انا عايز اخش في الموضوع على طول
بعد السلامات عليكم والذي منه
وبعد رسالة شكر بكل صدق وحراره لكل من شاركني في مشكلتي السابقة والتي ادت لكتابتي التدونتين السابقتين
اقول لكم اني بفضل الله في افضل حال
و
نخش في الموضوع
دلوقتي فيه شوية افكار كتير
اتنفذ منها افكار وفيه متنفذش
الا اني متأكد انها مشاريع
جامده جدا
وتنفيذها يعمل فرق
بس عايز اقول حاجه مهمة
احترس يا كل من تنقل هذه المشاريع
وياكل من تقتبس افكاري
احترس
اصلي حدعيلك ربنا يوفقك ويسدد خطاك وتنفذ المشروعات دي
المهم عندي ان المشاريع دي تتنفذ لكن مش مهم مين ينفذها
يعني مشاريع من غير حقوق ملكية فكريه
منها مشاريع نفذوها اصدقائي ومنها مشاريع تناقشت فيها مع اصحابي
ومنها مشاريع لسه طازة
نخش في المشاريع
عندنا اول مشروع هو مشروع شرائط الكاسيت
حد يقولي ايه شرائط الكاسيت
هوا ربنا حيديلنا ثواب على شرائط كاسيت
استنا بس يا عم محمد عليا
مين عم محمد ده
!!
خلينا في الموضوع يابني
بكل بساطة لو سيادتك وسيادتك وحضرتك وحضرتك لميتوا شرائط الكاسيت القديمة عندكم
شرائط ايه ياعم انت هوا انت بتشتغلنا واللا ايه
وبعديييييين اسكت يا شيطان شوية واسمعوا يا جماعة
الشرائط دي بناخدها نوديها لدور رعاية المكفوفين
ونسجل عليها مواد تساعد في تعليم المكفوفين
يبقا شوف بقا الثواب ازي
ومن غير فلوس
آآآآآآآه فهمت
ايون الحمد لله
.
.
.
فاصل اعلاني
ياختي هاتي كحك وغريبة بسكو مصر
ده ماشاء الله عليه ده جميل
عدنا من الفاصل
.
.
الموضوع التاني او المشروع التاني
يا عم انت بالراحة علينا شوية هوا احنا لحقنا نعمل الاولاني لما حتخش في التاني
صبرك بس عليا اسمع مني واشتري مني دأنا ببيع ببلاش
طيب سمعنا اهو قول ياعم
المشروع التاني هو مشروع بطانية الخير
يعني ايه
طبعاً كلنا عارفين ان البطاطين دي مهمة جدا في الشتاء خصوصاً في بورسعيد والمدن الساحلية
طيب يعني نعمل ايه يعني نشتري بطاطين يابني دي بالشئ الفلاني حرام عليك
ياجدع انت اصبر
دلوقتي لو انت دفعت 20 جنيه حتفرق معاك كتير
لا مفتكرش يعني مش حتفرق وجيب السبع ميخلاشي
طيب خير
هات بقا 20 جنيه
والبطانية حتتكلف 20 جنيه بس
ازااااااااي
عارف يابني بطانيات الجيش دي الرمادي
اه عارفها بس دي بتشوك ووحشة
لا ياباشا فيه نفس الشكل انما خاماتها احسن وكويسة
الله لو كده يبقا كفاءه وعلى بركه الله
شدوا حيلكم يا جماعة
.
.
.
فاصل اعلاني تاني
هذه المدونة بالتعاون مع حفاضات كافولة
مع حفاضات كافولة ابنك يعيش طول عمره مبلول ومتعقد من المياه
.
.
عدنا
المشروع التالت
ياعم ارحمنا بالراحة علينا شوية
معلش معلش اسمع اصل ده الزغلول الكبير
زغلول ايه ياعم انت فاكرني بلح
يوووووووووه متسكت بقا واسمع
المشروع الثالث هو مشروع صدقة جارية
ازاي يعني زي بتاع الجموسة والبقرة اللي بييجي في التليفزيون ياعم انت احنا في بورسعيد مش الارياف
ياعم اصبر الصدقة الجارية دي مش جاموسة وبس زي مأنت فاهم
فيه صدقات جرية كتير
زي اللي حقولك عليه ده
دلوقتي فيه مشروع اسمه مشروع التشجير
ازرع شجره
لا ياعم مش حتزرع
حزرعلك انا بس سيادتك تساهم معانا
تشتريلك شتله
يعني ايه شتله
شتله يا باشا يعني شجره صغيره نعرف نزرعها بحيث لما تكبر تديلك حسنات عن كل واحد يقعد تحت ظلها او يتنفس بالهواء النقي بتاعها
ياحلاوة يا ولاد طب ولو مت قبل متكبر الشجره تبقا الفلوس راحت عليا ومأخذتش ثواب واللا ايه ؟! متفهمني
الاجر مستمر ان شاء الله مهي صدقة جارية
على بركه الله
.
.
.
فاصل
هذه المشاريع تحت عنوان قول الله تعالى
وما تنفقوا من شئ تجدوه عند الله هو خيراً واعظم اجرا
صدق الله العظيم
.
.
.
اضخم مشروع بقا
ياااه هوا لسه فيه مشاريع
ياعم المشاريع كتير انت مرازي ليه بس
انا مرازي ..طب قول ياعم
المشروع الرابع وهو مشروع جميل جدا
هو مشروع اقامة مسجد
ماشاء الله اقامة مسجد وده كده يعني سهل
لا ياعم اصبر بس
فيه مساجد كتير بتبنى دلوقتي في بورفؤاد
وممكن تساهم في اي مسجد فيهم
زي مثلا مسجد السيدة خديجة بمنطقة مساكن محمد على
ومسجد الشروق بجوار فرن الشرطة
وفيه مسجد يتم تأسيسه الان في مركز شباب العاشر من رمضان
ايوه مركز شباب العاشر ده اللي بعد الملاحات
المسجد ده خلاص موجوده الرسومات الهندسية بتاعته وحيتكلف حوالى 10 الاف جنيه بس
تصور
يعني ممكن يتلموا بسهوله واهل الخير كتير
شوف انت بقا والدال على الخير كفاعله
ربنا يكرم يارب
دي شوية مشاريع يا جماعة وممكن تساهموا فيها ولأي استفسارات ممكن ادلكم مين يقدر يساعدكم في الاشتراك في هذه المشاريع وممكن تنفذوها انتم
ربنا يكون في عون الكل ان شاء الله
وبارك الله فيكم
