عايز اتكلم عن موضوعين حصلوا امبارح والنهارده
نبدأ بإمبارح
ايون
1/4/2007
اول ابريل
يوم الكذب
اه والله يوم الكذب
تصوروا اننا في بلدنا العربية اللي بنؤمن بالرسول عليه الصلاة والسلام
الذي قال:
"ايه المنفق ثلاث ،اذا حدث كذب واذا وعد اخلف ،واذ أؤتمن خان "
وقوله عليه الصلاة والسلام:
"اربع من كن فيه كان منفياً خالصاًَ ومن كانت فيه خصله منهن كانت فيه خصله من النفاق حتى يدعها
اذا حدث كذب واذا وعد اخلف واذا عاهد غدر واذا خاصم فجر "
او كما قال رسول الله صلى الله عليه وسلم في الحديثين
يبقا ازاي نعمل يوم للكذب
امبارح في العاشرة مساءاً بيعملوا ريبورتاج
واليكم بعض الحوارات
نسبة الكذب في كلامك كام في المية
80%
حالة ذهول
بتكذبي كذبة ابريل
طبعاً بس انا اعمل وميتعملش فيا
ايه اكثر كذبة ابريل عملتها
حكاية طويلة عريضة مفادها انه وقع بين واحد وواحده وبعدين قال انه بيكذب علينا
واحد بس اللي قال انه مبيكذبش وانه بيضايق لو ده حصل فيه
تخيلوا
واحد بس
لكم انتم الحكم
اه كذبة ابريل السنادي لسه شايفها دلوقتي وهي خبر موت واحد صديقي
وحسبي الله ونعم الوكيل في اللي كذب الكذبة دي
------------------------------------------------------------------------
الموضوع التاني
صباحوا بقا الموضوع التاني ده
فوق كده
واللا اقولك روح اغسل وشك وتعالالي علشان حسألك شوية اسئلة
اه على فكره انا بكلم نفسي في الاسئلة دي
السؤال الاول
اذكر بالتفصيل مكان القافلة في الصحراء؟
يووووووووه لا مش ده
نتكلم جد بقا
تسمع عن التزوير ؟
مش بتاع الانتخابات ده والحوارات دي ...اه طبعاً اشمعنى
متجاوبش السؤال بسؤال
نكمل الاسئلة
زورت قبل كده ؟
لا حاش لله
طب تعرف شوية انواع من التزوير ؟
اه طبعاً ياعم انت فاكرني جاهل واللا ايه
طب قول ؟
شهادة الزور
تزوير الانتخابات
تزوير الفلوس
ها
بس كده ؟
اه يعني تقريباً بس كده
طب ولو كتبت زميلك على انه حاضر في محاضرة او سكشن
مش ده تزوير ؟
تزوير ايه عادي ياعم
لا مش عادي
مش ده تزوير؟
مش انت بتضايق من تزوير الانتخابات؟
مش انت مش عيز حد يزور الفلوس ولا عايز حد يزور في شهادته؟
ولا ولا ولا
طب مش الرسول عليه الصلاة والسلام في حديث من الاحاديث لا اتذكر نصه بالضبط ولكنه
كان يحذر اصحابه بقوله
الا وقول الزور وشهاده الزور
الا وقول الزور وشهاده الزور
ولازال يكررها حتى قال الصحابة الكرام ليته سكت
طب ليه بتزور؟
ليه ؟
علي فكره قامت خناقة النهارده بين 2 في الكلية اصحاب
واحد عايز يكتب زميله حضور
والتاني مصمم انه مش حيكتبه حضور لأنه غايب
تقوم خناقة
اكتب فلان في الغياب
لا مش حكتبه
ليه
علشان هو غايب
ايه ياعم انت عادي
لا مش عادي
مالك فيه ايه
انت مش حضرت واخذت غيابك خلاص مينفعش تكتب واحد مش موجود ده تزوير
اقطع معايا واختار مواضيعك معايا
انت حتخبط
اه حخبط
خلاص ماشي خبط مع نفسك
تخيلوا كل ده يحصل بسبب اننا اتعودنا على التزوير
ايه رأيكم
ملقيتش احسن من صورة بونوكيو علشان البوست ده
16 comments:
مشكلة العاشرة مساء انه يختار ناس هايفه يتكلم معاها
فى ناس كتير مبيهمهاش موضوع كذبة ابريل
اتصدق اول مرة اعرف موضوع التزوير بتاع الغياب دا
على كدا انا بزوزر من 5 او 6 سنين
كذبه ابريل لا تعليق عليها والحمد لله متعملتش فيا السنه دي
نفسي اعرف اصل موضوع كذبه ابريل ده
-------------
موضوع
تزوير الغياب
انا كنت السنه الى فاتت سواء انا الي غايبه او حد من اصحابي
كنا بنعمل حيل رهييبه في موضوع الغياب ده وكنا سعات ندخل ناس مكان ناس
وشغل على تقيل
انما دلوقتى وبالفطره السليمه عرفت ان الى بنعمله ده غلط
وقطعنا مع الحكايه دى وبقينا ننشر الفكره
تحياتى
عارف التعود على شىء يجعلة من الاساس ولو فقدنا يوم الاتفال بيوم الكذب هنحس ان فية شىء ناقص جوانا
شوفت التعود بيعمل اية
عندنا حاجات كتير ماشية بالمقلوب
تحياتى
احمد اتش
مش الفكره انهم بيختارو ناس هايفة
الفكره ان فيه ناس هايفة كده
مهو لو الناس بطلت هيافة مش حيلاقوا هايفين يصوروا معاهم
بالنسبة لموضوع الغياب اديك عرفت بقا واستغفر ربنا وانشر الفكره
:)
كلنا كنا بنكتب زمايلنا في الغياب
بس بالرغم من كده
لازم نبطل
تحياتي وشكراً لزيارتك
جوسي بالنسبة لكذبة ابريل فإن شاء الله تختفي من الوجود والناس تبطل عبط بقا
بالنسبة لتزوير الغياب
ربنا يباركلك
ولو حد اتخانق معاكي زي صاحبنا اللي انا كاتب عنه ده
اندهيلي علشان اجي اشوف الموضوع واتفرج على الخناقة
:P
تامر باشا
منور
انت جيبت التايهه
هو التعود ابن اللذين ده
زي لما تكون متعود تقول اهلا ازيك الحمد لله
من غير متستنى اي رد من اللي ادامك
حتى لو قالك اي كلمه في النص برضه حترزع الاستطمبه دي من غير تفكير
نفسي نفكر شوية في اللي بنعهمله اي كان
تحياتي
واحده من الضيوف اللي في العاشره مساء قالت مفروض نعمل يوم للصدق مش للكذب لان الكذب بقا كل يوم وبقا شي طبيعي وعندها حق للاسف الشديد
بس لو كل واحد وثق في نفسه شويه اعتقد ان الكذب هيقل لان الكذب بيبقي جبن في اغلب الاحيان
بالنسبه لموضوع التزوير المشكله زي ماقلت اننا بنعمل حاجات كتير اوي من غير منفكر فيها
بس لو فكرنا هنبطل لاننا في الاصل مش قصدين نعمل حاجه غلط
سلام عليكم
ازيك يا نوفا
اولا كدبة ابريل طبعا الرسالة وصلتنى
بس بعمل حركة كده فى صاحبها هتاخدلى حقى جدا منه هقولك عليها لما اشوفك
بس انا اصلا مصدقتش الرسالة لانى متوقع الاشتغالة الخاصة بالشخص ده
و زى ما وضحت فى المنتدى ان ممكن يكون فى وقت هو فى حاجة لى و مروحش ليه علشان هكون برضه بشك انها اشتغالة
==========
موضوع التزوير تزوير و لا خلاف فى ذلك
و لكن معلش فى الكلام اللى هقوله ده
الاصل قوله صلى الله عليه و سلم ( لاضرر و لا ضرار )
فلا تضر احد و لا تضر نفسك
هو ده راى الشرع
قد يكون الشخص الذى لا يستطيع حضور المحاضرة عنده من الظروف ما يمنعه من الحضور و ظرف منطقى و لو اتاخد غياب هيتضرر من كده
و لكن الامر ميكون عادة للهروب من المحاضرة
ده عذر اللى بيزور فى المحاضرات
و لو حبيبنا نعمل الصح يبقى لازم ميتمش التزوير نهائى و لكن يصحبه قبول الاعتذارات عن حضور المحاضرات و ألا لن يكون ألا هذا الحل
ده رأيى و للنقاش طبعا
تحياتى
بحرى أنا :)
كرتي البعبع
متفق معاكي جدا في موضوع ان خلاص الناس بدأت تعتبر الكذب حاجه مسلم بيها
وحاجه عادية
والمفروض نمنع يوم الكذب
علشان لو عملنا يوم للصدق يبقا ده معناه ان خلاص الصدق مات وده مش حيحصل ان شاء الله
بالنسبة لموضوع التزوير ده فعلا لو الواحد فكر في اللي بيعمله حيلاقي كتير غلط لازم يتصلح
خايف
منتظر اعرف التفاصيل
وبالنسبة لموضوع العذر فده انا متفق معاك فيه
واحد زميلنا كان رجله فيها شرخ ومكانش بيحضر
كانوا عايزين يكتبوه في الغياب
الباشمهندس سأل كاتبين حد مش موجود
قالوله ايوه كاتبين فلان علشان تعبان
قالهم لأ لما ييجي انا حشيله غيابه علشان عنده عذر
طالما الموضوع كده يبقا المفروض بقا ميبقاش فيه تزوير من ده
واللا ايه رأيك ؟
سلام عليكم
اولا أحب أقلك يا أخ زحل
ان أكتر حاجة عجبتني في مدونتك انك ضد التدخين، انا في اللحظة دي قاعدة جنب واحد "مدخني" ههه ومش قادرة أستحمل
المهم بالنسبة لموضوع الكدب
أنا مرة صاحبتي عملتو فيي وصدقني حاجة مش حلوة أبدا
خاصة لو كان اللي بيكدب شاطر بالتمثيل
ههههه
أنا كدت أبكي وقتها
تحياتي وبالتوفيق
زحل احييك على موضوعك ده
فعلا والله الناس بتاخد موضوع الكدب ده على انه حاجة كده والسلام
يعنى مرة كدبة بيضة ومرة كدبة ملونة
احييك بجد وشكرا ليك ولزيارتك ليا
شهيدة
منورة المدونة في زيارتك الاولي
ويارب الناس كلها تبطل تدخين لأنها عاده مقرفة بصراحة
وبالنسبة لموضوع كذبة ابريل ربنا يرحمنا من الكذب والاستظراف في الكذب كمان
راسبوتين
شكراً ياباشا لتعلقيك
وفعلا موضوع الكذب ده بقا حاجه شبه عاديه
ودور كل واحد فينا انه يقاوم الكذب في نفسه
خصوصاً في الوقت اللي بيتهيأله فيه ان الكذب هو اللي حينجيه
لأنه مستحيل ينجيه
حيقع في الاخر
تحياتي
منور ياباشا
أصلا انا عمري ما كذبت كذبة ابريل ولا اتكذبت عليا
الموضوع مش منتشر خالص
لكن موضوع التزوير ده ابصملك بيه بالعشرة
في حاجات كتير قوي بنعملها ومعتقدين اننا مبنعملش حاجة غلط
زي مثال التزوير ده ، وزي اللي بيسرق نوتات واجندات من شغله ومعتقد ان جي مش سرقة لمجرد انه مدخلش بيت وسرق الفيديو والمجوهرات وغيرها حاجات كتير
متغيره شوية
ممكن موضوع كذبة ابريل مش منتشر للدرجه
بس الكذب عامة انتشر
انما موضوع لسرقة ولتزوير والغش ده فعلا زي مبتقولي واحد ياخد اجنده من شغله
يتكلم من تليفون المصلحة
وكثير زي كده
وربنا يعافينا
Post a Comment