؟
قالتلي
دول جبهة التهييس الشعبية

قولتلهم معطلكوش لحسن بقالي يومين منمتش

قولت اتمشى على النيل في السكة

سلمت على سمراء

والنهار خلص

بصيت على الشمس ..لقيت منظرها جميل في
ساعة غروب

ولقيت رودي واقفة تبص لمنظر الشمس

وهي لابسة طرطور ومعاها زماره

وعماله تقول هيييه انا كبرت يا شمسي..كبرت

كل سنه وانا طيبة ..سلمت عليها وباركتلها على فوات ربع قرن لها في هذه الحياه

مشيت وصممت اني اروح ارتاح شوية..لأن بالرغم من كل اللي مريت بيه

الا اني خلاص دماغي بقت مليانه
كراكيب

ولقيت نهى بتقول
ممكن

جريت وقولت انا لو فضلت كده دماغي حتضرب

روحت نمت
ونزلت بلليل متأخر

قولت اكل لقمة لحسن خلاص وقعت من الجوع

لقيت
كلبوزة في المطعم

لقيتها بتاكل ومعاها عرايس
ميكي وبطوط وبندق
وعماله تلعب معاهم
وتقولهم عايزه ابقا زيكم..واعيش معاكم


اعرف اللي بيكذب لما مناخيره تطول زي بونوكيو...واعرف اللقيم لما يضحك ضحكة دنجل

قولتلها ممكن اقعد اكل جنبك...قالتلي قولي بتاكل ايه

قولتلها سندويتش فراخ

قالتلي هات حته

رحت قايم جري العب بعيد مهو الاكل مش بعزقة

لقيت ان كل الاحداث دي خليتني افكر..علشان لو فكرت
اذا انا موجود

ولقيت كايند عاملة
شهر المسودات

قولتلها

مهو لازم كلنا يبقا عندنا مسودات

حتى لو مخرجناهاش

بس لازم نكتبها ولو في عقولنا

قولت اقرأ معايا شوية شعر

لقيته سبق معاه و معاه

ايوه..هو وهو.. مهو
ابراهيم معايا

اللي عمال يدن ويقول يا ناس مش المهم انك تكون لوحدك بس لأ المهم انك تكون معايا

لفيت كتير وطوفت

مزورتش لسه كل الاماكن

نفسي اروح ازورهم تاني وازور باقي الاماكن اللي روحتها

قبل كده بس مزورتهاش اليومين دول

رجعت لبيتي
زحل الفلكي

احكي عن اللفة اللي لفيتها دي

واللي بالرغم انها كانت مرهقة

الا انها ممتعة

تحياتي لكم جميعاً يا من زرت مدوناتكم

المذكورين في هذه التدوينة

واللي مكفاش اليوم اني ازورهم النهارده

مصمم اني اروح وازورهم ان شاء الله

شكر خاص جدا لصاحب الجمله الشهيره
i tagged you

مبرمج حر

واللي اتعلمت من عنده كيفية وضع اللينكات في المدونة

وشكراً لكل اللي زورتهم النهارده


فوكيره جوسي

بحر خايف

اجزوتك ماتر

ستورم

حواديت روزاليا

مع نفسي

حكايات من القلب

الدكتور زيفاجو

على الالفي

سمراء النيل

راسبوتين

جبهة التهييس الشعبية

ساعة غروب

كراكيب

كلبوزة لكن سمباتيك

انا افكر اذا انا موجود

ابراهيم معايا

مبرمج حر

Monday, April 02, 2007

موضوعين X واحد



عايز اتكلم عن موضوعين حصلوا امبارح والنهارده
نبدأ بإمبارح

ايون

1/4/2007
اول ابريل
يوم الكذب
اه والله يوم الكذب

تصوروا اننا في بلدنا العربية اللي بنؤمن بالرسول عليه الصلاة والسلام
الذي قال:
"ايه المنفق ثلاث ،اذا حدث كذب واذا وعد اخلف ،واذ أؤتمن خان "

وقوله عليه الصلاة والسلام:
"اربع من كن فيه كان منفياً خالصاًَ ومن كانت فيه خصله منهن كانت فيه خصله من النفاق حتى يدعها
اذا حدث كذب واذا وعد اخلف واذا عاهد غدر واذا خاصم فجر "
او كما قال رسول الله صلى الله عليه وسلم في الحديثين

يبقا ازاي نعمل يوم للكذب
امبارح في العاشرة مساءاً بيعملوا ريبورتاج
واليكم بعض الحوارات

نسبة الكذب في كلامك كام في المية

80%

حالة ذهول

بتكذبي كذبة ابريل
طبعاً بس انا اعمل وميتعملش فيا

ايه اكثر كذبة ابريل عملتها



حكاية طويلة عريضة مفادها انه وقع بين واحد وواحده وبعدين قال انه بيكذب علينا

واحد بس اللي قال انه مبيكذبش وانه بيضايق لو ده حصل فيه

تخيلوا
واحد بس

لكم انتم الحكم

اه كذبة ابريل السنادي لسه شايفها دلوقتي وهي خبر موت واحد صديقي
وحسبي الله ونعم الوكيل في اللي كذب الكذبة دي
------------------------------------------------------------------------
الموضوع التاني
صباحوا بقا الموضوع التاني ده

فوق كده

واللا اقولك روح اغسل وشك وتعالالي علشان حسألك شوية اسئلة
اه على فكره انا بكلم نفسي في الاسئلة دي
السؤال الاول
اذكر بالتفصيل مكان القافلة في الصحراء؟
يووووووووه لا مش ده
نتكلم جد بقا
تسمع عن التزوير ؟
مش بتاع الانتخابات ده والحوارات دي ...اه طبعاً اشمعنى
متجاوبش السؤال بسؤال
نكمل الاسئلة
زورت قبل كده ؟
لا حاش لله

طب تعرف شوية انواع من التزوير ؟
اه طبعاً ياعم انت فاكرني جاهل واللا ايه

طب قول ؟
شهادة الزور
تزوير الانتخابات
تزوير الفلوس

ها
بس كده ؟
اه يعني تقريباً بس كده

طب ولو كتبت زميلك على انه حاضر في محاضرة او سكشن
مش ده تزوير ؟

تزوير ايه عادي ياعم
لا مش عادي

مش ده تزوير؟

مش انت بتضايق من تزوير الانتخابات؟
مش انت مش عيز حد يزور الفلوس ولا عايز حد يزور في شهادته؟
ولا ولا ولا
طب مش الرسول عليه الصلاة والسلام في حديث من الاحاديث لا اتذكر نصه بالضبط ولكنه
كان يحذر اصحابه بقوله
الا وقول الزور وشهاده الزور
الا وقول الزور وشهاده الزور
ولازال يكررها حتى قال الصحابة الكرام ليته سكت
طب ليه بتزور؟
ليه ؟
علي فكره قامت خناقة النهارده بين 2 في الكلية اصحاب
واحد عايز يكتب زميله حضور
والتاني مصمم انه مش حيكتبه حضور لأنه غايب
تقوم خناقة
اكتب فلان في الغياب
لا مش حكتبه
ليه
علشان هو غايب
ايه ياعم انت عادي
لا مش عادي
مالك فيه ايه
انت مش حضرت واخذت غيابك خلاص مينفعش تكتب واحد مش موجود ده تزوير
اقطع معايا واختار مواضيعك معايا
انت حتخبط
اه حخبط
خلاص ماشي خبط مع نفسك
تخيلوا كل ده يحصل بسبب اننا اتعودنا على التزوير

ايه رأيكم

ملقيتش احسن من صورة بونوكيو علشان البوست ده