آل ايه مأثروش.... دول اكثر ناس اثروا في مسيرة حياتي

كل شوية افكر ياترى مين اللي أثر في حياتي
هل انا اتغيرت عن زمان
طب والتغيير ده بسبب ايه
كنت تخين بقيت رفيع كنت عصبي بقيت اهدى طيب ليه ومين اللي غيرني ومين اللي ربنا جعله سبب في التغيير
لما فضلت افكر لقيت انه من اكثر الناس اللي اثروا في حياتي هو والدي رحمه الله

ايوه هو اللي على الشمال في الصورة دي واللي على اليمين الاستاذ نصر الالفي مؤسس موقع بورسعيد اونلاين اللي حتكلم عليه كتير بعدين

المهم نرجع لمرجوعنا

والدي رحمه الله كان بيشتغل مهندس في مديرية الاسكان وكمان في الاتحاد التعاوني الاسكاني المركزي في مصر

وفضل في مجال التعاون ده اكثر من 25 سنه

اتعلمت منه حب الغير

اتعلمت منه اني اكون متسامح

اتعملت منه العفو عند المقدرة واني اجي على نفسي علشان احاول انجز خدمة للناس في اسرع وقت

اتعلمت منه لما اكون تعبان مشغلش اللي حولي باللي جوايا ولكن لما اشوف حد تعبان لازم اسأل عليه واساعده

اتعلمت منه اني مشتريش بالتقسيط ولا يكون عليا دين لأي حد

اتعلمت منه اكون خفيف يعني لما احس اني مليش لازمة ملزقش

اتعلمت منه الاهتمام بالسؤال على العائلة وصلة الارحام

اتعلمت منه السواقة طبعاً

:)

لو فضلت اقول ححتاج مدونات كتييييير

وكل مييجي على بالي او افتكر موقف كان بيعمله او افيه كان بيقوله في مواقف معينه افتكر حديث رسول الله صلى الله عليه وسلم

"اذا مات ابن ادم انقطع عمله الا من ثلاث ، صدقة جارية ،او علم ينتفع به ، او ولد صالح يدعو له"

صدق رسول الله صلى الله عليه وسلم

اسأل الله ان ينفع الناس بالعلم والمحاضرات التي كان يلقيها ويعلمها في مجاله التعاوني

واسأل الله ان يرزقنا ان نقيم له صدقة جارية

واسأل الله ان اكون انا ولده الصالح الذي يدعو له

مكدبش عليكم فعلا انا كنت ناوي اتكلم عن النااااااااس اللي اثرت في حياتي

لكني لما بدأت اتكلم عن بابا الله يرحمه مقدرتش غير اني اخصصله التدوينة دي

رحمك الله ياوالدي العزيز واسكنك فسيح جناته

استنوا متمشوش اول مخلص اللي في ايدي حرجع تاني واكمل كلام عن الناس اللي أثروا فيا وبرد ليهم جزء من جميلهم

فاصل ونعود

=======================

وعلى رأي واحد صاحبنا

على الهامش

ابنك يا اباصيري بيه سرق عربية رئيس مكتب مكافحة سرقة السيارات

:)