Wednesday, November 29, 2006

كل سنه وانت رأس يا عمي ....قصدي وانت طيب

عندي امتحانات
كلمة مستفزة تستفز كل انسان في كلية الهندسة
وخصوصاً لما يحصل اللي بيحصل كل سنه والامتحانات تتكربس في اسبوع او 2 بس
طيب لو قولنا ان ده تقصير مننا احنا الطلبة علشان مثلا مش بنذاكر
نبص نلاقي كمان امتحانات نص السنه ضغطوها علشان تبقا يوم ويوم لأ
والادهى ان كمان امتحانات التخلفات قبل امتحانات نص السنه !!يعني مفيش مفر
حتشيل مواد حتشيل مواد
لما يتكالب نظام التعليم كله على الطلبة الغلبانين
لما يطلع عيني وعين اصحابي علشان ناخد قاعة نعمل فيها نشاط لمدة يوم واحد
وفي الاخر يوافقوا بعد طلوع الروح !! لما نقدم طلب تغيير مواعيد الامتحانات في الجدول المقترح
قبل ميثبتوا الجدول
ويترد علينا ب حنشوف وتعالوا كمان يومين 3
لما نتهمش تهميش متعمد ونتحط في الصورة في اللي الوكلاء عايزينه
بجد انا اتخنقت
لما تلاقي طلبة الاخوان المسلمين مش عاتقيننا احنا اتحاد الطلبة وعمالين يطلعوا مجلات يهاجمونا فيها
مع اننا بنشتغل
ولما نفس الطلبة يتشدوا في السنه اكثر من مره وبرضه مش بيحرموش وبرضه يهاجموا
ومطلوب مننا نقرب للطلبة اكثر علشان نشتغل بفاعلية وكل منقرب للطلبة ونجيب طلباتهم
ترفض الطلبات دي
حرام
خلاص
اجيبها منين
واللا منين
من هجوم علينا من الطلبة
واللا من الامتحانات اللي عمالة ترف علينا من غير اي تنظيم
واللا من التخلفات اللي المادة بتاعتي فيها تعتبر اتقل ماده في السنه اللي فاتت
واللا من الامتحانات اللي بنمتحنها يوم ويوم
واللا من دورنا الخامس اللي بنمتحن فيه من غير اسانسير
ولا اضائة
ولا حتى ستائر قماش علشان الهواء والبرد في عز الشتاء
واللا من السقف اللي كان بيقع منه الدهان علينا نتيجة الشتاء السنه اللي فاتت
واللا منين واللا منين انا خنقتكوا معايا
اعذروني
=================
في النص بقا مش على الهامش كل سنه وانت راااااااااااااس ياعمي
قصدي وانت طيب
سك على بناتك

Tuesday, November 28, 2006

تمت بحمد الله

الحمد لله تمت المسرحية بنجاح ساحق
لمسته في كل كلمة تريقة اتقالت لي النهارده في الكلية على الشخصية اللي عملتها امبارح
الحمد لله المسرحية علقت في دماغ الجمهور
والحمد لله والف شكر لكل الحضور والله شرفتوني

===============
على الهامش
حذاري اشوف اي حد من الخونة في المعركة
!!

Sunday, November 26, 2006

مسرحية ...مش اي مسرحية




السلام عليكم يا جماعة

دعوة جديده

لكن المره دي علشان حضور المسرحية الجامده اوي

اغنية على الممر

المسرحية مشترك فيها مجموعة حلوة اوي اوي

المتألق دائما والممثل الكوميدي الرائع محمود الليثي

والمتألق دائماً وعمنا كلنا احمد عبد الواحد

زملائي الجدد في المسرحية كريم واحمد وعاملين شغل عالي

والمطرب الرائع اوي على الالفي

ايون اللي في الصورة ده

وانا كمان معاهم

بجد يا جماعة ملحمة وطنية جامده اوي تحكي عن مجموعة مسلحة تدافع عن ممر من ممرات سيناء

بجد مسرحية روعة

وفيها كوميديا شديده جدا وفيها تمثيل اوي

دعوة عامة

يوم الاثنين 27/11/2006

الساعة 6 ونص مساءاً بمسرح نادي الجامعة ببورفؤاد

في انتظاركم جميعا

Thursday, November 23, 2006

يوم من عمري واللا نقول اسبوع من عمري

حسيت اني محتاج اصدع نفسي شوية واكتب
اكتب
اكتب
اسبوع من عمري
سألني واحد صاحبي من فتره مالك
قولتله بقالي كتير اوي اوي مستعجل ومعنديش وقت
يعني نقول شهور
تخيلوا
شهور معنديش وقت او يمكن عندي وانا حاسس انه معنديش
طيب النهارده اهو فجر الخميس
نبدأ من الأحد الماضي
والاسبوع عندي بيبدأ من الاحد علشان الكلية اجازة السبت
الاحد الصبح محاضره من 8 ونص صباحاً ها ححضر واللا لأ بقولك ايه كبر دماغك الموضوع خربان اصلا
اروح على الظهر وافضل في الكلية بحد محاضرة الساعة 2 علشان عايز اشوف الدكتور
اوبس نسيت اخلص التقرير برضه ان شاء الله حعملة النهارده
اروح من الكلية على البيت غداء وانام شوية واصحى الاقي نفسي عندي بروفة
يوووووووووووووه بروفة تاني انا اتهديت
اروح البروفة وارجع على البيت
يوه انا حروح اجيب الحاجه اللي عايزينها
الحمد لله كده انا خلصت اطلع بقا
اطلع اتعشي وابدأ اذاكر
اتعشيت الحمد لله
نشرب كوباية شاي
نذاكر ساعة
هااااااااااااااااااااااااااااوم
عايز اناااااااام
طيب اقوم واصحى على الساعة 5 الفجر
ال 5 الفجر ال
انا عارف اني مش حصحي
يوووووه عايز افتكر اخلص التقرير اللي ورايا
الاثنين 8 ونص صباحا اقرر اني ححضر المحاضرة واروح الكلية بدري
احضر المحاضرة واتخنق ومقدرش اكمل
اخرج من المحاضرة واقرر اني حرجع انام
يووه نسيت افوت على رعاية الشباب
اروح الاقيهم محتاجين اعمل كام تليفون واخلص ورق
ابدأ في اني اخلص الورق
ها يا محمد جيبت المقال
اااااااااه المقال ايوه معايا في العربية حروح اجيبة
اروح عند بداية الكلية اخرج اجيب المقال وارجع تاني
يوووووه نسيت اخلص الورق
ارجع وامشي في الورق
الحمد لله ربنا ييسر ونكمل بكره الورق
التقرير فين يا محمد
يادي النيلة انا اسف هو تقريباً شبه جاهز يعني اصبروا شوية
يامحمد المناقشة الاسبوع الجاي
حاااااااااضر
روحت بعدها البروفة تاني
يا جماعة مينفعش كده انا عندي امتحان يوم الخميس
معلش يا محمد شد حيلك شوية المسرحية قربت
حاضر امري لله
ارجع من البروفة مقتول
اتغدي وانام واصحي بروفة تاني وشوية مشاوير
اه لازم اذاكر
كانسل كل النزولات بقا
مذاكره لمده ساعة
الحمد لله انجزت شوية
اوبس التقرير !! الحمد لله افتكرته
قمت فضلت اشتغل في التقرير والحمد لله طلع عيني بس خلص
عملته على الفلاش ميموري
اخيراً خلصته احمدك يارب
اروح اذاكر شوية
هااااااااااااااوم
وقت النوم
الثلاثاء 8 ونص صباحا في الكلية
ايه يا جماعة صباح الخير عندنا ايه
اه صح عندي سكشن موجات دقيقة
طيب
الحمد لله خلصت
انزل بقا اشم شوية هوا
اوبس لازم الحق اطلع اصلي عندي محاضره
لا مش طالع بقا لما اروح اخلص الورق بتاع امبارح ده
ربنا يسهل
من مكتب الرعاية لمكتب العميد لمكتب الوكيل لسكرتاريا الوكيل للوكيل تاني
ومن بعدها العميد
الحمد لله الورقة خلصت
احم
ايوه هي ورقة واحده بس
المهم
حتتبعت فاكس
اروح السكشن وانا مطمئن
الحمد لله روحت السكشن والسكشن اللي بعده
ورايا بروفة بلليل
يا جدعااااااااان انا خلصت التقرير
والله
لولولولولولولولييييي
طيب كل واحد ايده على 5 جنيه طباعة ويللا ننزل نصور الورق
خلاص يا بنات توكلوا على الله حسيبلكم نسخ في المكتبة
ايوه يا عم صورلي دي كمان
يوه ايه ده ورق جديد
مين ؟ نزل امبارح ؟
توكل على الله وصور
ياخسارة فلوسك يا عربي
اهو الورق ينفع نذاكر فيه
ورايا ايه
اه حروح اخيراً
ماشي يا شباب سلام
ارجع بيتنا وكالعاده شوية كمبيوتر
غداء
نوم
اصحى على البروفة
والله لأنا مذاكر النهارده ان شاء الله
اروح البروفة واخلص الاقيني كنت نسيت الجاكيت في بورفة امبارح
اخده من عربية المخرج
واجري على صاحبي كان عايزني نذاكر مع بعض
كنت اتأخرت شوية
فإعتذر
روحت خلصت مشاويري ورجعت مصدع جدا
لااااااا لازم اذاكر
اتعشيت وشربت شاي وهديت شوية
شوية قرءان بيهدي الواحد في الوقت العصيب ده
ضغط كبير حيولد انفجار
ان شاء الله اكون اكثر هدوء
الحمد لله الوضع اتحسن
ابدأ اذاكر
اخلص مسألة
عايز اقوم
شهييييييييق زفييييييييييييير مش حقوم
مش حقوم
افضل لحد مخلص شوية
والحمد لله
وقت النوم
انا ناسي ايه
ازاي مش ناسي حاجه
مهو اكيد
سبحان الله مش ناسي حاجه
الاربعاء
الساعة 8 ونص برضه
محاضرة والدكتور اخذ غياب
وبعدها محاضرة تانيه
والحمد لله اليوم عدي
فيه بروفة النهارده
يا جدعان حرام عليكم فيه عليا امتحان ارحموني
هييييييه البروفة اتلغت
طيب حروح للعميد عايز اتكلم معاه في موضوع موقع الكلية وكمان امتحانات التخلفات
من 12 ونص لحد 1 وثلث مستني ادخل ودخلت الحمد لله انا و 3 معايا واتكلمنا وظبطنا اللي كنا عايزينه
راجل محترم اوي وكل مره اتعامل معاه احترمه اكثر
انزل الاقي خبر اجمل
سبحان الله الامتحان اتلغي
الدكتور عنده ظروف ومش حييجي
مصائب قوم
بكره اجازة
الخميس حسافر وانا مرتاح
احمدك يارب
اخيراً شوية نفس
اليوم عدي هادي على غير عاده والحمد لله
بكتب وبصدع نفسي وبصدع البشرية انا عارف
بس تعملوا ايه في زحل
لأ وفلكي كمان
=====================
على الهامش
قانون بحاول امشى عليه
ان احرزت تقدماً، فأبداًً لا تسمح لنفسك بالتراجع

Friday, November 17, 2006

الحياء......حياء مين ؟؟هو لسه موجود


مش عارف اتكلم بالعربي الكبير المعقد ده واللا اتكلم كده على بلاطة
بحاول ابص شوية على صورة الطفلة اللي على الجنب دي
اشعر بمشاعر مختلفة
هل الذي يخفيها خلف هذا الباب هو حياؤها
ام مجرد استعدد للإنطلاق والتخلى عن الحياء
اثر في نفسي موضوعين في الفتره الاخيره وبجد عملوا تأثير كبير
الموضوع الاول هو: قضية التحرش الجماعي في وسط القاهره مرتين بفتيات من جماهير الشباب الغفيرة
:(:(:(:(
والموضوع التاني هو: اني كنت في سكشن وبدأنا بدري شوية وبعد مرور كام دقيقة استأذن زميلاتي البنات في الدخول وأذن لهم المعيد ولقيت صف بنات داخل كلهم وشهم في الارض ورايحين يقعدوا في اماكنهم
!!!
استغربت ووقفني الموقف ده جدا
هل الحياء لا يزال موجود ام اختفى
ما حدث بالقاهره يقول بل ويصرخ انه انتهى واختفى
وما حدث في السكشن يقول انه لازال موجود
اه مع اختلاف المواقف والاماكن الا اني رجعت وقولت لنفسي ان الحياء موجود
مهو اصله لو مش موجود لازم نجيبة
نعمله
نتصنعه حتى
اصل من غير حياء مينفعش يكون فيه حوار ناضج مثلا بين الناس والا حتلاقي الناس كلها عمالة تشتم في بعض ومش مكسوفين مهو بقا مفيش حياء
حتلاقي كل العاصين يجاهرون بجميع المعاصي مهو بقا مفيش حياء
حتلاقي الفاطر في رمضان يأكل في الشارع مهو مفيش حياء
حتلاقي البنات معاكساتهم حتزيد للولاد بقا مهو مفيش حياء
مواقف تحزن الا اني لما بصيت للجانب المشرق من هذه المواقف الحزينة
لقيت جانب مشرق
كبير
ونص الكوب لازال يمتلئ بالماء
يعني فيه امل
لقيت ان على قدر وجود عاصين بالشوارع ومجاهره بالذنوب
هناك من يستتر عن الناس وبعدها يستحي ويتوب او على الاقل مش بيجاهر بالمعاصي ده بيطلب من ربنا انه يهدية
حتلاقي لسه فيه ناس لو كانت في قمة غضبها الا ان الحياء يمنعها من التلفظ بألفاظ من اللي اصبحت صديقتنا وبنسمعها كل يوم في الشارع واسف على كلمة صديقتنا دي
ايوه اللي بيهزروا بيها مع بعض دي يا ابن ويا ابن ومتنيل على عينك وياخواجة
حتلاقي البنات على الرغم ان فيهم كتير معجبين بأحمد عز مثلا ونفسهم يشوفوه الا ان قلة منهم اللي حتتخلى عن حيائها وحترمي نفسها عليه علشان لسه فيه حياء
حتلاقي تقريباً مفيش معاكسات من البنات للأولاد في بورسعيد وبرضه حتى لو موجود في مصر عامة الا ان لسه فيه حياء
فيه حياء يا جماعة بجد لسه فيه حياء
ارجع للموقف بتاع الكلية تاني
صف بنات داخل السكشن
كلهم وشهم في الارض
اعرفهم جميعهم
ببحكم الزمالة
واقول لكم انهم
من مناطق مختلفة ومن محافظات مختلفة
مختلفين الطباع
مختلفين الثقافات
مختلفين اللهجات
مختلفين في ارتداء ايشارب او خمار
الا انهن جميعهن
متفقين على انهم عندهم من الحياء ما يكفي لأن يجعل انسان مثلي يلاحظ
انه لا يزال هناك حياء
بييجي على بالي بكثره في الفتره الاخيره وخصوصاً بعد خروج الراقصة الموقرة دينا علينا في كليب البلح
وينافسها سعد الصغير في ال"هز" هز الوسط طبعاً
بييجي على بالي مقولة عادل امام في شاهد مشافش حاجه
يابيه لو كل واحد عزل علشان تحتيه واحده رقاصة.....البلد كلها حتبات في الشارع
ده المثال اللي رسخ في ذهننا
لازم نقول اللي بيحصل فعلا
لو كل واحد عزل علشان تحتيه واحده رقاصة
معادش حيبقا فيه رقاصات
حيصبح كل من يفقد حياؤه منبوذ في المجتمع
احب اختم التدوينة دي بكلام خير البشر وسيدنا اشرف الخلق محمد رسول الله صلى الله عليه وسلم حين قال
الايمان بضع وسبعون شعبة ، اعلاها قول لا اله الا الله ، وادناها اماطة الاذي عن الطريق ، والحياء شعبة من شعب الايمان
او كما قال رسول الله صلى الله عليه وسلم
ها تحب يبقا فيك خصلة من شعب الايمان ؟
تحب
!!

Monday, November 13, 2006

نادينا الاهلى ورد علينا النادي الاهلي جوه عينينا

النادي الاهلي
النادي الاهلي
او نادي القرن
افتقدت شعور الاستمتاع بالمباريات منذ وقت طويل
وخاصة بعدما بدأ مستوى الكرة يتدهور مره اخرى بعد كأس الامم الافريقية الغالية بمصر 2006
ولكن امس
مباراة النهائي
نهائي كأس الاندية الافريقية ابطال الدوري
حقق الاهلي ما اسعد الملايين
واراد الله له تحقيق الفوز
في الدقيقة 92 اي
بعد انتهاء المباراه
مرت الوقت عصيباً وانا اشاهد المباراه في بيت صديقي العزيز
casper
وكاسبر زملكاوي
اوي
الا اننا اتفقنا على مشاهدة الماتش في بيته
وبرفقتنا
zero
وخايف عليكي يا بلدي
رباعي اجتمع من اجل حب مصر وحب مشاهده الفريق المصري
النادي الاهلي
تمر المباراه بسرعة ويداهمنا الوقت
ويصفر الحكم بإلغاء 3 انفرادات بخطر محقق على نادينا المحبب الاهلي
وهي مش اوفسايد بصراحة يعني
لكن يتبدل الحال
ويقوم الاهلي بالتغييرات
في الجون
ويبدأ هجوم الاهلي شكل تاني اخيراً
ومنذ فتره طويلة لم نستمتع بماتش للأهلي في شوطة الثاني بهذه الطريقة
اخيراً عاد الاهلي لمستواه وفاق الاسد من كبوته
ونلاحظ الكرات التي تضرب دفاعات الصفاقسي من جميع الجوانب ومن المنتصف
اوفرات وركلات وهجوم اهلاوي كاسح ارهق لاعبي الصفاقسي
الى ان جاء الفرج
في الدقيقة 92 من كله عالية ليوجهها عماد (المتعب ) الى فيلافيو المتألق جدا جدا
ليوجهها فلافيو برأسه الى العملاق محمد ابو تريكة
رقم 22
في يوم 11/11
وفي استاد 7 نوفمبر (يوم ميلاد ابو تريكة ) لتهتز الشباك اثر كرة ابو تريكة الصاروخية بقدمه اليسري وهو الايمن
وترتد من الشباب من عنف الركلة
وتهتز معها قلوب المصريين
وتخرج الصيحة من فمي مجلجله الله اكبر
الله اكبر
نسينا اننا في منزل
كلنا تجمعنا حول الشاشة
بالاحضان
يقف خايف في ركن الحجره يحمد الله واري فرحته وانفعاله
اري كاسبر يضحك
ونصيح الله اكبر
احساس رائع
تماماً مثل احساسنا بأهداف مصر في بطولة افريقيا
عادت الافراح الى مصر عن طريق النادي الاهلي
جعله الله سبب لإسعاد الملايين
مبروك يا اهلي
مبروك لمصر
تحيا مصر
==========
على الهامش
كنت ولازلت ارتدي فانلة الاهلي طوال اليوم من الكلية وحتى الان الساعة الرابعة فجراً
وسألني واحد معرفوش وقالي
مهو لو كان اتغلب مكنتش لبستها
رديت عليه بدون تفكير
والله انا كنت لابس الفانلة لما اتغلبنا في اليابان
الاهلي الغلبان فاااااااااااق ورايح اليابان

Wednesday, November 01, 2006

قلة حبنا

السلام عليكم ورحمة الله وبركاته
ياااااااااااااااه كان نفسي من زمان اكتب الموضوع ده
فضلت أأخر فيه كتير
انما لازم ييجي الوقت اللي نتكلم فيه واقول اللي عندي
موضوع بعنوان قلة حبنا
مش قلة يعني قليل
لأ قلة حبنا زي مسمعناها في مسرحية المتزوجون لما "لينا" بتقول لـ"مسعود" : ااااه دي قلة حبنا
نخش ف يالموضوع على طول
القة
القلة كانت موجوده في كل بيت مصري
تلاقيها محطوطة على الشباك كده في صينية وواخدة البرستيج بتاعها يعني
وتلاقي الكل يشرب منها
الكبير قبل الصغير
طبعاً انا مش حفضل اتغزل في جمل القلة
لأ
انا ذكرت القلة علشان نفتكر كل حاجه قديمة وليها معنى في حياتنا
يمكن قلت قلة حبنا علشان هو ده اشهر تعبير ممكن تسمعة لما بتسمع كلمة قلة
الا اني ادرك تماما لماذا اختارت قلة
وما علاقتها بحبنا
لو فكرنا في شوية الحاجات القديمة اللي معظمنا معادش بيستعملها دلوقتي
القلة والزير
الطبلية مثلا
نلاقي ان الحاجات دي كنا بنتجمع حوليها
عملت شئ مشترك في الاسرة المصرية
عملتلنا ترابط اسرى
حييجي برضه الواد محمد بتاع التدوينة اللي فاتت يقولي ياعم انت ايه الكلام الكبير ده
ايه الليج اب الطبلية للترابط الاسري
اقوله ماشي
حفهمك
دلوقتي لما كنت بترجع من المدرسة تعبان زمان
وتلاقي بابا وماما مستنيينك وحتاكلوا مع بعض
نفرش الطبلية
نقعد مع بعض على الارض
وناكل مع بعض
كلمة هنا وكلمتين من هنا
فهم بابا انت ايه اللي حصلك
وفهم لو كان عندك مشكله
وقالك حكمة وانت قاعد
كل ده حصل في النص ساعة اللي بتاكل فيها
فهمت ماما انك مرهق مهو باين عليك وايدك تقيلة وانت بتاكل
تروح داعيالك دعوتين حلوين
وفي الاخر ادي الاسرة اتلمت مع بعض
مش حتلاقي حواجز في الاسرة دي
حتلاقي الكل مترابط
حتلاقي ابناء الاسرة دي طالعين كويسين
وبينهم ترابط اسري
يحنوا لقعدة الطبلية وكمان يفضلوا ياكلوا عليها لا يكبروا
والترابط الاسري ده يا جماعة اساس كل حاجه حلوة
يعني دور كده على واحد اخلاقة كويسة
حتلاقي عنده ترابط اسري من الاول
شوف ودور وحتلاقي الترابط الاسري ده الاساس
لكن على النقيض تماما
افتح التليفزيون
برنامج وراء القضبان واللا اي برنامج من اللي بيقرفونا بيهم دول
شوف بقا واسمع المجرم بيقول ايه
كانت الاسرة مفككه
الوالد انفصل عن الوالده
كان بيضربنا واحنا صغيرين
رمانا في الشارع
مكناش بنشوفه
مكانوش مهتميين بينا
وكل ده يا معلم بيصب في خانة واحده
تفكك اسري
طب ليه بقا طالما احنا عارفين ان التفكك الاسري ده بيحصل
يبقا ليه منأمنش نفسنا من الاول
ومنغميش عينينا ونقول لأ انا مش ممكن يحصلي كده
طب مهو حصل لغيرك وغيرك
يبقا لازم نكون حريصين على الترابط الاسري
الانسان الفرق بينه وبين غيره من المخلوقات
انه عنده تاريخ
الفار مثلا ممكن تموت 1000 فار بنفس المصيدة
علشانه معندوش تاريخ يتعلم منه ان المصيده بتموت
الا ان الانسان لأ
ده شاف اللي بيحصل للناس قبله واتعلم منهم
يبقا نرجع تاني للمهم
دوروا في تاريخكم
شوفوا ايه اللي ربنا جعله سبب انكم تكونوا كويسين
تكونوا عندكم اخلاق
يكون عندكم ترابط اسري
وطبقوه
وقولوا للناس كلها تطبقة
شوفتوا بقا القلة وصلتنا لفين
====================
على الهامش
لو كل واحد عزل علشان تحتيه واحده رقاصة
البلد كلها حتبات في الشارع
!!