عنوان حاسس اوي انه بينطبق على الموضوع ده
عايز اتكلم النهارده مع نفسي
ونفسي الناس كلها تسمعني
لحد امتا حنغير المفاهيم
حنخلط الاوراق
لحد امتا
لحد امتا كل حاجه غلط نسميها بإسم مختلف علشان ندي لنفسنا الحق نعملها
واحنا متأكدين انها غلط
النهارده مثلا كنت في زياره مع شباب الاتحادات الطلابية في جامعة قناه السويس فرع بورسعيد
كنا في زياره الى الصندوق الاجتماعي للتنمية
ال ايه للتنمية
جه واحد محترم ملو هدومة وبشنب
ومعاه واحد محترم وملو هدومة ومن غير شنب
المهم فضل الراجل ابو شنب يتكلم ويقول الصندوق الاجتماعي وبيقرض الشباب بقروض ميسره على شريحتين
الشريحة الاولى اقصاها 50000 جنيه والثانيه من 50 الف الى مليون
طيب كويس
ايه الضمانات
قال ضمانات ميسره وشرحلنا بشكل بسيط كيفية الضمانات والاوراق المطلوبة وكده
طبعاً بصرف النظر على انه عملنا الدنيا وردي والامر كأنك بكره الصبح حتفتح مشروع صغير وكمان ناجح
بغض النظر برضه على اننا كلنا عارفين ان الورق المطلوب ده بيتطلب جهد ومصاريف ممكن تسحب قيمة القرض كله
الا اني فضلت اسمع اسئلة الناس اللي حوليا علشان مش حابب اسأل علشان مخبطش
وقولت اعتبر نفسي مش عارف ونعرف
سؤال من ضمن الاسئلة كنت مستنيه واتسأل الحمد لله
سأله الشاب وقاله لو سمحت بالنسبة لتسديد القرض
قال
تسديد القرض بيتم على شريحتين
الشريحة الاولى بتسدد (بفائدة) 9% والشريحة التانيه بتسدد بفائده 11% ولو عايز تعرف الشرائح انظر كام سطر لفوق
المهم يا معلم البيه ابو من غير شنب قال فائده وانا رحت مطبق الورقة اللي ادامي
وقولت رجعنا تاني لخلط المفاهيم والاسماء
بيقول فائده ميسره متناقصة
بس برضه ايه
فـــــــائده
وده بقا بعد لما فاض بيا الكيل قررت اقول واتكلم مع نفسي
ومع كل الناس
خلونا نعمل التدوينة دي والتعليقات علي الاسماء اللي بنخلطها
وبنسميها بغير مسماها
حبدأ بكام حاجه اللي في دماغي واللي بجد خلاص اتخنقت منهم
الاولى
الفائده
الفائده زي مأنتم عارفين هي نسبة تفرض على القرض علشان يتسدد القرض بزياده عن قيمته قيمة الفائده دي
وده بكل بساطة
ربــــــــا
ايون ربا
واحل الله البيع وحرم الربا
يبقا المفروض نعمل ايه بقا
حسيبكم تفكروا معايا
في ازاي طرق نقترض بيها من غير الربا ده
نيجي لتاني حاجه
شرب الحشيش والمخدرات
قالها البيه عماد بعرور وقال
شرب الحشيش مزاجه عالي والراجل اللي حيجي ويكرش باين واللا حاجه كده
يعني شرب الحشيش ده مزاج عالي مش ادمان والقاء بنفسك الى التهلكة
شرب الخمر بقت اديني ازازة بيره ابلع علشان دماغي تتعدل وتعلى
الرشوة بقت حق مكتسب واسمها
قهوة
اكرامية
مشي حالك
درج مفتوح
اي حاجه المهم منقولش رشوة
علشان كلنا عارفين انه لعن الله الراشي والمرتشي والرائش
بس اهو لازم نغير الاسم ونجمله علشان نتعامل بيه وكأنه عاااااااادي
ايه تاني فكروني
اه التظبيط
مش تسمع من واحد يقولك انا امبارح ظبطت واحده مش عارف في الحتة المقطوعة اللي في المكان الفلاني
لا ياعم مش دي الحته التانيه
ايوه اللي هناك دي
تظبيط
يا جدعان حرام عليكم تظبيط ده واللا ايه
بلاش نتكلم
انا عارف التدوينة دي دمها تقيل جدا
وخنيقة
وحاسس فيها اني ماسك عصاية وواقف على سبوره وعمال اقول حاسب
وخد بالك
وافعل ولا تفعل
بس بجد الموضوع ده لفت نظري جدا
ونفسي اتكلم عليه
مش عارف يمكن خانني التعبير في التدوينة دي
بس اللي متأكد منه ان الاحساس وصلكم
واللا ايه ؟؟
----------------------------------------
على الهامش
انا اركب ذقن
وشنب
واروح لبوكي
اقوله انا اسمي مستعار
واخطبك انتي واخلع الشنب واخطب احتك واشيل الذقن واخذ عمتك بالمره
12 comments:
امبارح ... واحنا
بناخد دوره اعداد القاده
لما اصحابنا سجلوا واحده مكان واحده
قولتلهم بلاش تزوير يا جماعه
قالولى عادى ي بنتى شغاال
المهم مع انى كنت معترضه ... الا انهم طلبوا منى الموبيل يتصلوا ياخدوا بيانات لبنت لتانيه علشان
تبقا مسبوكه
وانا اديتهولهم
بعدها حسيت بالذنب انى شاركت في حاجه كده
ورجعت وقولت انا لو شايفه حد بياخد رشوه انا مخدش
بيكذب انا مكذبش
وهكذا
ودى اكتر الطرق الايجابيه
لمحاربه الفساد
انا للاسف بدون تفكير (مش عوايدى) ساهمت في الفساد من غير ما اقصد
والحكايات كتير
لازم نخلى بالنا احنا بنعمل ايه
كويس
صديقي زحل الفلكي
كيف الحال
هل تذكرني أنا صديقك الذي التقيت بك مع وينكي في حلفة علي الألفي ستب باي ستب
وجدت مدونتك الرائعة الآن
كنت قد كتبت عنك في مدونتي أتمنى أن تشرفني هناك
على فكرة قمت بإضافة مدونتك الرائعة لقائمة المدونات عندي في المفضلة
أتمنى أن تقوم بالمثل
تحياتي
جوسي كنت حاضر معاكي الموقف اللي قلتي عليه لكن انا بعتبر ده مش تزوير علشان حاجه مهمه
المفروض الحضور كان 15 واحد
وهم قالوا ان اللي حييجي في حدود ل15 يعتبر حاضر يعني ليه نفس الحقوق
فمكانش فيه اي مشكله ان واحده تحضر مكان واحده وتتبرع بمجهوده لصاحبتها
--------------------------
GayofSun
اكيد فاكرك
وقريت اللي انت كتبته عني في مدونتك
كنت كاتب
----
كنت أتوقع أن يقاطعوني و يتركوني ، و لكن حدث العكس، تقدموا نحوي و صافحوني جميعهم و لا أتذكر جميع الأسماء ، أتذكر زحل الفلكي ، سمراء النيل، تفاصيل، و الكثير الذين لا أذكرهم كلهم كانوا مهذبين و رائعين و اعتبروني أخا و صديقا لهم، بل تبدلنا أرقام الهواتف أيضا و نحن على الاتصال حتى الآن
------
عايز اقولك اني كنت من المرحبين بيك كمدون
لكن لو كنت قرأت مدونتك قبلا
كنت اتكلمت معاك بصراحة زي مأنت بتحب الصراحة
وكان حيطول النقاش
وطبيعي كن حيبقا فيه هجوم مني عليك
هجوم كبير ومناقشات طويلة
ده بسبب اختلافي الجذري معاك في فكرك اللي بتعبر عنه في مدونتك
بس كنت كمان اتمنى انك تقول رأيك في مضمون التدوينة الاخيره
منور
الراجل ده تبعي يا عم الحاج
دي أكثر كلمة بضايقني
تيجي تمشي شغل لمواطن .. يطلعلك واحد من تحت الأرض موظف زميلك .. ويجي يقولك ده ابن عمتي .. ده ابن خالتي .. شوف هتكرم زميلك في الشغل ازاي
أيه يا جدعان كل الناس بقت عيلة واحده
كلكلوا أخوات وولاد عم ووولاد خاله
في الأول كنت بأصدق .. رغم اني عمري ما عطلت شغل .. ولا ميزت حاجه عن حاجه
بس اللي زعلني انهم مش يطلعوا قرايب ولا حاجه .. ويطلع كرمه بورقة بعشرايه .. ولا حاجه
حاجه تضايق بجد
: )
تعرف انا معاك فى كل ده بس عاوزة اقولك حاجه احنا لو بصينا للموضوع من منور واسع شويه هتلاقى الناس دلوات معظمها الا قليل القليل من لا يفعل ذلك
واكيد انت عارف ان اساسا مبقاش حد عارف يعيش من غير اكراميه او القهوه مهما كانت المسميات
وهنقول ليه ؟ بسبب حال البلد طبعا
محدش لاقى ياكل
محدش عارف يصرف على عياله
ادى الموضوع وادى اسبابه وادى الناس العاديه بتبرره ازاى
بس ان احنا مجموعه بسيطه يعنى ممكن يكونوا شباب ولا حاجه نقول لا ده غلط
مين هيسمعنا؟
مين هيقتنع؟
يا شيخ ده فى ناس عارفه ومتاكده انه غلط وتقول ده رزق العيال... نقطعه يعنى؟
وربنا بيسامح وشايف حالنا
ولا ايه؟
فكر بقى فى الكلمتين دول وقولى رأيك
وعلى فكره من غير متركب لا دقن ولا شنب
هتحبها وتخطبها هى واختها وبنت عمها
مش مصدق؟
جرب؟
وسلملى على المترو
بقالي كتير مرديتش معلش يا جماعة
اعذروني
نبدأ بأنا افكر اذا انا موجود
يا كايند فعلا موقف غريب
هو بيحب يعمل واجب من غير ميعمل واجب يعني يروح لموظف او موظفة من النشطاء ويقولهم ده تبعي
وهو متأكد ان الموظف حيمشي المصلحة بسرعة
بس يبقا شكله انه عمل واجب
حاجه غريبة
--------------------
r2k
till know i can't understand u or even one of ur 4 blogs maybe u have strange way to think i donnow
but i think u r because who make a blog for "bathrooms" must be strange
------------------
شيماء الجيزي
ليه كده بس ده انا لسه بقول عليكي متفائلة
بصي يا ستي من غير منفضل نخش في الاسباب والمبررات
لو غيرنا نفسنا
دي بداية التغيير
انتي شايفاها مشكله عويصة
طب يا ستي ماشي عويصة وبايظة ولايصة كمان ومش ممكن تتحل
لكن هل معنى ده انك تعمليها ؟
اكيد لأ
ابدأي انتي بس بنفسك وكله حيبقا تمام
خدي كلامي ثقة ان شاء الله
وشكراً لزيارتك الاولى لمدونتي المتواضعة
بص اسمعنى كويس انا عارفه وانت اكيد عارف انى هقول انى مش بعملها وفعلا انا مش بعملها
بس هقولك على حاجه انا عشان مش بعملها وعشان مبرداش بالمحسوبيه والواسطه وايا كانت مسميتها ضاعت منى كما يسميها البعض فرص
وهى فى حد ذاتها اكيد كانت هتفدنى كتير فى عملى الصحافى الى ببحث عنه بس بشكل بعيد شويه عن الى شايفينه اصحاب هذا المجال
تحب تاخد مثال؟ اديك مثال
لما كنت فى كليه الحقوق ولما كنت فى المنصورة ولما اتعرض عليا الامتحان كاملا بواسطه لاجل ابنه الوزير زميلتى كنت انا وهى بس طبعا دى واسطه كبيرة وجايلى الامتحان لغايت عندى رفضت وعشان رفضت وازاى ارفض وهى تقبل سقطت سقطت اة يعنى عشان مغشتش ولا رضيت بالواسطه العلاويه وحولت خدمه اجتماعيه
اقولك مثال كمان؟ نقول كمان
رفضت عمل فى جريدة الوفد لانه جايلى بواسطه وواسطه كبيرة كمان ومش عن قدرتى اساسا ( مع انهم معدوش بيهتموا )
اقولك كمان الواسطه لعبت ازاى فى حياتى ولا كفايه؟
الاستغلال ... يعنى سلمنى واسلمك ولما يعرض عليا صحفى مشهور بالجمهوريه العمل فى جريدة الجمهوريه بمقابل.... بدون زكر هذا المقابل
وادى واسطه طبعا رفضتها بنوع تانى خالص
يعنى الرشاوى والقهوه والحاجات دى صغيرة بالنسبه للكلام ده وفى حاجه عاوزة انبهك ليها دلوات الى مش بيعمل كده بيتجازى ...متبصليش كده ايوة وشوف مثل بسيط لو بتخلص ورق فى هيئه حكوميه ما ومقبضتش الموظف بخمسايه ولا عشرايه ..ايه بيحصل؟ بتلف السبع تمن عشر لفات ويدوخك ويوديك ويجيبك ولازم تبقى نبيه وبتفهم وان فهمت وطنشت بيسلط عليك بقيت المواظفين وتبقى لعبتهم
وده ابسط مثال لان فى اصعب من كده بكتير
الموضوع مش سهل صدقنى الموضوع ده كبير جدا بس انا مبتنازلش عن انى امشى بمبدأ انا اتعلمته وفهمته ولوحدى محدش ساعدنى لانى لقيت انى لو عملت كده هخسر نفسى ودينى
والدنيا دى اقل من انى اخسر عشانها حاجه
انا طولت عليك انا عارفه بس الموضوع بتاعك خلانى انفجر
يلا اشوفك بخير وزى مقولتلك ركب دقن براحتك
ركب دكن و شنب ..أكيد شكلك هيبقي احسن
مهو ده تقريبا اللي بقى شغال دلوقتي ، بنسمي الحاجة بسمى غير مسماها الحقيقي علشان نحلل لنفسنا كل حاجة حرام
وده علشان الدين بقى أغلبه مظهر بس ، حتى مش مظهر قدام الناس بس ، لكن لكل واحد قدام نفسه..يعني بيكدب على نفسه وبيصدق الكدبة
سعيد بالمناقشة يا شيماء بجد
وان كنت متفق معاكي في كل هذه المشاكل
الا اني لازلت عند رأيي بأن الواحد يعمل اللي عليه ويحاول يقف ضد ده
علشان اللي حيشوفه في الدنيا مهما كان مش حيكون جزء من اللي حيشوفه في الاخره
سواء من الخير فالجنة اجمل او من الشر فالنار اشد
فاهماني اكيد
وبجد سعيد بمناقشاتك اوي
-------------------------
بني ادم مع وقف التنفيذ
تفتكر ؟؟
---------------------
متغيره شوية
سعيد بزيارتك الاولى
ومتفق معاكي جدا جدا
وادينا ورا نفسنا لحد منسمي الحاجات بمسمياتها الحقيقية
على الاقل عند نفسنا
نوفا يا نوفا ليه بس فكرتنى ونا كنت قربت انسى...يا سيدى كل اللى انت بتقول عليه ده واقع وائع رغم اننا ممكن نكون مقتنعين ان الحاجات دى غلط لكن تعالى كده اعمل الصح هيقولوا عليك مخك مقفل وانك رجعى وانك وانك لكن فى النهاية لا يصح الا الصحيح انا نفسى اتعرضت لموقف فى دورة فى شغلى كنا فريقين من نفس العمل بنقوم بمشروعين منافسين لكن المهزلة انى اكتشفت بعد نهاية الدورة مين من الفريقين من البداية هيفوز عشان شخص معين فى الفريق المنافس ... الدنيا ماشية بالمقلوب النتائج سابقة المقدمات
رباب
Post a Comment