النهارده
وعلى غير العادة
ومن باب كسر روتين الحياه
اتصل بيا صديقي وقالي ايه نظامك النهارده
قولتله شغااال
قالي ليك في سينما
قولتله داخلين ايه
قالي مرجان
قولتله قشطة معاكم
على السريع اتصل بيا بعد العصر واتفقنا على النزول 7 ونص
على7 وثلث كنت في الشارع
اخذنا العربية
وعلى السينما
حجزنا 4 تذاكر
محدش يقولي كل واحد فيكم عزم التاني
لا يا باشا كنا 4 افراد يعني
المهم
روحنا شوفنا ماتش الاهلي
وينفخ في صورتك يا اهلي
وربنا يرحمك يا حضري كنت راجل طيب قبل الركبة اللي كلتها في وشك
المهم
بعد الماتش شوية تمشية وبعدين
ع السينما
مناظر غريبة بتدخل السنما الواحد اتحول
بسرعة النور الطفا
ايون الكهرباء قطعت
انا قولت كده برضه
لكن لحسن الحظ
الفيلم بدأ وطلع النور اطفأ علشان الفيلم
ملحوظة :انا بهرج يعني علشان اصحاب الدماغ العالية محدش يقول عليا محدث
المهم بدأ الفيلم بمشهد طويل
ملخصه ان عادل امام يرشي الموظف اللي جاي عليه تفتيش
واللي بيقبض 3000 جنيه في الشهر
يرشيه ب 200 الف جنيه
وخارج يشكر في شركته
وتتوالى المواقف والاحداث
ليرشي شاعر
ودكتور
ورئيس جامعة
وحكم
وحارس مرمي
وكان عايز يرشي العارضة كمان
ويرشي طالب التيار الاسلامي
و و و و و
والسر في الشاي بالياسمين
واللي راح الفيلم حيعرف
يعالج الفيلم بسياسة عجيبة ساخره موضوع الرشوة
ويظهر عادل امام في الموقف الصحيح اللي بيعمله انه ميرضاش ان بنته تبقا متصاحبه وتهريج في الجامعة
وميرضاش ان ابنه ياخد بنت على ترابيزه وهو اصلا بيبوسها قبل ميقعد
يبقا هو جاهل
وده عادي
الدنيا كلها طول الفيلم بتترشي
الى ان قالت ميرفت هانم امين مع اعتراضي الكامل على ادائها لمشاهد كتير في الفيلم
لكن تقوله مصر فيها 72 مليون لو رشيتهم كلهم حبقا انا اخر واحده
علشان يرد عليها بالرد اللذيذ
مهو كلهم قبضوا مافضلش غيرك
كله بيرتشي في الفيلم
وطبعاً تتوالى الحكم من فم عادل امام لما يقول لازم تظبط من فوق ومن تحت
علشان لو اللي فوق سابوك
اللي تحت يلقفوك
ولو اللي تحت سابوك
اللي فوق يساعدوك
ورشوة وتزوير في الانتخابات
وكلام في الهجايص في مجلس الشعب
كمية يأس واحباط محطوطين في الفيلم بشكل ساخر
احيي الكاتب العبقري يوسف معاطي عليها
لكني اختلف معاه في كثير من المواقف اللي في الاخر تظهر ان ولاده
اللي مقضيينها دول
وبيقولوا لأبوهم انه ميشرفهمش
مطلعين ده عادي وانه حوار ديمقراطي
وال ايه لما زعقوله وضربهم
هو اللي راح يتأسفلهم
وفي اخر الفيلم الخير بينتصر بقا على الشر ويطلع مرجان يتعلم وياخد الشهادة
وكله يبقا في الكليتش
راجل راشي
والناس كلها بترتشي
وفي الاخر يعيش في تبات ونبات ويخلف صبيان وبنات
كلام فيه كتير صح
بس برضه منطق مغلوط منعالجش اي خطأ بخطأ
وموووورجان احمد مورجاااان
الواد هيثم الكووووول ده ملوش حل
اه هيثم اسمه في الفيلم
وشهيصني وانا ارسيك على الحوار
وعايز اعرف ايه شهيصاتكم على الحوار ده
منش برضه لسه فيه ناس مش بترتشي واللا انا بيتهيألي
------------------------------------------------
على الهامش
والمواصلاااااااات فاضييييااااااااااه
والشقق كتييييييييره
وكل شوية تقولولنا فكوا الحزام فكوا الحزام
تعيش الحكومة
يعيش احمد عرابي
ويعيش محمد على كلاي
ومحمد الكحلاوي
وتحيا الوحده العربية
وشهيصني وانا ارسيك على الحوار
21 comments:
حمد الله علي السلامه يازحل
اخبارك ايه
ربنا يكون في عونك
بس يامحمدانت كدا حرقتلنا الفيلم يعني انا كنت عايزه ادخله
اعمل فيك ايه دلوقتي
منرفزنيش غير انها اتجوزته فى الآخر فين بقى المبادىء الى عايشه فيها من أول الفلم ديه
وبعدين هو شاطر فى حاجه غير انه يشتم ويتريق على المسلمين
يالا المهم حمدلله على سلامه
وبلاش كل التأخير دا تانى
سلام:)
كورتي
الله يسلمك يارب
الحمد لله انا تمام مضغوطين شوية لكن بفضل الله تمام
حرقته وكويس اني حرقته والله يا كورتي
انا اتضايفت فيه من حاجات خليتني ندمت اني دخلته
------------------------------
واحده من الناس
تعرفي
انتي قولتي اللي انا عايز اقوله بالظبط
مش فالح غير انه يتريق على المسلمين
وال ايه يقول لحسن يطلع مش عارف كام واحد حج ويطعم كام مسكين
لا حول ولا قوة الا بالله العلي العظيم
ربنا يهديه يارب
ويرحم نفسه من البوس اللي عمال في كل افلامه ده ويهدي ميرفت امين دي برضه
ده سن تعمل فيه بوس الواوا
:D
ههههههههههههههههههههههههههههههه
عرض وافى وكافى لفيلم انا ماكنتش عاوزه اشوفه خالص
انا باحترم يوسف معاطى بس زهقت من اداء عادل امام
ماعلينا
ماهو المثل بيقول ظرفنى تعرفى وإذا اردت ان تنجز فعليك بالونجز
دى سياسه ياعم
بس ايه موضوع الماتش ده بقى؟؟
هى دى مصر
هى دى مصر
هى دى مصر
ياريتنى كنت اعرف مورجان
انا مشوفتش الفيلم ...بصراحه بقى
عادل امام بينرفزنى
والفيلم شكله يعنى .... فى السلنكتيه
الا ايه هى الكلمه المكتوبه تحت دى
الله يكرمك يابنى احسن مش فاهماها؟
سلامات يا محمد ومطقتعش الجوبات
حفلة أيامنا الحلوه يوم 27 يوليو الساعه 8:30 فى ساقية الصاوى
اكبر تجمع بلوجرى اوعى يفوتكو
Blogger Radio Station
انا بصراحة مشفتش الفيلم وكنت ناوية ادخله
بس انت غيرت رايي خالص يا نوفا
بس عامة دي حاجة المفروض ان احنا متعودين عليها من عادل امام على طووول يطلع في الناس القطط الفطسةويطلع هو المصلح الاجتماعي
واهم حاجة لازم يبقى راصص البنات حواليه في الفيلم ولازم كمان يدي كام واحد بالقلم
تقريبا هي عقة نقص او حاجة
بس انا اللي مزعلني في الموضوع يوسف معاطي رغم اني بحب كتابته بس اتضايقت منه اوي لما مرفت امين مرضتش تعمل المشهد بتاع هيفا وهو اصر عليه كان القيلم هيبوظ من غير المشهد ده يعني
ايه كل الكلام الكتير اللي انا كاتباه ده ....معلش صدعتكوا
السلام عليكم ورحمة الله وبركاته
لسه ما روحتش الفيلم سينيما بس شوفته في نسخه تعبانه كده علي النت
بصراحه عادل امام ده احسن له انه يعتزل بقي ويريحنا ، لما لقي انه خلاص بقي ورقه خسرانه حاول انه يجمع حواليه مجموعه من الشباب اللي يقدر بيهم يساير الموجه ويمثل افلام زي بتاع الشباب اللي ماشيه اليومين دول
ومش عارفه هايبطل امتي بقي كل قلة الادب اللي بيعملها في افلامه دي
ومهاجمته للمسلمين وللجماعات المسلمه عمال علي بطال
والست مرفت امين واللي هي عاملاه ده ، هي لو ليها كلمه اصلا كانت اتمسكت برفض اداء الاغنيه وما رضختش ليوسف معاطي ، بس اكيد خافت لا السبوبه تروح منها خصوصا انها صدت من كتر الركنه في البيت
يلا ربنا يهدي
تحياتي
عامة أفلام عادل إمام أنا مش باحبها لازم يعنى يطلع الواد الصايع اللى مقطع السمكة و ديلها بس بيعلم الولاد الصغيرين معانى الأدب و الاحترام ... و فى الآخر الست اللى ماكنتش طايقاه طول الفيلم لازم تعجب بيه و تتجوزه ... أنا ما شفتش الفيلم و مش عايزة أشوفه بصراحة ... لإنى كمان بابح يوسف معاطى و باتضايق كل ما يكتب حاجة لعادل إمام
وينكي
انا شوفت الفيلم
ومشكلته انه بيعرض المشاكل على بعض
قرفت من حجم المشاكل اللي معروضة اللي بتضايق الواحد مره واحده كده
ومصر مش كده
الماتش ده بقا كان ماتش اهلي في بطولة افريقيا
-------------------------------
شيماء
لا مش هي دي مصر
واللي بيتكلم عنه ده بيحصل اه
لكن مينفعش نكدسة بالشكل ده ابداً
:(
----------------------------
وينكي ومنذر بإذن الله حزور مدوناتكم قريب اوي دعواتكم
ايه زحل
متروق الجي وكبر الدي
بصراحة عادل امام مقدم الفيلم من اول لقطة لاخر لقطة وهو بيتعامل بالرشوة بصورة مبالغ فيها جدااا
واكتر حاجة سيئة
هي صورة التيار الاسلامي .. اللي دايما بيصورها عادل امام في افلامه
انه مجرد رجل عنده لحيه كل همه يا البنات يا الفلوس
الفيلم كان بعيد كل البعد عن المنطق
ومن الاخر يشل
ايييييييه حد يشرب شاي بالياسمين
:)
زحل باشا..
بعد السلامات و التحيات..
أحب اقولك رايى المخالف لرأى حضراتكو كلكو :)
أنا عجبنى الفيلم. أيوة و عجبنى جدا كمان.
أولا الفيلم فيه فكرة مختلفه عنم هبل أفلام الصيف اللى لا قصةولا مناظر. و عندك كركر و عندليب الدقى و عايزانى اخس أخس و ممكن تقارن براحتك و ممكن توزن برة.
ثانيا بقى أنا مش شايفه ان عادل إمام كان مبالغ ف الرشوى لأن الدنيا ماشية كده فعلا احنا مش ف يوتوبيا و لو كان فيها شويه مبالغه صغيرين ف ده يبقى من وحى خيال المؤلف عشان يؤكد الفكرة و ده مقبول و مش عيب.
و بالرغم من ان مرجان ادى كل الناس رشاوى ف الفيلم و فشل ف انه يرشى عارضة الجون أنا مكرهتوش. عارف ليه.؟؟
لما قالها يا دكتورة انا حاسس بالناس دى ناس غلبانة انتى بتقبضى بالدولار و مش حاسه بيهم.
عارف يمكن مكرهتوش ليه؟؟ عشان لحد اخر وقت كنت بحس انه اب كويس و حنين مع أولاده و بيحاول يقنعهم أو ينفذ طلباتهم بس بطريقته و ده ف صالحه.
المهم انا عجبنى الفيلم بالرغم من انه مليان أحداث بس فكرته حلوة بتبين حال الدنيا الايام دى و الكام سنه الجايين, ابقى قوللى رايك
زحل باشا
أنا دعكت عنيا و مش مصدق .... زحل رجع يا جدعان
حمد الله على السلامه
بص يا سيدي الفيلم حلو ... بس مش موضوع الرشوه هوه إللي ينرفز .... الحته بتاعه التيار الإسلامي عك فيها عك جامد قوي
بخلاف أساسا أن الفيلم ممكن تحسه مجموعه مشاهد لزقينها في بعض ... مفيش ترابط
سلااااااااااام
انا برضه دخلت الفيلم
ومش عاجبني الجزؤء اللي العيال بيقولوا فيه ان ابوهم مش يشرفهم
وكان هاين عليا ارقع البت بالجزمة مش بالقلم
واكتر موقف برضه غاظني لما بيصلي ويدعي
ويطعم المساكين ويطلعهم للحج
يا سيدي اهي اي حاجة تضحك وخلاص
الجمله دي سمعتها واحنا خارجين من السينما
بغض النظر بقي عن اللي بيتعرض
خربوشة
بالظبط كده
نفسي يعمل معالجة سليمة
يعني يعالج من غير ميطلع هو شخص منحل اخلاقياً اساسا
ومن غير ميهاجم الاسلاميين في الجامعة بالشكل المقرف ده
لو شايف ليهم سلبيه قولها
لكن اكيد يعني مش حيزغردولة في الجامع زي مفي الفيلم !!
-------------------------------
خمسة فضفضة
ايوه انتي كده فضفضتي
زي مأنا برضه فضفضت
:)
---------------------
بيقولوا سايكو
بالفعل هو سيناريو مكرر لنفس نظام افلام عادل امام
لكن نسيتي حاجه
ان البطلة بتفضل تبوس فيه كتير اوي اخر الفيلم
كتير اوي يعني
!!!!!
----------------------
عبير
اولا اهلا بيكي في مدونتي في اول تشريف ليكي بالرد
ثانياً المفروض اكبر الدي واروق الجي
بس مش عارف
يمكن علشان انا كنت في فتره ضغط جامد من مشاوير وشغلانات كتير كده
فروحت علشان اروق الجي واعلى الدي والاكس والواي والزي كمان
لكن لقيت الفيلم كده فضايقني بزياده وصعب عليا الوقت اللي ضاع فيه
والشاي بالياسمين اختراع اعتقد اننا حنبدأ نسمعه قريب في المصالح بدل اهرش والكلام اللي يحسسك بالحساسية دي
:D:D:D:D
وحسبي الله ونعم الوكيل
كوين هانم
ازيك واخبارك ايه الاول
متفق معاكي في الجزئيات اللي قولتيها وهو ممكن يظهر الرشوة بشكل مبالغ فيه وده حق الكاتب ويعالج لموضوع ده بالطريقة اللي تعجبة
وبرضه موضوع انه حنين مع اولاده ده برضه كويس
لكن اللي ضايقني انه فضل يزود في المشاكل المحيطة ويعالج المشاكل كلها في ان واحد
وياريته بيعالجها هو بيظهرها بشكل مستفز
يعني
1-الرشوة
2-التزوير
3-نواب مجلس الشعب المنافين
4-مشاكل الشباب الضايع اللي معاه فلوس ومش عارف يعمل فيها ايه
5-دكاتره الجامعة الوحشين
ومش فاكر ايه تاني بس حسيت بكميه مشاكل جامده وده مش حلو
وكمان المشكله انه بيتكلم عن المتدينين بإسلوب زفت
ميصحش نعمل كده الا لو اظهرنا الحلو برضه
يعني هو اظهر بتوع التيار الاسلامي انهم وحشين
لنفترض انهم فيهم وحشين فعلا علشان مفيش حد كويس على طول
لكن المفروض تظهر الحلو بقا في الموضوع ان فيهم ناس كويسين
لكن تظهر الوحش بس ده مش كويس وغير مقبول طالما انت اظهرت اولادك انهم كويسين كثقافة لكن وحشين كأخلاق مع ابوهم
يبقا المفروض زي العادي متظهر فيه الحلو والوحش يبقا يجب نظهر الحلو برضه في الشباب دول مش نهاجمهم طول الوقت
كده باشا
منووووور
اخبارك ايه
اه انا رجعت على فترات كده علشان اول مبلقي فرصه بدخل
اخبارك ايه
زب مبتقول هو كان ممكن الرشوة تتعالج هي اينعم شكلها مستفز لكن شوية شوية نشيلها او نركز عليها هي بس
لكن نفتح في كل الجبهات دي مش حلو ابداً
سمرا
اخبارك ايه الاول
والف حمد لله على السلامة منورة
فعلا نفس الاجزاء اللي بتقولي عليها دي ضايقتني
اصلنا مش لوحدنا في الدنيا علشان نشوف الفيلم ونبلعة ونمشي
مهو لو اانا اللي شايفة لوحدي حكبر دماغي ومش حروح انشر الافكار الغريبة اللي في الفيلم
لكن المشكله ان الافلام اللي زي دي بتبرمج الناس على عادات غلط ومفاهيم غلط
نفس النظام كده اللي اتقال في فيلم زمان قالك على الدخان لو كان حلال احنا بنشربة ولو كان حرام ادينا بنحرقة
بقت كلمه مأثورة كل الناس بتقولها
والفيلم برضه طلع كام عبارة افتكاسية من دول
وده اللي ضايقني برضه
وانا شايف اننا لما نضحك يبقا لازم نضحك ضحك هادف مش اي هجص والسلام
!!
مش كده برضه واللا ايه
ومنورة
انا معاك والله انا دخلت الفيلم وحسيت وقعدت اقول طب ماانا من ال72 مليون ومشربتش شاي بالياسمين ممكن تتفضل وتزورني
سوري حسيت ان مصر بقت مجتمع الرشوة في وجهة نظر سي يوسف ابو المعاطي بس برده اكيد تلت تربع رجال الاعمال شغالين بالرشوة امال نيمشو امورهم ازاي
Post a Comment