Thursday, December 20, 2007

مش ناوي اتراجع خلاص معادش ينفع افرمل



كتير بيلفت انتباهي حاجات مختلفة
واربط بينها بشكل اغرب من وجهة نظري لكنه بيكون منطقي في وقتها
النهارده قعدت في البيت
اول يوم العيد معظمة في البيت
ودي حاجه محصلتش من فتره طوييييييلة اوي لدرجة اني بدأت استغرب من اني قاعد ومش بتنطط في كل مكان
النهارده شوفت فيلم تسجيلي عن الحج
ويوم عرفة
اكيد كلنا عارفين ان يوم عرفة بيتجمع الحجيج كلهم في مكان واحد في وقت واحد علشان ربنا سبحانه وتعالى الواحد
ومن شوية بتفرج على المشهد الاخير في فيلم النوم في العسل
اكيد عارفينه
ايوه بتاع المظاهره لما عادل امام جمع الشعب كلهم في هتاف واحد
ااااااااااااه
اكيد مستغرب ليه ذهني ربط بين الموقفين مع الاختلاف التام بينهم
ولكن فيه شئ واحد مشترك
ان هنا وهنا كان مجموعة كبيره من الناس بتعمل حاجه مشتركة
والفرق بينهم ان في الحج الناس بتروح من نفسها انما في الفيلم او المظاهره يعني الناس استنت لما عادل امام جه ومشي وقالهم ييجوا وراه
والغرض هو حل مشكله
طب ليه
ليه في مشكلاتنا دايماً بندور على حد يحلهالنا
ليه مش بنحاول نبدأ احنا وكل واحد فينا يكون عادل امام او القصد انه يقود وطبعاً لما يبدأ حيبدأ بنفسه
شوفناه في الفيلم جاهد وحاول وراح وجه ولما وصل للاخر ومعرفش
تحول لقائد جمع الناس كلها

وعرف
ليييييييييه بقا ؟؟؟؟
ليه كل واحد فينا مش بيحاول لوحده
ليه كل واحد مستني يروح الحج علشان ربنا يغفرلة ويخلص من مشاكله وهمومه
وليه كل واحد فينا مستني حد ياخده من ايده ويحل مشكلته
ليه في الكلية لما حصل واشتكيت دكتور
اللي وقف قصادي
زمايلي
زمايلي يا جماعة
ايوه يعني الطلبة
دكتور ظلمهم واشتكيته بواقع المسئوليه وهم اساسا اصغر مني
لقيتهم بكل خضوع وخنوع ورعب مهول مشوفتوش قبل كده
بيكذبوا شكوتي
وبيقولوا انه محصلش معاهم حاجه
ليه مطلعش منهم حد يقول لأ
او يصرخ ويقول ااااااااااااااااااااه
زمايلي الكبار الخريجين من الكلية مش مصدقين اني اشتكيت الدكتور ده
زمايلي في الكلية قليل اوي اوي اوي اللي ايدني
والمذهل
والمفاجأه
ان ادارة الكلية ايدتني ورجعت الحق لأصحابه
وبالرغم من ده
لسه نفس الطلبة مرعوبين
ولدرجة انهم المفروض يروحوا ياخدوا حاجات من الدكتور
خايفين يروحوا لحسن يسقطهم
اسقطوا بس متنضربوش على قفاكم

وده بإعتبار انه اصلا حيعمل كده


حيحصل ايه لو الواحد ضحي علشان الباقي
لكن لازم تكون لتضحيته نتيجة
ولازم يحصل فرق
ليه محتاجين حد يزقنا ؟؟؟
ليه مستغربين مني اني عملت كده ؟؟؟
مسئولية الناس فاكراها تطبيل وتصييت
طب مهي دي مصلحتكم
أي حد
كل حد
كل انساان في مصر
جربت تتحرك ؟؟!!

جربت تحاول ؟؟


جربت تكون ولو مره واحده ايجاااااااااابي

تخيل نفسك مطرحي
وليه
تخيل نفسك مطرح نفسك
صوتك بيمثل نفسك
واللا بيمثل حد تاني
طب انا صوتي بيمثل دلوقتي اكثر من 3500 انسان طالب مهندس
وانت صوتك بيمثل كام
مش شرط اكون مكانك او تكون مكاني علشان تحس بالمسئولية
ليه متتحركش وتغير نفسك ؟؟؟
ليه متاخدش قرارك ؟؟؟؟؟؟
وتتحرك وتقول انا مش حسكت طالما انت بتتكلم بأدبك وبإحترامك
ليه طالما فيه امل
مش بنبصله
*
ازاي اثبت ان فيه امل ؟؟؟
ازاي ؟؟؟؟
احنا مسلمين والمفروض نقتنع ونؤمن ان فيه امل
طب واللي مش مقتنع
نثبتله بإيه اكثر من اللي حصل
اللي ميعرفش هندسة بورسعيد يسأل وهو يعرف ان اللي حقوله ده يدي امل
معمل النت اتفتح للطلبة
الامتحانات اتغير هيكلها بالكامل
الامتحانات الطلاب بيحطوا جداولهم
مشاريع التخرج مشروعين من عندنا في مسابقة صنع في مصر وبجدية تامة
ومشروع في مسابقة الروبوكون وبدعم كامل من الجامعة لآخر مليم
اتمنع التدخين بقرار الكلية قبل ميتمنع بالقانون وتتغلظ عقوبته
اشتكيت دكتور
ورجع الحق لأصحابه
حنتحرك بقا واللا مش ناويين
حنتحرك بقا وبالذوق والادب ونطلب حقنا
واللا حنفضل نطاطي نطاطي ومنطلبش
اطرق كل باب
اسعي
ووعد مني
في اول يوم العيد
اني مش حتراجع
مهما كانت الظروف
ومهما كانت المقاومات
وحتي لو كلكم ضدي
مش حكون سلبي
مش حكون سلبي
مش حكون سلبي

حنطور
حننظم
حنشتغل
حنغير

في مجالي ومكاني وكليتي
حنتغير
وحنيجي في اخر السنه ونتحاسب
وحثبتلك بإذن الله
ان شاء الله
ان فيه امل
حتحط ايدك في ايدي
وتجرب
انا رافع الشعار ده طول عمري
وحفضل ارفعه
وياريت ترفعه انت كمان وانتي وكلنا
مش حكووووووووووووووووون سلبيييييييييييييييييييييييييييييييي
وحطلب حقي
ومش حيأس لحد مأخده

بإذن الله وحده

Monday, December 10, 2007

تيتانك في بورسعيد



ميت مسا ع الناس الكويسة

اشطة عليكو واحلا سلام على الجدعانين

اشطة

نبدأ بالصلاة على النبي

خير اللهم اجعله خير

انا كنت النهارده صاحي الساعة 8 ونص الصبح

نازل من بيتنا بردان سقعان في جو البرد الجميل ده

روحت الكلية وبقدرة قادر سافرت اسماعيلية وجيت

نزلت بلليل روحت دورة

وانا راجع

مش شايف ادامي

روحت ع المعدية قولت انزل بورفؤاد عشان اروح بيتنا يا جدع

الله مش برضه ارتاح واللا ايه برضك

المهم

طالع المعدية لقيتها بترفع الباب

روحت واخد بعضي وهوب جريت ونطيت نطة سوبر نتندو وسوبر مان وسوبر لوكس

و

خلاص ياعم لخص

يوووووووه طيب


طلعت المعدية ببص ياخوانا لقيتها زحمة

قولت اطلع اداااام يمكن الاقي حته فاضية

المهم

طلعت

لقيت ايه خير اللهم اجعله خير

باب المعدية الناس واقفة عليه

ودي عادة بقا بطلناها من زمن ولازم ماما سامية شرابي وماما نجوى وكل المهمهات اللي في الدنيا ينبهوا عليها علشان

العيال الصغيرين ميقفوش على باب المعدية لحسن العو يجيلهم بلليل

المهم

لقيت ايه بقا

حته بت اجنبية كده قاعده على باب المعدية تقولش قاعده على البحر

ولابسة شورت في عز البرد

وباب المعدية ده للي ميعرفش هو ارض المعدية برضه يعني مش بنقعد عليه يعني

المهم

لقيت جنبها واد كده برضه

طبعاً اجنبي مش شايفني بتكلم انجليزي واللا ايه

والواد واقف عمال يشخشخ بتاعة في ايده كده ويبص عليها تقولش بيلعب البخت

طبعاً انا متابع علشان لو حد احتاجني في اي مهارات لغوياتية اروح واعمل الواجب

منت عارفني احب ابعبر يعني

القصد

شويتين ولقيت البت بتقف

ايووون

بتقف

والشباب ابو العربيز

ابو العربيز دي جمع ابو العربي ياعم مش شايف لازم نزود از جمع

لقيت ابو العربيز بيبصوا واييييه يا معلم تقولش اول مره يشوفوا حد حران في البرد

شوية

ولقيت البت بتقرب من الواد

قولت عادي اخوها

شوية ولقيتها بتحضنه

بتقرب

والواد بيحضن

والشباب ابو العربيز كله رفع الانتنه

وصاحبكم باصص ومراقب

شوية والواد اتجرأ وافتكر نفسه جاك والبت افتكرت نفسها روز في فيلم تيتانك

على اساس ان المعدية تيتانك يعني

منتوا عارفينها

تيتانك 3 دي

ايووووووووون

لقيت الواد قرب وبيبوووووس

والشباب كل واحد فتح بقة على الاخر ومتنحين

واصلا الباب زي مأنتم عارفين طالع لفوق بقا والدنيا ايه في الطراوة وخلي الشعب يعيش

انا مصدقتش

قولت لأ بقاااااا

سألت اللي جنبي

ايوه اللي ملطوع ومتنح جنبي ده وقولتله

ايه ده هو بيبوس واللا ايه

رد عليا

بضحكة كلها ذكاااااء

هع هع هع اااااه

الدم غلي في عروق صاحبكم بالرغم من ان البرد كان مغطي المكان

وروحت طايح فيهم

انت ياااااض

يوه قصدي

اكسكيوز مي

لقيت الواد راح لاففلي وبرضه لسه حاضن البت

فضلت اقلب في حتتين الانجليزي

وفضلت اقول

اور تراديشنل

اور ترادشنل

تقولش كلنا بقا مليانين ترادشنال

القصد لقيت الجمله مش راضية تكمل

روحت قايلة ذات نوت اللاود هير ان بابلك بلاسيس

THAT NOT ALLOWED HERE IN PUPLIC PLACES

لقيت الواد تنفض وبعد البت

والاثنين في نفس واحد ياض

في نفس واحد

سوري

قولت ايه

مش عارف

بس عملت حركة هبله معناها ان ماشي محصلش حاجه

ورجعت

العيال تبصلي

وانا وشي احممممر

لا مش كزوف

اكيد فوران دم

واللا اقولكم كزوف

منا اصلي بتعلم انجليزي بقالي اكثر من 15 سنه علشان اجي اغلط في الموقف المنيل ده

القصد

فضلت محرج

والعيال ابو العربيز

اللي قولتلكم عليهم من الاول

عمالين يبصوا عليهم

وهات يا ضحك

المهم

والقصد


زي مقال عادل امام في الواد سيد الشغال

انت راجل محترم ازاي تسيب بنتك تتباس في بيتك


وأشطة عليكو

Tuesday, December 04, 2007

21



انا مش ححط تورته

مش ححط جاتوه ولا شمع


انا ححط زينه في البلاد

حقيم الافراح الف ليلة وليله

اضيئوا المصااااابيح

وافتحوا الابواااااااب

استلوا السيو.....لا انا كده دخلت في فيلم


من الاخر


انا بقا عندي 21 سنه يا جدعااااااااااان

حد يقولي ويعني ايه 21 سنه

حد يقولي

متقولولي


ايوه انت كويس ياللي قولت


واحد وعشرين سنه في الدنيا دي

يعني بقيت كبييييييييير

واحد ظريف يقولي لا يا شيخ


بص يا حلاوة

واحد زي حالاتي

بالنسبالي 21 سنه دي حاجه كبيره اوي


مبدأيا حقدر اقول واتكلم بخبره كده واحك ذقني واقول في العشرييييين سنه اللي فاتوا

ودي حاجه ممتعة اصلا

وبما اني حقول في العشرين سنه اللي فاتوا


حقول كتير

دخلت حضانه وانا عندي 4 سنين سنه 1990

دخلت روضة في مدرستي الحبيبة سنه 1991

اتخرجت بعد 12 سنه من مدرستي الحبيبة سنه 2003


دخلت كليتي (الحبيبة برضه) في بورفؤاد على فكره سنه 2003

بقيت عضو اتحاد طلاب سنه 2004

امين اللجنة الفنيه سنه 2005

امين اللجنة الثقافية سنه 2006

امين اتحاد الطلاب في كليتي كلية الهندسة الكفاءه بتاعتنا

ومحدش يقولي كفاءه ليه

سنه 2007


اخر 4 سنين في حياتي عملت حاجات كتيييييييييير اوي اعقد ان فيه بشر كتير معملوهاش


21

سنه يا جدعاااااااااااان


معادش حد حيقولي هات ولي امرك

:)

دلوقتي اروح البنك اعمل سحب

ده على اساس اني قاعد على تل الفلوس يعني


بقينا 21 سنه يا جدعان

21 سنه

ضحكت ولعبت وحزنت وفرحت

نجحت وشيلت

طلعت ونزلت

اتكلمت وسكت

شربت وعطشت

اكلت ونمت

وتربتت تت


:P

انا فرحان يا جماعة

اخيرا

ومن 46 دقيقة فاتوا

بقا عندي

21

سنه


هيييييييييييييييه

Thursday, October 25, 2007

واخذنا الاتحااااااااااااااااااد


السلام عليكم ورحمة الله وبركاته



ساعات كتير الواحد بيغيب عن المدونة اليومين دول

لظروف نفسية او لانشغال شديد بما ان الواحد في اخر ايامه في الكلية اهو وربنا يكرمنا ونخلص



لكن الاكيد ان فرحان دلوقتي

وحابب ان الناس كلها تشاركني فرحتي



زحل الفلكي

رئيس اتحاد طلبة كلية الهندسة ببورسعيد



اخيراً وبعد 4 سنين في انتخابات الاتحاد

من عضو اتحاد ثم امين لجنة فنية ثم امين لجنة ثقافية واخيراً في بكالوريوس

امين مساعد لجنة الاسر

وامين اتحاد الطلبة



دعواتكم ياجماعة ربنا يعيننا ياارب ونقدر نعمل حاجه كويسة



كمان ببارك لأختي العزيزه

فوكيره



علشان هي كمان تم انتخابها امين مساعد اللجنة الاجتماعية برضه في هندسة بورسعيد



الف الف الف مبروووووووك يا فوكيره



والناجح يرفعه ايده

هييييييييييه

Sunday, October 07, 2007

تاج..تاج .. تاج ما تاااااااج






تاج لذيذ جالي من زمان من الصديقة

Meekness !!!

يعني البئر والظمأ

يعني من انشط المدوناتية اليومين دول

واليومين اللي قبلهم كمان




لو قالولك اختار عصر من عصور مصرعلشان تعيش فيه تختار اى عصر و فى عهد اى حاكم .. واشمعنى؟



امممم

طبعاً كل عصر وليه حلاوته

وبرضه ليه قرفه يعني

بس اعتقد حختار العصر اللي كنا بنصنع فيه سلاحنا بنفسنا

مش بنستورده

زي عصر محمد على مثلا لما عمل مصانع علشان جيشه يبقا هو اللي مديله السلاح

ليه بقا

علشان لما انا اللي ابقا عامل سلاحي احاول بقا افتكس فيه تكنولوجيا متخليش حد يعرف يشوشر عليا او يستغل انه عارف قوة سلاحي بالتفصيل

وبكده يبقا سلاح اساسا



اول اولويه فى حياتك عيلتك ولا شغلك ولا اصحابك؟



المثالي انه يكون عائلتي ثم شغلي ثم اصحابي

بس اعتقد ان في اوقات كتير بيتلخبط الترتيب ده

بس في العاده بحاول اخليني على الترتيب المثالي



ايه اكتر حاجه بتحبها فى رمضان؟



بجد ليه طعم تاني

يعني بحس ن الدنيا اهدأ

يعني بمعنى تاني بتحس فعلا ان مفيش شياطين

وتلاقي الاقبال على الخير وده يدل ان الناس دي كانت شياطينهم لاهياهم

وبرضه نفس الكلام بالنسبالي

فأحلى حاجه في رمضان ان مفيش شياطين



اوصف ليا اجمل فطار ممكن تفطره ؟



فطار يكون بعد شغل شااااق

ويكون مع اصحابي

والحق الفطار متأخر بعد المدفع

والاقي الكباب والكفته بقا محطوطين كده

وياعيني على شوية التمر

احم احم انا حجوع واللا ايه

المهم اللمه دي في الفطار

بتكون جمييييييله جدا




لو انت حاكم على مجموعه من الافراد هتكون عادل؟؟ طب هتعمل ايه عشان تتأكد انك حاكم عادل؟



ححاول اكون عادل علشان العدل المطلق ده شئ اعتقد انه مش موجود في الارض في بني ادم دلوقتي

وعلشان اتأكد اذا كنت عادل واللا لأ حتبع سياسة الشورى

بحيث القرار يكون مع استشارة مجموعة من الناس الثقة وعليه احاول على قدر استطاعتي انه يكون حكم عادل



اللى بيبوظ الحكام .. نفسهم؟ ولا الشعب؟ ولا الحاشيه المقربه؟



الشعب عمره ميبوظ حاكم

الحاشية ممكن تبوظ الحاكم

وممكن هو نفسه يبوظ نفسه

وفي الغالب بتكون الحاشية اللي بتصورله ان كل شئ تمام وهو ياحيييني غلبااان ميعرفش حاجه وبيسمع منهم



مين أكتر اعلامي مصري بتحترمه؟



حمدي قنديل لما بشوف برنامجه بتكييف كده وبعمل دمااغ

منى الشاذلي برضه 10 على 10

عمرو اديب ده بقا اللي حكااااية

كتير المتميزين واللي عاملين شغل كويس

(تقولوش رئيس تحرير بيتكلم يا خواتي )






قريت ديوان عمر مصطفى صاحب بلوج تجربه " اسباب وجيهه للفرح" عن دار ملامح و لا لسه ؟؟ لو اه ايه رايك فيه؟



لا لسه للاسف




لو ممكن تشتغل شغلانه تانيه غير اللى انت بتشتغلها او كنت بتشتغلها كنت تتمنى تبقى ايه؟



انا لسه بدرس هندسه بس لو فيه شغلانه تانيه غير الهندسة كنت افضل ابقا مدرس رياضيات



ايه تانى بلد تتمنى تعيش فيها بعد مصر؟



مصر وبس ومهما كانت



اوصف ليا ترتيبات اجمل فرح ؟؟



ترتيبات اجمل فرح

عريس وعروسة عايزين بعض

ناس فرحانين لهم

فستن فرح هادي وبدلة العريس تكون بسيطة

وسمعني اجدع سلام



بس كده



اه اهم حاجه ميكونش فيه نيش في بيتهم علشان انا ضد النيش



بتراعي كلام الناس والقيل والقال؟ لو اه اولا قوللي ليه؟



اكيد طبعاً

علشان مفيش دخان من غير نار فلو حد قال عليا كلمه وحشة اكيد انا عملت حاجه ادت للموضوع ده



ولو كلمه طيبة برضه يبقا اكيد ربنا وفقني وعملت حاجه تخليه يقول كده

علشان كده براعي انه لما يكون كلمه وحشة اعرف ايه السبب علشان اعدله




صحيت من النوم ما لقيتش الموبايل ولا الكمبيوتر ولا الكاميرا الديجيتال ولقيتنا رجعنا لعصر الحمام الزاجل والحصنه هتكون سعيد؟



بقول لأصحابي اديني موبايل بخط مفتوح

وجهاز لابتوب فيه نت

واطلب مني اي حاجه



ومع ذلك

فمش حيضر انك تديني حصان سريع

وكذا حمامة زاجله لكذا مكان في الارض



اهي دي تسد عن دي واكيد حكون مبسوط على الاقل ايقاع الحياة حيبقا قليل



السعاده هى؟



رضا الله عنك



عندك أمل ؟؟ أسبابك ؟



اكيد عندي امل

الامل لا ينقطع ابداً

والسبب اني لو معنديش امل مش حقدر اعمل اي حجه ولا حيبقا عندي طاقة اني اتحرك واسعى

فلازم يكون عندي امل

وكل متتحرك للامام

الامل بيزيد

بجد



لما تحب تهرب من كل شئ بتروح فين؟



للاسف مش عارف اهرب من كل شئ




امتى أول مره خدت فيها نفس طويل كده وقلت بينك وبين نفسك يااااه الظاهر انا فعلا كبرت؟



لما بصيت على العيال الصغيرين ولقيتهم بيتكلموا في كرتووون وانا مش عارفة

بجد حسيت اني عجوووووز

وقررت اني اتابع الكارتون تاني وبرضه مقدرتش اجاريهم تاني زي زمان



بس برضه بتفرج على يوجي

:P



لما بتعمل عمل خيرى بيكون ايه هو دافعك الاول؟



نفسي ان ربنا يرزقني الاخلاص لوجهه الكريم




بتشرب سجاير؟ لو الاجابه اه ايه شعورك لو شفت ست بتشرب سجاير؟ وليه ؟



لااااااااااااااااااا مش بشرب خااالص

عدو السجائر هو انا

ولما بشوف ست بتدخن خصوصاً لو كانت ابسة ايشارب او اللي بنقول عليه حجاب يعني

بيكون شكلها مستفز ونفسي اقوم اقولها انتي كده مش بتأذي نفسك وبس لا بتأذي كمان اي جيل قادم بما انها هي اللي بتحمل وتخلف وده بيأثر على جسمها وبالتالي العيال حيطلعوا مزجانجية بقا وبايظين

:D:D



بس بجد منظرها بيكون مستفز



بتعرف ايدك اليمين من الشمال ازاي؟



يعني بالشبة

ايدي اليمين فيها حسنه في صباعي اللي في النص

:D



ايه اكتر اله موسيقيه بتحبها ؟



مش عارف بس مليش فيه اوي



فى رأيك ليه الذوق والنخوه اتعدموا؟



علشان الاهل مبقوش بيربوا

بقوا بيسمنوا ويأكلوا ويلبسوا بس ومش بيربوا



ايه الحاجه اللى لو حصلتلك تبقى سعيد قوى؟؟؟



نفسي اجيب امتياز في اي ماده

اي ماده مش حعترض بس اجيب فيها امتياز



تختار يبقى عندك...ارض زراعيه ولا اجنس عربيات و لا كام عماره و لا فلوس فى البنك؟؟؟؟



انا مش طماع

اختار الثلاثة

...



البحر و لا النيل؟؟؟



طبعاً قطعاً بدون شك

البحر

والبحر البورسعيدي كمان



مركب و لا طياره؟؟



من نظرتي لنفسي

اكيد الطيارة علشان في المركب دي حموت مخنوق علشان انا اعشق الانتقال بسرعة



مجنون و لا عاقل؟؟



معقول



تقرأ كتاب و لا تتفرج عليه فيلم؟



اقراه الاول

وبعدين اتفرج عليه فيلم



بتمرر التاج لمين؟؟؟



لكل الشعب المدوناتيه اللي على اليمين دووووول

اللي لسه موصلوش التاج

ييجي ياخده من هنااااااا





هيييييييييييه خلصت

Wednesday, September 26, 2007

علشـــــان الجااااامع

-السلام عليكم ورحمة الله وبركاته
-وعليكم السلام ورحمة الله وبركاته
-لو سمحت عايز كيلو تمر
-اتفضل .. 10 جنيه "مثلا يعني "
-عشرة جنيه ليه يا اخي ده علشان الناس في الجامع
- !!!!!!!
=======================================

نفس الحوار
-السلام عليكم ورحمة الله وبركاته
-وعليكم السلام ورحمة الله وبركاته
-لو سمحت اديني 100 كوباية بلاستك
- اتفضل ... 20 جنيه "مثلا برضه"
-عشرين جنيه ليه متساهم معانا ..اصل دول للجامع
- !!!!!!
=====================================
حوار ثالث
-السلام عليكم ورحمة الله وبركاته
-وعليكم السلام ورحمة الله وبركاته
- انا حعرض عليك عرض
-اتفضل
-انا حاخد منك حاجت للجامع ... وبكده ابقا انا اخذت ثواب اني انقلها للجامع .. وانت اخذت ثواب انك اتبرعت بيها للجامع
- !!!!
---------------------------------------------------------------------------
ايه رأيكم في ال 3 حوارات دي... نحاول نحط نفسنا مكان البياع اللي اكيد حيرفض انه يبيع الحاجه ببلاش
او بأقل من 1 على 10 من ثمنهاعلشان الجامع
وتلاقي لما البياع يرفض يطلع الراجل اللي عايز ياخد الحاجه "تبرع على قفا صاحب المحل " يطلع يقول
انت راجل ظااااااالم وربنا مش حيباركلك
طب افرض الراجل ده طلع فعلا زكاة ماله وتصدق.. طب لو هو ادالك الحاجه من غير فلوس مش حييجي غيرك وغيرك ..
طب حيبيع منين؟؟؟ راس ماله حيبقا ايه؟؟؟

وبعدين هو معنى انها للجامع يبقا لازم تطلع من غير فلوس

ليه بنفرض على الناس انهم يتبرعوا او بمعنى اصح بنتبرع على قفاهم
اعتقد ان الحاجه وحتى لو كانت للجامع نقول للبائع لو تحب تساهم معانا في كذا...
او عايزين كذا بسعر كويس علشان كذ...
امش يخش ياخد المحل وييجي يمشي ويقول
اصل ده للجامع

مع احترامي
بيت الله يستحق الافضل ولو كان تكلفته الالاف مش شوية جنيهات قليله
واللا انتم ايه رأيكم

Tuesday, September 11, 2007

زمــــان التعاملات الغبــــــكترونية

عمال اصحى وانام واقوم واتلكم واسمع
وكله عمال يقول الدولة الالكترونية
الحكومة الذكية
والقرية الذكية
والسيارة الذكيه
وحتى الاجهزة الذكيه
كل ده ومحدش قال العقول الانسانية الذكية
المهم
اللي اتعودنا عليه
ان حكومتنا وبلدنا بقت بلد الكترونية
اه والله
حتى التنسيق بقا الكتروني
تخيل حياتك
انت بتصحي الصبح عن طريق ضبط جهازك المحمول (الالكتروني
ولما تصحي تقوم وتاخد دش بالسخان اللي بيشتغل (الكتروني
وبعد متخلص وتتوضي وتصلي على سجاده معمولة بمكنة (الكترونية
وتقوم تلبس هدومك
وساعتك (الالكترونية
وتفتح جهاز الكمبيوتر (الالكتروني ) على السريع
علشان تبص على البريد (الالكتروني) وممكن كمان تحب تشوف رصيدك في بنك
واللا تدفع بالبطاقات (الالكترونية) واللا حتى تلعبلك دور سوليتير ع الصبح
منتا بتبص لشاشة الكمبيوتر (الالكترونية
تنزل الشارع تلاقي الاشارة (الالكترونية ) عطلانه
تستحمل لحد ميشتغل العسكري بطريقة (الكترونية ) ويفتح الطريق علشان تعدي
وانت ماشي تلاقي واحد مشغل سي دي في العربية وبيشغلها ويجريها بالريموت كونترول (الالكتروني
وتروح الشغل تشغل التكييف واللا المروحة الكهربائية (مهي الكهرباء الكترونات برضه ) وبعدين
تشتغل تشتغل
ويجيلك واحد
تقوله يا استاذ مش بنتعامل هنا الا بالبطاقة (الالكترونية) او زي مبيقولوا عليها البطاقة الكمبيوتر
وهنا بقا المشكله
في البطاقة
من فتره سمعنا انه سيتم الغاء البطاقة الورقية
ومن يحمل بطاقة ورقية مش حيعرف يعمل حاجه
منتوا شايفين اهو
الحكومة كلها والدنيا ماشية الكتروني
ويخزن معلوماتك على البار كود اللي على قفا البطاقة
ولكن بسبب ذكائنا الشديد
والالكتروني ايضاً
مفيش اجهزة تقرأ البطاقات
وفي الاخر
تروح تخلص ورق الجيش
النهارده
علشان والدي الله يرحمه وانا وحيد وعايز اخد الاعفاء
يقولي بكل هدوء
الراجل الالكتروني
فين بطاقة والدك
الورقــــــــــــــــية
طب اقوله ايه
!!!!!!
انسان غير الكتروني صحيح
----------------------------------
على فكره كل اللي رايح يخلص الجيش لازم يقول لأبوه يروح يعمل بطاقة ورق لحسن شغل التجنيد محتاج بطاقة ورق
وسلملي على المهلبية
اه اللي معمولة في المطبقية
الالكترونية

Saturday, September 08, 2007

القـــــــــاهرة

القــــــاهرة
مكثت وقتاً بالقاهره
عاصمتنا العامره
رأيت اوجه كادحة
وركبت انعش طائره
سمعت هدير ابنائها
ومشيت تحت الحارقة
صادفت في ارجائها
قدراً .. صديقاً فاغراً
فاه ..ليس الا دهشة
عجباً لقاك بالقاهره
وآه يوم رأيتها
قمراً ضياؤه شاهره
خيوط ضوءٍ فضةٍ
وحسن وجة ..باهره
اخبرتني بحبها ..بعشقها
في وقت صمت القاهره
فسمعت عذب لحنها
واخبرتني وهي الساحره
عن نبض قلبي نحوها
بتلك الشفاه القادره
همست الىَ شفاهها
ادنو .. ببسمه ساحره
وفي وقت ظهرت اسنانها
لؤلؤ .. جواهر متناثره
وسرت معها فترةً
تسير كلملكة آمره
وتركت قلبي عندها
وجبت ارض القاهره
اخبر وجوهاً انها
عيني ..لازالت ساهره
تحلم بوقت لقائها
وتحلم بيوم بالقاهره
!!!
------------------
دعواتكم لجدتي بالرحمة والمغفره
اللهم ارحمها واسكنها فسيح جناتك
------------------
منتظر تعليقكم على الخاطره

Tuesday, August 28, 2007

انا في القاهره ....اه والله من اكثر من اسبوع




القاهره

قاهره المعز زماااان

وقاهره الكل اليوم

مدينة قال عنها ابراهيم معايا لم تسمى عبثاً قاهره

انا في القاهره لدورتين تدريبيتين

بقالي اسبوع

ولسه اكثر من اسبوع ان شاء الله

نفسي اعمل كل حاجه

عملت كتير

ولسه كتير

اول الحاجات اني كسرت الحاجز اللي بيني وبين القاهره

اصبحت المواصلات مألوفة

الاتوبيسات والميني باصات والمترو وحتى الموتورجل اصبح مألوف

وازاي لا

منا باخدها من فيصل اتمشي لشارع الهرم اركب رمسيس انزل في الاسعاف اخد كورس عند دار القضاء

الساعة 1

واجري الساعة 5 من الكورس ده علشان اركب تاني عباسية علشان الحق الكورس التاني في عبده باشا

اخلص على 8 ونص اجري الحق المغرب

وارجع تاني للهرم

بقت مألوفة خالص خصوصاً لما اروح جنينه مول وامشي من جنينه مول لنادي السكة

القاهره

عملت كتير

ولسه عايز اعمل اكثر

يارب اقدر اشوفكم في القاهره

دعواتكم

-------------------

الحمد لله انفرجت الازمة السابقة ووصل الصاروخ مكانه ونزل ركابة على ارض فضاءهم الواسع



وسلامتك يا قاهره

Thursday, August 23, 2007

3--2--1---GO





حاولت ان ابطئ اشعال الصاروخ
واستطعت ان اؤخر اشعال فتيله

ونجحت ان اعطل اشعاله


لكـــــــن

الان

وبعد ان اشتعل

أأمل ان تعرف

انك من اشعله ولست انا


انطلق الصاروخ ولا مجال للتراجع الان

-------------------------

سبق السيف العذل ايها المقداااام

وان كنت اتمنى ان يظل هناك وقت للعذل

...........

!!!!!!!!

Wednesday, August 15, 2007

اتأخرت بس تفتكروا اني اتأخرت !!

السلام عليكم ورحمة الله وبركاته
ازيكم يا جماعة
اخباركم ايه


اولا بشكر كل واحد علق عندي في الفتره اللي فاتت اللي عارف اني قصرت فيها وبعدت لفترات كبيره لكن
المشكله كبيره وكل ميمر الوقت تكبر المشكله
دعواتكم ان ربنا يظهر الحق
سواء كان الحق ليا
او عليا
لكن المهم يظهر الحق وخلاص
---------------------------------------

بعد جو الاكتئاب اللي قولنا عليه ده لازم اتكلم عن اكبر نجاح حصل
معايا الفتره اللي فاتت بالرغم من المشكله العويصة اوي للي بتمنى من ربنا انه يكرمني فيها ويظهر الحق



طلعت النتيجة اخيراً

واتعلقت

وشوفت بعيني محدش قالي الحمد لله اخيراً

عديت ناجح ومنقول لبكالوريوس وحنخلص بقا ان شاء الله وتقديرات كمان كويسة اوي

ان لله لا يضيع اجر من احسن عملا


صدق الله العظيم

احمدك يارب على النعمة دي بجد

فاكرين لما قولتلكم اني نسيت الاله الحاسبة في الامتحان في بوست قديم

بفضل الله الماده دي ربنا كرمني فيها اخر كرم وجيبت فيها جيد جدا بالرغم ان تقديرات التيرم الاول كله مقبول

فكان العكس بفضل الله في التيرم التاني ماده واحده بس مقبول وعقبال عندكم

--------------------------------------
النجاح الاخير كان يوم الجمعة اللي فاتت
يوم 15 دقيقة بره الدايره
الفكره خرجت من هنا
من عقل بورسعيد
خرجت لعمل ندوات بشكل مختلف
يتلخص ان اللي حيقف على المسرح مش حيتكلم اكثر من 15 دقيقة
وكانت البداية بمكتبة مبارك بورسعيد
اكثر من 150 حضور
المسرح ممتلئ عن اخره
يوم ناجح وفي زمن قياسي وهو ساعة ونصف فقط
خرجنا منه في قمة السعاده
وكان موضوع اليوم هو
بره الدايره
المعني المقصود هنا هو التغيير
ايه اللي لازم يتغير جوانا
وايه العادات اللي لازم نغيرها
وازاي
بجد كان تفاعل الحضور رائع
انا شخصياً اتكلمت عن الاشاعات
وعن النيش او دولاب السفره يعني
واتكلمت عن التنجيد ودي عاده منتشره في بورسعيد ان بيتعمل شادر او صوان كده ويتعمل فيه التنجيد ويجيبوا دي جي بقا وتبقا هيصة
المهم ان اليوم رد الفعل على الناس خلان نفكر كتير ازاي نستغل طاقة كل واحد حابب يشارك
عملنا استمارات اشتراك في فريق اليوم
فتحنا الباب ان كل الناس تشارك
كل الناس تشتغل
كل الناس تعمل اللي تحبه ونستوعب طاقاتهم في عمل مفيد
بجد كان يوم حلو
مش عارف اقولكم على قدر الفرحة اللي جوايا بسبب اليوم ده
ولكن اسيبلكم كام صورة تشوفوا تأثير اليوم على الناس وتشوفوا كمية المشاركين

ده انا

ستورم 13 او احمد نبيل صاحب مدونة افتكاسات استورميه


دكتور زيفاجو او احمد شلبي صاحب مدونة هيستريا

مجموعة المشاركين توسطهم نهي صحبة حواديت روزاليا

مجموعة المشاركين بالكامل تنظيم واشتراك واعداد

دعواتكم

Friday, August 03, 2007

عـــــــشان مصــــــــــــــــــر

جمله غريبة معنتش بسمعها خالص اليومين دول
لدرجة اني نسيتها اساسا
لحد مفي يوم من الايام سمعت الحوار ده
السائق: وحضرتك بتعمل كل ده ليه يا استاذ....؟
الراكب : علشان مصر
!!!!
السائق: يعني حضرتك بتحب مصر
الراكب : طبعاً بحب مصر
السائق : يعني مستعد تضحي بحياتك علشانها
الراكب : طبعاً
حوار كان عابر
لكن تخيلوا الموضوع ده لفت انتباهي جداً
من زمااان مسمعتش الكلمة دي
مسمعتش واحد يقول انا بعمل حاجه علشان مصر
اللي يقول علشان اتجوز بشتغل
واللي يقول علشان اربي العيال بشتغل
واللي يقول علشان خاطر والدتي بعمل كذا
واللي يقول علشان وعلشان وعلشان
لكن مصر
كتير معنتش بسمع الكلمة دي
زمان كنت بسمع في مسلسل رأفت الهجان
اللي اتربيت عليه هو ودموع في عيون وقحة
شعبان يقول لعبد العزيز
يقوله مصر هي اللي دافعة يا رأفت
تلاقيه اتأثر
ويقوله انا رقبتي سداده
-------------------------------------------
مين فينا حيقول لمصر انا رقبتي سدادة
مين فينا حيدور على مصلحة مصر
يعمل حاجه تفيد ابناء مصر
يعمل شغله بإتقان وميقبضش رشاوي علشان مصر
يحرق نفسه شغل علشان مصر واهل مصر
مين فينا لما يسأله حد ويقوله بتعمل ده ليه
يقوله علشان مصر ؟؟

Saturday, July 21, 2007

مرجان بيرشي مورجااااااااان



النهارده

وعلى غير العادة

ومن باب كسر روتين الحياه

اتصل بيا صديقي وقالي ايه نظامك النهارده

قولتله شغااال

قالي ليك في سينما

قولتله داخلين ايه

قالي مرجان

قولتله قشطة معاكم


على السريع اتصل بيا بعد العصر واتفقنا على النزول 7 ونص

على7 وثلث كنت في الشارع

اخذنا العربية

وعلى السينما

حجزنا 4 تذاكر

محدش يقولي كل واحد فيكم عزم التاني

لا يا باشا كنا 4 افراد يعني


المهم

روحنا شوفنا ماتش الاهلي

وينفخ في صورتك يا اهلي

وربنا يرحمك يا حضري كنت راجل طيب قبل الركبة اللي كلتها في وشك


المهم

بعد الماتش شوية تمشية وبعدين

ع السينما

مناظر غريبة بتدخل السنما الواحد اتحول

بسرعة النور الطفا

ايون الكهرباء قطعت

انا قولت كده برضه

لكن لحسن الحظ

الفيلم بدأ وطلع النور اطفأ علشان الفيلم


ملحوظة :انا بهرج يعني علشان اصحاب الدماغ العالية محدش يقول عليا محدث


المهم بدأ الفيلم بمشهد طويل

ملخصه ان عادل امام يرشي الموظف اللي جاي عليه تفتيش

واللي بيقبض 3000 جنيه في الشهر

يرشيه ب 200 الف جنيه

وخارج يشكر في شركته


وتتوالى المواقف والاحداث

ليرشي شاعر

ودكتور

ورئيس جامعة

وحكم

وحارس مرمي

وكان عايز يرشي العارضة كمان

ويرشي طالب التيار الاسلامي

و و و و و


والسر في الشاي بالياسمين

واللي راح الفيلم حيعرف


يعالج الفيلم بسياسة عجيبة ساخره موضوع الرشوة

ويظهر عادل امام في الموقف الصحيح اللي بيعمله انه ميرضاش ان بنته تبقا متصاحبه وتهريج في الجامعة

وميرضاش ان ابنه ياخد بنت على ترابيزه وهو اصلا بيبوسها قبل ميقعد

يبقا هو جاهل

وده عادي


الدنيا كلها طول الفيلم بتترشي

الى ان قالت ميرفت هانم امين مع اعتراضي الكامل على ادائها لمشاهد كتير في الفيلم

لكن تقوله مصر فيها 72 مليون لو رشيتهم كلهم حبقا انا اخر واحده

علشان يرد عليها بالرد اللذيذ

مهو كلهم قبضوا مافضلش غيرك


كله بيرتشي في الفيلم

وطبعاً تتوالى الحكم من فم عادل امام لما يقول لازم تظبط من فوق ومن تحت

علشان لو اللي فوق سابوك

اللي تحت يلقفوك

ولو اللي تحت سابوك

اللي فوق يساعدوك


ورشوة وتزوير في الانتخابات

وكلام في الهجايص في مجلس الشعب

كمية يأس واحباط محطوطين في الفيلم بشكل ساخر

احيي الكاتب العبقري يوسف معاطي عليها

لكني اختلف معاه في كثير من المواقف اللي في الاخر تظهر ان ولاده

اللي مقضيينها دول

وبيقولوا لأبوهم انه ميشرفهمش

مطلعين ده عادي وانه حوار ديمقراطي

وال ايه لما زعقوله وضربهم

هو اللي راح يتأسفلهم


وفي اخر الفيلم الخير بينتصر بقا على الشر ويطلع مرجان يتعلم وياخد الشهادة

وكله يبقا في الكليتش


راجل راشي

والناس كلها بترتشي

وفي الاخر يعيش في تبات ونبات ويخلف صبيان وبنات


كلام فيه كتير صح

بس برضه منطق مغلوط منعالجش اي خطأ بخطأ


وموووورجان احمد مورجاااان


الواد هيثم الكووووول ده ملوش حل

اه هيثم اسمه في الفيلم


وشهيصني وانا ارسيك على الحوار

وعايز اعرف ايه شهيصاتكم على الحوار ده


منش برضه لسه فيه ناس مش بترتشي واللا انا بيتهيألي


------------------------------------------------

على الهامش

والمواصلاااااااات فاضييييااااااااااه

والشقق كتييييييييره

وكل شوية تقولولنا فكوا الحزام فكوا الحزام

تعيش الحكومة

يعيش احمد عرابي

ويعيش محمد على كلاي

ومحمد الكحلاوي

وتحيا الوحده العربية


وشهيصني وانا ارسيك على الحوار