الفضول والسيطرة وحركات من دي

كتير بتغريني فكره السيطرة ..وهي داء من ضمن الامراض اللي بتصيب نفسية الانسان ولكن

احياناً يكون هذا الداء احسن وسيلة لحل عدد من المشاكل

لكن برضه ده مش موضوعنا

:P

السيطرة اللي بتكلم عنها مش السلطة او القياده ..السيطرة للي اقصدها هي بإستخدام نقاط الضعف اللي موجوده فعلا في الغير

من الاخر حضرب مثال وده اللي جاي اتكلم فيه النهارده

الفضول

قالوا زمان عن الفضول انه قتل القط "مع اني مش عارف ليه"بس انا شايف انها مقوله صح..

الفضول شعور لازم نحاول نحجمه ونحاول نقتله جوانا وقصدي هنا اكيد الفضول الغير مفيد مش طبعاً الفضول للعلم او للمعرفة المفيده..

والفضول الغير مفيد متوفر في الشعب المصري لدرجة تدعوا للسخرية و"السيطرة" خاصة في البنات في مصر....تخيل معايا

قاعد بتتفرج على التليفزيون ومثلا الصورة فيها مشكله وبتسمع صوت بس وييجي مثلا صوت واحد بيسأل واحده

وانتي ايه علاقتك بحسين ؟؟؟

ترد هي : ده حد يطول يتعرف على حسين ده شرف ليا اني مراته ده تحفة؟

ها لو قاعد بقا في القعده دي مع والدتك و اختك او اي بنت قولي حتسمع كام مره سؤال هو مين حسين ؟؟ او هي مين اللي بتتكلم؟؟

اراهن انك حتعد اكثر من 5 مرات !!!!مع انك زيهم مش شايف الصورة

واللذيذ بقا انك ترد وتقول معرفش علشان تكبر دماغك

ومع تكرار السؤال تروح انت كاشف الحقيقة المره

وهي انك مش شايف الصورة زيهم فطبيعي انك متعرفش

:D

الحوادث

هي اكبر واوضح مثال للفضول المصري ...من كام يوم عملت حادثة بالعربية

المهم نزلت اشوف ايه الوضع فبرفع عيني علشان ابص لصاحب العربية اللي اتخبطت

لقيت كمية بشر خارجين يتفرجوا فضول مش اكثر

ده غير اللي اتلموا طبعاً علشان يتفرجوا

فضول مش اكثر

طبعاً فيه اصحاب العربيات اللي بيبصوا يمكن يكون الحادثة دي في عربيتهم

لكن اللي ملوش بقا ...ببساطة

فضوووووووول

امبارح عربية مخبوطة وبنت ماشية ادامي وشايفة الخبطة معدية من جنب الولاد وراحت قالت السؤال الملح اللي مقدرتش ياعيني تكتمة

وقالت

هي دي حادثة ؟؟

طبعاً بسبب صعوبة السؤال الواد اذبهل كده

وقالها اه حادثة !!!!

وطبعاً كمان صاحبتها راحت مديالها كلمتين

قالتلها طبعاً حادثة امال صورة

طبعاً مش عارف ايه علاقة الصورة بالموضوع بس اهو

عديها

جرب كده وانت بتكلم اي بنت وفجأه اضحك

او قول يااااااااااااه

وبعدها اراهنك ممكن تخليها تدفع 100 جنيه علشان تعرف انت قولت كده ليه او ايه اللي ضحكك بالتفصيل

صح واللا غلط ؟؟

وهو ده باب السيطرة انك ممكن عن طريق الشعور ده تسيطر وتغير مجريات الكلام

ايه رأيك بقا حتسيب الناس تسيطر عليك؟؟؟

بس تعرفوا انا لما بدات اكتب البوست ده جالي فكره

تؤكد اوي موضوع الفضول

وهي لما كنا مسافرين على طريق بورسعيد دمياط وبعدين كان وقتها الطريق ازدواج

فكانت فيه عربية جيب معدية وجاية في وشنا على الحارة التانية وفجأه

...........

نلتقي بعد الفاصل

مناسباااااااااات

مناسبات بالكوم الحمد لله
وافراح بفضل الله جت بعد طول انتظار
اول حااااااااااجه
واهم حاجه
خلاااااااااااااااااااااااااااااااااااااااص الكلية خلااااااص
النتيجة طلعت
واخيراً
بقيت مهندس بعد طول انتظار
احمدك ياااااااااااااااارب
حدش عنده وظيفة بقا ؟؟
:P:P:P:P
================
تاني هااام
مدونتي كل سنه وانتي طيبة
اليومين دول يبقا فات عليا سنتين تدوين
سنتين يااااااااااااه عمر يا جدعان
فرح وحزن وحماس وانطلاق واستهبال كمان
كل سنه وانتي طيبة يا مدونتي

حبيت اسجل هنا اللحظة التاريخية دي
وهي اني انضميت لصفوف الخريجين بعد طول انتظار
وعقبال مننضم لصفوف العاملين يااااارب
:D
وتحيا جمهورية مصر العربية
:D:D:D

بحب مصر

على اسم مصر التاريخ يقدر يقول ما شاء

انا مصر عندي احب واجمل الاشياء

بحبها وهي مالكة الارض شرق وغرب



مصر



تحيا مصر

اغاني صنعت احساسنا بمصر وبروح عالية جدا

عدى النهار عبد الحليم حافظ

http://www.4shared.com/file/66092653/b3afcd7f/3adda-elnahar.html?dirPwdVerified=bb9c20c

الله اكبر

http://www.4shared.com/file/66092853/b931e075/allah-akbar.html?dirPwdVerified=bb9c20c

عاش اللي قال

http://www.4shared.com/file/66093487/ba54c420/___online.html?dirPwdVerified=bb9c20c

واللينك ده عليه مجموعة اغاني تانيه

http://www.kuwaitup.com/vb/showthread.php?t=89557

---------------------

على الهامش

لسه فيه شباب جديد بيضرب شعره جل

وبيلف بالعربيات

وبيسمع مزيكا غريبة

وبيعمل شات

وعايز يسافر يشتغل بره

بس برضه

بيحب مصر

بيحب مصر اوي

الصياحة عيب علينا كلنا

عارفين الشخص ده
ايوه سواق التاكسي او سيد فوكس في تامر وشوقية او
بطل سلسلة اعلانات السياحة
اللي بتيجي في او تي في
ايوه اللي بيضايق فيها السياح دي
اهو ده بقا اللي انا عايز اتكلم فيه

اينعم الدنيا رمضان و10 اواخر والعيد جاي وكل سنه وانتم طيبين بس انا برضه لازم اتكلم عن سلسلة الاعلانات دي
ايه رأيكم فيها ؟؟
ياتري عاجباكم
واللا عادي يعني
واللا مش عاجباكم
حستنا رأي كل واحد فيكم
بس انا حقول رأيي برضه

-----------------------
سلسلة الاعلانات دي اكثر اعلانات استفزازية شوفتها لحد دلوقتي
من بعد لما مصر كانت عاملة الاعلان بتاع مصر البيت بيتك اللي بيبدأ ببنت لابسة استغفر الله العظيم مايوه بكيني وكأن مصر بلد هاواي
لحد سلسلة الاعلانات بتاعت سيد فوكس ده
الاعلان الاول
بييجي الباشا ده ويعاكس واحده اجنبيه ويحاول يشدها من ايديها علشان يدخلها المحل
وتزعقلة الاجنبية وتتشملل وتقول للكاميرا ان الموضوع ده بيديها انطباع وحش عن مصر

الاعلان التاني يا شطار
ايون صح
بتاع الراجل الاجنبي العجوز ده اللي بيشتري من بازار وعايز يجيب طبق عليه نقش
وييجي سيد فوكس برضه "ياسبحان الله" ويقوله ده ب 200 دولار وعلشان خاطرك 150 دولار
وبغض النظر ان ازاي الاجنبي عرف ال 200 واللا ال 150 اللي بيقوله عليهم بالعربي
المهم انه فهم ان السعر 75 دولار زي مهو مكتوب وان الراجل بيضحك عليه
وال ايه ييجي صاحب البازار يطرده "شوفوا الذمة" وتيجي كمان مراته تزعقله وتقوله حندفع فلوس المدارس منين
ياسلام
وييجي الاجنبي يقول ان السلوك ده برضه مش حلو وينصحنا وهو قرفان

الاعلان الثالث
طبعاً عرفتوه
لما سيد فوكس بيعاكس واحده راكبة في الاتوبيس السياحي على طريق السفر
ودي حاجه تخلينا نتسائل
الاعلان ده خيالي واللا حقيقي
اصلا اصلا في الاصل مفيش عربية بتعدي جنب فوج سياحي على طريق سفر
واللي ربنا ابتلاه وامه داعية عليه يلاقي فوج سياحي وهو مسافر
حيلاقي قبله عربية بوكس
وبعده عربية بوكس
وخارج من العربية كام شاب كده شاطرين وشايلين بنادق ويقولوله ارجع والضابط اللي في العربية عمال يطلع ايده ويشاور للناس يرجعوا
فالمهم سيبكم من كل ده
وفوكس طبعاً عدي
وقرب من الاتوبيس وفضل يبصبص للبت الاجنبية ويعاكسها
وبعدين لبس في مقطورة واللا وقع من على الطريق بالعربية
المهم يعني اتجبس ومراته راحتله تقوله زعلانه على العربية واكل عيشنا

طبعاً سردت الاعلانات من وجهة نظري وحناقشها واحده واحده

اولا حوار الاعلان ده بيدور حولين المشاكل اللي بيتعرض ليها "السياح " في مصر
وهي المعاكسة
والاستظراف
والغش



ماااااااشي
هل بقا ده اللي بيتعرض ليه السياح "بس" واللا المصريين كمان
يعني لما اجي اقول اعلان وتكلفة اولا اقاوم سلوك في المجتمع وهو سلوك الغش او الاستظراف او المعاكسة
يعني مش حقول بلاش تعاكس الاجنبية
والمصرية حلال ومباح
ولا حقول بلاش تغش الاجنبي
واعمل زي بتوع الاقصر لما بيلبسوا اتخن مصري العمة وهم بيتعاملوا معاه معاملة جاز ومش بيرضوا يبيعوله اي حاجه
ولا حقول بلاش تستظرف مع الاجنبي
وتعالا اخنق على خلق الله المصريين الغلابة

اللي استفزني في الاعلان ده
اننا لما نعمل حملة توعية لازم نعملها على السلوك
يعني المبدأ
مش علشان خاطر السياح بيدولك فلوس "ياعالم هي فين " نقوم منعملش معاهم ونعمل مع غيرهم
ولما نحب حد يدي توعية
مجيبش اجنبي يوعي المصري علشان عيب وبعدين يعني هو مفيش اجنبي فيهم
اتسرق في بلده
او اتعاكست في بلدها
او حصل فيهم حاجات افظع كمان
ال انطباع وحش عن مصر ال

انا قولت رأيي
وانتم حرين في رأيكم طبعاً
وفي انتظار ارائكم

الليلة الاخيره...المفروض يعني

شعور غريب
اخر امتحان في الكلية
ويارب يكون اخر امتحان
16 سبتمبر 2008
مشوار
سنه حضانه
سنه روضة
5 سنين ابتدائي
3 اعدادي
3 سنين ثانوي
وبعدين 5 سنين كليه
18 سنه تعليم
اخر امتحان
بجد اخر امتحان
مش عارف حعمل ايه بكره الصبح ويارب يكون خير
الماده دي صعبة اوي
عايز انط وعايز اصرخ
اصرخ وبصوت عالي اوي يرج الدنيا كلها
ااااااااااااااااااااااااااااااااااااااااااه
ماده صعبة ومكتفاني
ربنا وفقني وساعدني ومعادش فيه حاجه رابطاني
الا حبل واحد بس
بشده اوي ونفسي اقطعة وبحاول ومش حيأس
يارب ساعدني وعديني منها على خير
مش عارف انا حاسس حاجات غريبة
حاسس اني لسه متكتف واني بعد الامتحان بكره بإذن الله ربنا يوفقني
واصلي شكر
واجري وانط عاااااااااالي اوي فوووووووق
خلاص
يارب يكون خلاص
معادش فيه حاجه ادرسها غصب عني ؟
معادش فيه دكتور رخم يضايقنا ونشتكيه ونتخانق وناخد حقنا ساعات وساعات منعرفش ناخده
لسه برضه احساس القفزة العالية اوي اوي اوي والصرخة
اااااااااااااااااااااااااااااااااااااااه
لا مش طرزان ولا عمرها محتبقا صرخة كوميدية
لا دي صرخة نصر
صرخة فرح
صرخة ترمي كل حاجه من على كتافي وتخليني حر
اه حر
مستني اللحظة بفارغ صبر
قاعد على نار والطاقة جوايا كبيره
بتغلي
نار
عايز اجري
عايز انتج
عايز اعمل حاجات كتير
مش عايز حد يقولي لسه حتشوف ولا حد يقولي حتتكبت في شغل ولا حاجه
لسبب بسيط
اني عايز اتوكل على الله سبحانه وتعالى
واشتغل واخطط وانتج
واللي يحصل يحصل
قالولي مش حتغير
قولتلهم حغير
وبفضل الله وحده جعل على ايدين مجموعة كبيره كنت فرد منها
جعل التغيير
سواء في الكلية او في شغل تطوعي او او
بس حصل
ومش مستني حد يكتفني تاني
يا انهزامييين موتوا
يا خوافييييين موتوا
يا اغبيااااااء موتوا
ده زمن محتاج اللي يقوم ويمشي في نص الشارع
مش جنب الحيط
وعمر اللي بيمشي في نص الشارع محيموت
لازم يسيب اثر وحتى لو اتخبط حيسيب اثر
انما لو جنب الحيط
اثره حيبقا على حيطة في جنب محدش حيشوفه ولا حد حيتعلم من اثره
الحرية
تعااااااااااااااااااااااالي

يارب انت اعلم باللي فيا
عايز اخلص بقا
عايز ابقا حر
ساعدني يارب

-------------
ليلة امتحان الانتنه
د/عاطف بيه باشا غنيم
للذكري
اولى معاك على الرأفة يا دكتور
تانيه معاك شايل ماده يا دكتور
ثالثة تخلفات المادة شيلتها وطلعت رأفة يا دكتور
رابعة جالي الصفراء في وقت امتحان الماده وعلشان كده انا حمتحنها دلوقتي
تفتكر العيب فيا واللا في مين
سبحان الله

قانون المروووور السعيد

عارفين اعلان ضعف الرصيد بتاع اتصالات

اهو انا عايز اقول

القانون الجديد ضعف الرصيد

القانون السعيد ضعف الرصيد

القانون الشديد ضععععف الرصيد

هو ده قانون المرور الجديد

بما اني ماشي من غير ترخيص بقالي اكثر من 8 شهور وده لأسباب خارجه عن ارادتي لظروف الروتين المصري

بس عجبني قرارات قانون المرور الجديد

التشديدات عجبتني

بس فيه عقوبات فرستني

--------------------

في القانون السعيد ان محدش يمشي من غير حزام واللي جنبه كمان ولو ملبستش الحزام

ذنبك على جنبك

تدبس في غرامة فورية

وكما قال الشعباني شعبان عبد الرحيم زعيم عائلة الشعبانيين

اربط الحزام وكفايه كلام

-------------------

في القانون الحديد

ان لازم تقابل بين كل كمين وكمين 3 كمائن علشان ضبط المجرمين معتدي الاجرام من سائقي السيارات اللي اوقعهم حظهم العاثر مع لجنه من ال500 لجنه لحفظ الامن والامان وهم بينتهكوا اقصي حرمات القانون الجديد

ومش معاهم مثلث عاكس

يااااااااااااااااه

فينك يا شعبولا لما تقولنا ظبط المثلث لحسن م الغرامة حتفلس

------------------------

في القانون الشديد

ممنوع تدخن في عربية اجرة

وده شئ اسعدني جدا

بس انا حسيت انه لما تيجي تروح القسم وتبلغ عن موبايل مسروق

يقولك استعوض ربنا لو كان ثمنه مش اد كده يعني

وفي نفس الوقت يدفع سيادتك غرامة فورية 50 جنيه للراكب وحوالى 75 جنيه باين للسائق في حالة انك بتدخن وممكن توصل الغرامة ل 300 جنيه

خير بس شايفين توازن العقوبات والقرارات

مش بقولكم النظام الشديد

--------------------------

في القانون الجديد انك لو مشيت عكس السير

تدفع من 1000 ل 3000 جنيه يا معلم وفيه احتمال وارد تتحبس سادتك

قشطه جدا

طب ليه

اصل سيادتك كده بتشرع في القتل

يا حلاوه يا حلاوة

يافرحة طنط ام ممدوح اللي متحبسش ولا يوم واحد عن كل واحد مات هناك

ايوه في الحته اللي بيعملوا فيها بلام بلام بلام

-------------------------

في القانون الجديد لوح معدنية جديده

عليها اسم

مصر

وعلى اسم مصر التاريخ يقدر يقول ماشاء

ده نمر مصر عندي احب واجمل الاشياء

بس ياتري النمر دي

حتلغي نمر الهيئة الدبلوماسية

والهيئة القضائية

والشرطه

والكوسة

والمحسوبية

والفيمية واتفضل ياباشا

واللي قالب نمر وحاطط نسر واتفضل يا بيه

ياتري

-----------------------

وانا وانت والقانون وسمعني سلام قوم يا مصري وسيب الكرسي

بتاع العربية علشان متقومش في كمين ويعملوك ملوخيه

-------------------------

حبه جد

عجبني التزام الناس غصب عنهم بالقانون علشان العقوبات الغليظة

ويارب يطبق على الناس كلها

التاكسيات بقت رخمة جدا عايزين نعمل حملة نبلغ عنهم فيها علشان يتربوا شوية

عجبني جدا انه مفيش تدخين

عقبال مننتهي بقا من رشوة العساكر

اللي بتبقا في عز الظهر في ميدان رمسيس

وفي كل حته للاسف

وربنا يعافينا

ضعععععععععععععف الرصيد

No comment

انا كويس

أحمد السقا

انا حخش في لموضوع على طول
مكنتش متخيل اني ممكن اكتب عن مطرب او ممثل في مدونتي او حتى في حياتي
بس جه الوقت اللي لازم اقول على حاجات بتدور في دماغي
مع اني عارف انه كتير تمثيل بس انا ميهمنيش غير اللي بيوصلني وبس
ميهمنيش احمد السقا بدأ ازاي او عمل ايه او ناوي يعمل ايه او ليه

لكن لازم اقول ان الراجل ده في نظري وصل لمرحلة اللي وصلها عندي قبله
احمد مظهر وصلاح ذو الفقار
ومحدش يقولي اشمعنى

علشان انا حقول دلوقتي

طول عمري متربي على افكار وافلام معينه
زي صلاح الدين ورأفت الهجان ودموع في عيون وقحة بتاع جمعة الشوان والحفار والطريق الى ايلات
الى اخره

متربي على الافكار دي افكار النضال والحروب ولو حتى في السلم
افكار ان فيه عدو حيفضل عدو على طول وان فيه فكره لما الواحد يقتنع بيها يبقا مستعد يضحي بعمره علشانها والمهم ان الفكره تكون صح والكل يبصم بالعشرة علي انها صح

احمد مظهر قطز وصلاح الدين الايوبي
واحمد السقا مش حبالغ لو قولت اني حطيته في نفس المركز بالنسبة لأفكاري الشخصية هو بيعمل شخصيات بتعلق معايا وتديني نفس التأكيد على نفس الفكره اللي انا بقول عليها
وصلاح ذو الفقار في عيسي العوام وتعرفوا حتى في رأفت الهجان لما كان في المخابرات اينعم مظهرش كتير بس ليه كاريزما معينه

ال3 دول من اكثر الشخصيات اللي بحبهم على مستوى التمثيل واختيار الادوار وانا متأكد ان السقا مش حيقرأ الكلام ده
بس برضه حقوله

يا ابو حميد لما اشوفك ان شاء الله بعد محقق الكام حلم اللي عايز احققهم
ولما اقابلك في لقاء حتعمد اني احضره علشان اقولك الكلام ده
انت فنان بتنقي ادوارك صح وانت اثرت في شخصيتي عن طريق شخصياتك اللي في افلامك وكل مأحلامي كانت بتبعد كنت بشوف اني حلمي حيتحقق كل متفرج على شخية من شخصياتك الناجحة الصح اللي بتعملهم
بالرغم ان شخصياتك دي بعيده كل البعد عن مجالي اللي انا عايزه بس يكفي اني باخد دفعة معينة هي اللي انا عايزها لما كنت بتفرج على افلامك دي

----------------------------
يمكن الحالة اللي انا فيها دي حالة مؤقته نتيجة تأثر بفيلم او مشهد او اي حاجه
بس انا شايف ان الحالة دي حالة صح وشايف اني عملت شوية حاجات نتيجة للحالة دي اعتقد انها صح

وكلام في ودن كل اللي حيقرأ التدوينة دي
الكلام اللي فوق ده انا كاتبه علشاني
علشان لما اشوفه بعدين افتكر احساسي
علشان يمكن انت ياللي بتقرأ مدونتي متفهموش او متحسوش
بس هي نصيحة
دور في كل حاجه حوليك على اللي يديك دفعة للأمام أي كانت
من اي حاجه حوليك شوف فيها اللي يزقك لأدام
دفعة كبيره للامام

بس خد بالك اوعى يكون شلوت
!!!!!

هوا انا مبذاكرش ليه؟؟

الساعة 3 بلليل
وكم من الحاجات بتحصل الساعة 3 بلليل
وبدل مالواحد يقوم يتلم ويتوضأ ويصليله ركعتين علشان ربنا يرضى عنه والحال يمشي
ابص الاقي نفسي قاعد على الكمبيوتر
وبسأل نفسي سؤال واحد
هوا انا مبذاكرش ليه ؟؟

سؤال غريب بيعتقد كل ولى امر في مصر ان ابنه مبيسألش نفسه السؤال المكوكي الفلكي ده؟
ويصر كل اب وام في العالم انهم يقفوا ويقولوا لولادهم قوم ذاكر يابني مش حينفعك الا مذاكرتك
مع ان اللي ذاكر اخذ ايه
اينعم اشتغل في وظيفة محترمه بمرتب محترم (واعرف ناس كده )
اينعم فرح اهله وعيلته وهو نفسه فرح (طبعاً في كلية هندسة واكيد عديت على مرحلة الثانوية العامة)
وطبعاً اللي ذاكر ده ارتاح دلوقتي وفت الامتحانات
وبرضه بغض النظر عن اللي بشوية فهلوة بيخلص نفسه ولا مذاكره ولا وجع قلب
ارجع الاقي نفسي ببص ببراءه وانا قاعد اقرأ كتاب وبتفرج على كابتن ماجد اللي بييجي الساعة 1 بلليل (كارتون ايه اللي بييجي واحده بلليل ده ) ما علينا
وبعديه فيلم ثم برنامج ثم

...........
وفاتح النور وماما واختي فوكيره نايمين
والاقي السؤال اللي بيتكرر وبيلح على دماغي
حاكم انا عارف الساعة 3 بلليل دي بتطلع فيها حاجات غريبة
ليه مبذاكرش؟؟؟

مع ان ابو المجد وزيزو اصحابي المفروض انهم الانتيخ من 5 سنين يعني لما كنا في المدرسه
واحد فيهم ماشاء الله عنده نجمه واللا بقوا 2 باين على كتفه وقاعد في الكتيبة وربنا يكرمه ظابط اد الدنيا
والتاني محاسب في بنك كبير وربنا يعينه بيشتغل حتى يوم السبت

بنك ايه ده يا خواتي اللي بيشتغل يوم السبت!!
وانا لسه في الكلية (شمتانين فينا اه مهم المهندسين كده )
وبالرغم ان طيطا صديقي الصدوق في حقوق
واورجانيزر (انا اللي مسميه كده والاسم ده مش عاجبة )
والديش والحسكه ويحيى ووليد وكريم وحسن حالهم من حالي
وبالرغم اني قاعد في بيتنا بقالي كذا يوم
وبالرغم انه مفيش انشطة حاليا لظروف الامتحانات ولما بروح الكلية بيبقا علشان حاجات سريعة
الا اني برضه مش عارف انا مبذاكرش ليه ؟
بالرغم اني معايا الكتاب المطبوع علشان الدكتور ابن ناس وخلانا ناخده على الكمبيوتر
وبالرغم ان ورق الكورس وورق المحاضرات والسكشن اليتيم كمان معايا
وبالرغم اني معايا ورق فلوسكاب علشان اذاكر وكمان قلم احمر وازرق ورصاص ومسطره واستيكه وكمان اله حاسبة
الا اني برضه مش عارف انا مبذاكرش ليه؟
بالرغم من الناس اللي عمالة كل متشوفني تقولي قلبي معاك وربنا يعينك وكل الكلام الحلو ده
الا اني
ايوه صح زي مبتقولوا بالظبط
مش عارف انا مبذاكرش ليه ؟
عملت كل حاجه في البيت
غيرت اللمبات المحروقة اللي بالمناسبة رجعت اتحرقت تاني
واكلت وشربت ميه وشاي وكمان فراولة
الا اني
ايوه منتوا حفظتوا بقا
هو سؤال واحد
بس
هوا انا مبذاكرش ليه ؟؟؟
-----------------------------------------------------
وايه اللي جاب ريا وسكينه في الموضوع اصلا ؟
يمكن علشان الدور الدور الدور الدور موعوده ياللي عليكي الدور
الا صحيح هو كان دور ايه ؟
ايموشن وش مش فاهم حاجه

آخر محاضره

اخر محاضرة

النهارده اخذنا اخر محاضره في السنه دي

واخر محاضرة اكاديمية في حياتي

النهارده وكالعاده كنت بتكلم مع زمايلي

وتسليم كذا نعمل كذا ومش عارف ايه جاي امتا وتعملوا سيفيهاتكم ده فيه شركة بترول جاية الكلية يوم الاحد الجاي

وكل يكون جاهز

و

علي فكره يا جماعة

النهارده اخر محاضرة لينا مع بعض

كانوا 4 سنين تخصص ميتنسوش

حد حس قصدي

اخر محاضرة في حياتي الدراسية

بس خلاص

-------------------------------

صورى في الحضانة

وفي الكلية

وعقبال الكل ميخلصوا

وننجح يارب

ديالوووج

-عايز حاجه فيها يا باشا

-لا مش مهم انا كده واللا كده حشتغل

-------------------------

-انا شايف ان الحل اني امسك واخد اي حد فيكم معايا

-والناس رأيها ايه

-قالولي زي متشوف ..وانت ايه رأيك ؟

-لا انا اسف مش موافق

--------------------------

-بص انا مش عايز انزل قصادك بس انت عارف اني احسن منه

-انا عارف انك احسن منه بس هو مفيد بره اكثر

-طب انا حنزل قصاده

-براحتك بس علشان تكون عارف لو نزلت ..مش حتاخد حاجه خالص

-------------------------

-يا دكتور لازم نعمل اللقاءات دي
-بس كتير 8 اسابيع
-نتصرف ومش حتفرق ساعتين في الاسبوع
-ساعتين كتير وبعدين انا مقدرش الغي الدراسة
-انا معايا كذا قسم ومتوقع حضور قوي
-يعني كام في المية
-اكثر من 65% وان شاء الله اكثر بكتير
-مش حلغي محاضرات
-مينفعش لازم حل علشان الموضوع ده لازم يتعمل ان شاء الله
-طيب نرجع نفعل تاني لقاءات الاقسام
-الحمد لله ده عز الطلب
-----------------------------
-اللقاءات دي مش بدعة ولا حاجه جديده ده احنا عملناها علشان نسمعكم ونشوف مشاكلكم
-ششش شايف يا جدع بيقول انه هو اللي عملها
-ياعم كبر دماغك المهم انها اتعملت وبإذن الله تستمر
---------------------------
-السلام عليكم ورحمة الله وبركاته
-ييييييييييييييييييييييييه انزل انزل انزل
---------------------------
-كنت عايز حضرتك في موضوع كده يعني
-قول
-فيه حد بيعمل حركات مش كويسة كده يعني
-يعني بيعمل ايه
-............
-ازاي الكلام ده انا اجيبة واقوله ميعملش كده تاني
-مينفعش دلوقتي
-بس احنا لازم نواجهه
-مع حضرتك بس يعني نخليها في وقت مناسب
-طيب هاتلي اللي بيحصل معاه كده
-حاضر
--------------------------
-انت قرفتنا
-ليه ؟
-بتشتكوا وهو راجل كويس اوي
-كويس ازاي يعني
-مفيش زيه ورجل مهتم بشغله
-حضرتك عارف البير وغطاه وبرضه هو مش ناوي يجيبها البر
----------------------------
-حسينا ان فيه حاجه جديده
-الحمد لله ربنا كرمنا اخر كرم والحمد لله
---------------------------------------------
كل موقف ليه حاجه في دماغي
واتمنى انه يكون ليه حجات في دماغكم

رحلة الى عصر ماقبل الماضي

ما اجمل ان تذهب الى مكان جديد

منذ فتره ليست بالقليلة بدأت افقد كل متعة لي في السفر

بالتحديد بعد رحلة الاقصر واسوان والتي اعقبها رحلات ورحلات لكي اتعدي حاجز الالفين كيلومتر في ما يقارب الاسبوعين

ولكن هذه المره كانت مختلفة

بالرغم من نفس شعور عدم الاهتمام بالسفر كما كنت في السابق انتظر الرحلة بفارغ الصبر ولا استطيع النوم

ولكن هذا لم يحدث هذه المره

حيث ذهبت للنوم لفتره قبل الرحلة
ثم توجهنا الى القاهره
لم اكن ادرك انني سوف انتقل الى حقبة تاريخية اخري
اشاهد فيها متعة التاريخ العربي القديم
ومتعة القاهره الفاطمية
الغوري والسحيمي والقلعة وحديقة الازهر العبقرية
والجولة النيلية ثم كالعادة سيتي باشا ستارز
استمتعت برحلة جديده
اتمنى عودة روح السفر من جديد
ولكني اكاد اجزم ان هذه من اكثر الرحلات التي شدت انتباهي بشده

-------------------------------
شكراً لأحمد جادو على هذه الصورة التي تعبر عني
بجد
وعلى رأي فوكيره
الحرية
او
freedooooooooooooooooooooooooooom

لما حد يقولك

لما حد يقولك تعالى حساعدك ويقنعك انه حيساعده

متطلعش فيه قرفك

ومتهاجموش

ومتحبطوش

طالما عنده امل

متهدش الامل اللي جواه وحاول تاخد شوية من نور الامل اللي عنده

وتساعده

مواقف

----

من فتره كان فيه مسابقة على مستوى الجمهورية اسمها مشروعك حقيقة

المسابقة دي تختص برياده الاعمال

يعني لو عندك فكره مشروع كبير تقدم فيها وتاخد تدريب مهم جدا ومجاني علشان تطور من مهاراتك وبعدين فيه 20 مشروع حيكسبوا ويتنفذوا ده غير ان اللي حيشترك وياخد تدريب حيستفاد جدا بالتدريب

لما جم بتوع المسابقة دول بورسعيد ونظمنالهم لقاء كبير

وللعلم المسابقة دي معمولة مع مركز تحديث الصناعة ووزارة الصناعة والتجارة وكمان المؤسسة العربية للعلوم والتكنولوجيا

المهم يعني

لقيت الناس عمالة تهاجم بتوع المسابقة

اللي يقول قدمت اختراع مش عارف ايه واترفض

واللي يقول انتوا جايين تقولولنا شاركوا متشوفوا الحكومة

طب عيني في عينك كده يا انسان يا بشري

اللي جاي يقولك هات مشروعك علشان اساعدك ده

المفروض تتخانق معاه وتزعقله

واللا المفروض تشكره وتبدأ معاه امل جديد

------------------------------

موقف 2

حرجع لموضوع البوست اللي فات

لما تكون كلية الهندسة في بورسعيد

ححكيلكم عن الكلية من سنتين

التخت مكسره

الغرف دهانها قديم ومكتوب على الحيطه

كهرباء مش اوي والكلية 4 ادوار ومدرج واحد بس

ولو قولنا السنه اللي فاتت

كانت الامتحانات بنظام غلط

بمنتحن 3 مواد اسبوعيا وامتحانات التخلفات في جدول الامتحانات يعني ممكن حد يمتحن 4 مواد في اسبوع

امتحانات الميد تيرم في اي ميعاد

وبمزاج الدكتور

والدنيا حيص بيص

وفي سنه

بقينا بنمتحن يومين في الاسبوع

التخلفات لها جدول مستقل منفصل عن جدول الامتحانات وبفرق اسبوع

امتحانات الميد تيرم في ميعاد ثابت

النتائج بقت على النت

معامل النت اتفتحت

الطلاب بيحطوا جداول امتحاناتهم بما يتناسب معاهم

التخت كلها بقت جديده

والغرف بستاير وبقا فيها داتا شو واجهزة كمبيوتر

فيه مجمع مدرجات وقاعات جديد بيتشطب واشتغل فيه 3 قاعات وحيكون شغال على بداية السنه الجاية

المهم يعني كل ده

ونيجي نقولهم تعالوا اشتركوا في مناقشات مع ادارة الكلية بحيث لو عندكم اي مشكله تانيه تقولوها علشان نتناقش فيها وتتحل بإذن الله

يبصوا بكل قرف

ومن طرف مناخيرهم ويقولك

يوم اجازة اروح انام وبعدين هو انتم حتعرفوا تغيروا حاجه اساسا

لا تعليق التعليق ليكم

-------------------

مواقف كتير

ملخصها

لما تلاقي حد بيقولك حساعدك

ويديلك الدليل انه حيساعدك

متطلعش عينه وتقرفه علشان هو متخلص من اليأس ده بالعافية

اما تساعده وتتحمس معاه

او ترد عليه بحاجه متخليهوش عايز يموتك يعني

انا خلصت

وانتم ايه رأيكم ؟

ليه ...نفسي اعرف

سؤل غريب

بس نفسي اعرفله اجابة

ليه لما بنضرب على قفاك ومتعرفش تاخد حقك

تفضل تقول انا لو حد يمكني اني اخد حقي حعمل واسوي وانتقم من اللي ضربني على قفايا

واول متعرف وحد يمكنك انك تاخد حقك

تفضل انك تطاطي اكثر علشان يضربك تاني

وكأنك بقيت بتعشق الضرب على قفاك

سؤال مستنيله على اجابة

؟؟؟؟؟

ونفسي حد يجاوبني

-----------------------------

الموضوع ومافيه

قسم كهرباء في الكلية

قسم مظلوم ومهضوم حقه والدكاتره فيهم بيظلموا اوي

والقسم فيه حوالي 700 طالب

اتفقنا مع اداره الكلية على اننا نعمل يوم

القسم اجازة

ومفيش محاضرات

ونعمل انشطة ودورات كره قدم وتنس طاولة وشطرنج وثقافي و و و

وبعدين نقعد مع ادارة الكلية وادارة القسم

علشان نحل المشاكل ونتناقش ونشوف المخطئ ونصلح

وعلى فكره محدش يقولي انت بتحلم

علشان حصلت قبل كده مناقشات مع اقسام تانيه

واتحلت مشاكلهم

يقوم من طلاب القسم

اللي متوسط عدد الطلاب فيه حوالي

720 طالب

يشترك اقل من 100

يبقا الضرب على القفا حلو بقا

واللا ايه

حد يفهمني

؟

بلا تعليق

رسالة

والدي العزيز .. بابا
وحشتني ووحشتني ايامك ياحجوج ، يارب تكون في مكان خير من هذا المكان وفي صحبه خير من
هذه الصحبة. حبيت اكتبلك رسالة وانا عارف انه مش حييجي الوقت اللي تقراها فيه بس بتمنى اني
اقدر في يوم من الايام اقولهالك واحنا قاعدين على نهر جاري .. هناك بإذن الله

حبيت ابعتلك الرسالة علشان اطمنك على اخبارنا واتكلم معاك شوية يا بابا
خلاص يابابا قرب الحلم اوي ياحج ،فاكر لما قولتلي اكتب اللي انت عايزه في بطاقات الترشيح في
الثانوية العامة ;) ، فاكر لما قولتلي كده بعد لما كنت حطيتلي هندسة بورسعيد اول رغبة
:D

وقتها كنت زعلان ويمكن لحد دلوقتي بييجي عليا وقت وبزعل اني دخلت هنا ،لكن يابا وفي
الحقيقة معتقدش اني كنت حكون في مكاني ده لو كنت دخلت حته تانيه واوقات كتير بقف عند
افعالك واحس كتير ببعد نظرك في الحكم على الامور .

عملت مسرحيات كتير يا بابا ..انا عارف انك بتحب المسرح وعارف كمان انك كنت بتمثل زمان
في الجامعة..وعارف انك كنت طالب كشكول نشاط .. احب اطمنك ان مسيرتك مستمره واللي كانوا
معاك في الجامعة زمان وشافوني دلوقتي بيقولولي اني شبهك .. متتخيلش ببقا سعيد ازاي لما
بيقولولي كده ، طول عمري نفسي يبقا علاقاتي كتير زيك ، وعلى رأيك ليك في كل خرابة عفرييت
:D

بقيت رئيس الاتحاد يا بابا ، ياتري كنت حتعمل ايه لو كنت معايا يوم مطلعت على المسرح وقالوا
رئيس الاتحاد ، اراهن انك كنت حتمشي توزع فلوس على الناس من الفرحة .

كنت بشوف الفرحة في عيونك لما بعمل عيد ميلادي في البيت وتشوف ال30 بني ادم اللي بييجوا يهدوا البيت وكنت
بتبص علينا وانت مبسوط وبتكون مصر انك تسلم على كل واحد فيهم وانت عارف اساميهم وكل
واحد ليك معاه افيه وتعليق

ابو المجد اللي كنت بتقوله يا حــ صول نباطشي بقا ظابط جيش. زيزو بقا محاسب في بنك وعمرو
الالفي بيشتغل دلوقتي في العريش وانا عارف ان دول بالذات انت عارفهم وبتحب تعرف اخبارهم .

سيبت المكان اللي كنت فيه زمان يا والدي وانا عارف ان دي سنه الحياه والحمد لله ربنا عوضني
بمكان احسن منه انا عارف انك كنت سعيد بوجودي ونشاطي في المكان القديم .. لكن صدقني يا
والدي لو شوفت الوضع دلوقتي حتقولي اني كده احسن اهو موقف مشابه للي حصل معاك زمان

فاكر يا بابا لما اخذتني اول يوم في الكلية علشان توديني مكتب رئيس قسم ميكانيكا وقتها كان
الدكتور فوزي وقولتلي :انت يمكن متخشش المكتب ده طول حياتك في الكلية ، كنت سعيد وانا بسلم
على الدكتور اللي انت وديتني ليه من كام يوم وبقوله بفخر انا محمد ابن المهندس محمود الكتاتني
وكنت سعيد اكثر وهو بيكلم العميد في موضوع الماده اللي طلبت تأجيلها وبيقوله طالما قدم ورقة
يبقا نوافق ده ابن حبيبنا برضه . ملحوظة مكانتش واسطة يعني ده زياده تأكيد بس يعني
:)

الدكتور سامي اللي كنت بتحبه اوي ... بقا حبيبنا كلنا اوي برضه ومعايا رقم تليفونه اديهولك ؟؟

كتير يا والدي حيفرحك في مشوارنا في الكلية

اختي دخلت مدني يابابا زي مكان نفسك اني ادخل مدني .. وكمان بقت معايا في الاتحاد وعاملة
نشاط كبير في الكلية .

بالمناسبة انا رايح الاقصر واسوان كمان كام يوم .. تحب اصورلك رمز الصداقة من تحت في
النص واطلع الدايره في النص زي مأنت كنت مصورها وسيبتني احاول اعملها زيك ومعرفتش
واللا اتصور على السد العالي في المكان اللي كنت مقعدني فيه وكنت مرعوب لحسن اقع ، واللا
اتصور عند حتشبسوت واللا جنب الاسد في طريق الكباش واللا اشرب كباية ميه من النيل مباشره

زي زمان ؟

واللا اصورك معبد الكرنك وقت لما كنت واقف ورافع ايدك زي الفراعنه
هههههههههه كانت صورة تحفة

احب ابشرك يا والدي اني بقيت بعرف امشي لوحدي في القاهره اه والله وبركب بولاق امبابة وبنط
في جامعة جيزه وكمان جيزه هرم
:D وعاشر عباس مكرم كمان شوفت بقا

فاكر لما قولتلي حاخدك معايا مصر وللاسف مأسعفناش الوقت انك تاخدني في رحلة معاك لوحدنا
بس كنت بروح معاك لما كنا بنزور الدقي وقت متابعة الدكتور
وكنت مبسوط اني بروح معاك

كنت فرحان لما كنت بسوق العربية على طريق السفر وتبصلي وتقولي زود السرعة وامسك
الدركسيون كويس ومتخليش العربية تحدف منك

فاكر يا بابا لما كنت بتخش عليا وانا برسم في اعدادي هندسة وتبص على الرسمه وتحللها وتقولي دي كذا
ودي كذا وكنت مبسوط انك بتستعيد ذكرياتك وكنت بتبقا مبسوط اوي لما بجي اسألك في رسمة
مش عارف استنتج فيها جزء وكنت تقعد فيها كتير بس كنت بتحلها في الاخر وتقنعني

على فكره مشروع التخرج بتاعك لسه هنا زي مأنت سيبته

باقي خطوات يا والدي واحقق حلمك وحلمي اني ابقا زميلك في الهندسة


لكن تعبان يا والدي .. عايز احكيلك واقعد معاك واخد رأيك في كتير وعلشان كده بحاول احط نفسي
مكانك وادي لنفسي الحلول اللي كنت انت حتقولهالي على اد مقدر

بقيت بمشي حالي يا والدي وانا عارف ان دي اكثر حاجه انت كنت بتكرهها
اينعم مش بقدم تنازلات لكني حاسس اني بتراجع عن خطوط حمراء المفروض مرجعش عنها بس
بتراجع علشان امشي حالي وبعدين برجع اقف على الخطوط الحمراء تاني

ياتري يا والدي ده صح واللا غلط ؟؟.. انا شايف انه نافع لحد دلوقتي طالما مش بيكون الا بحدود

فاكر وقفتك ياوالدي ضد الغلط واصرارك على الصح وده اللي خلى الغلط يتكالب ضدك ولكن
ثباتك على الحق بيخلي الغلطانين دول لحد دلوقتي بيحكوا ويتحاكوا عن ثباتك وانه كان صح
دلوقتي وبعد اكثر من سنتين بيقولوا انك كنت الصح

مشتاق يا والدي

مشتاق لركوب العربية ورا كرسي السائق وتكون انت سايق واقولك العربية مايله يا بابا وتقولي
مش مايلة واقولك انا شايفها علشان انا قاعد ورا

مشتاق ليوم بعد خروجه واحنا رايحين نجيب بورجر وناكل مع بعض واحنا رايحين المعدية في
شارع الجمهورية ونرمي الورق في الشنطة بتاعت الاكل مع ماما علشان منرميش في الشارع

مشتاق لما كنت بقولك يا بابا بلاش السجاير وانت كنت بتطلع تشرب السجارة في البلكونة
ومتشربهاش في البيت ابداً

مشتاق لمعدية شرق التفريعة واحنا رايحين القنطرة في العيد الصبح بدري علشان نلحق نفطر هناك
ونشرب الشاي

مشتاق لسفرية في رحلة لرأس البر وناخد اللانش مع الرحلة وانت بتذيع الماتش السوداني وتحكيلنا
عن الحكم اللي بيستخدم لبابة العيش بدل من العملة
:D

مشتاق لما كنت بتصحينا بدري في الاجازة وتقولنا اصحوا احنا مسافرين فجأه كده

لكن حنعمل ايه يا والدي ده حكم ربنا وما علينا الا اننا نقول الحمد لله
بس انت معانا وده اللي انا عايز اقوله.. معانا على طول في حركاتك وتعليقاتك وجيناتك اللي
موجوده فيا وفي اختي

وعايز اقولك يا بابا اني حعمل اللي حقدر عليه علشان تفتخر بيا على طول زي مطول عمرك
بتتبسط بنجاحي وبتشجعني

ومش حخاف في الحق يا بابا وحتى لو زعل مني حد طالما الحق بين وواضح

لو فضلت اتكلم يا حجوج الكلام مش حيخلص

لكن في الاخر لك مني تحية والف سلام ودعائي ان ربنا يرحمك ويكرمك بمرافقة النبي صلى الله
عليه وسلم في الجنه

واطمن علينا يا والدي ماما عاملة كل اللي تقدر عليه وزياده وبجد ربنا يكون في عونها علينا ده
احنا حاجه صعبة بصراحة
:)

واعذرني يا والدي اني مقصر في زيارتك انت عارف مشاغل الحياة بس انت معايا على طول
وفاكرك في حل لحظة ومقدرش ابداً انساك يا والدي ده كفايه انك .. بابا

ابنك
محمد


ملحوظة: مرفق بالرسالة صورة افتكاسة زي الافتكاسات بتاعتك يارب تعجبك يابابا

العادي

العـــادي

أوقات كتير تكون .. عادي
وعمال تقول انا .. عادي
ولكن اللي مش ..عادي
انك تفضل كده ..عادي
****
لابس ايه ؟؟.. عادي
عامل ايه ؟؟.. عادي
بتعمل ايه؟؟ .. عادي
بتسمع أغاني؟؟..عادي
وراك مذاكره ؟؟.. عادي
تلعب كورة؟؟.. عادي
بتعمل كده ليه ؟؟.. عادي
ولكن اللي مش ..عادي
انك تفضل كده ..عادي
****
تاكل ايه ؟؟.. عادي
تشرب ايه ؟؟.. عادي
حياتك ليه ؟؟.. عادي
وعايشها ليه ؟؟..عادي
ولكن اللي مش ..عادي
انك تفضل كده ..عادي
بتلعب بديلك ؟؟..عادي
بتبيع ضميرك ؟؟..عادي
بتأسفن زميلك ؟؟..عادي
بتشرب سجاير؟؟..عادي
طب ايه في حياتك مش ...عادي
ايه هو اللي مش ..عادي
*****
ربك مخلقكش كده .عادي
لكن للي مش ..عادي
اللي في لغتك بقا .عادي
لكنه في الاصل مش ..عادي
فلازم تكون مش ..عادي
ولو فضلت كده ..عادي
للاسف حتموت على العادي
ولكن اللي مش ..عادي
انك تفضل كده ..عادي
ولازم نقول على ..العادي
انه ابداً مش ..عادي
أصلها مصيبة لو ..العادي
بتاعك انت بقا ..عادي
علشانه في الاصل مش ..عادي
أمتا بقا يبقا ..العادي
ان العادي مش ..عادي
!!!!!!!

الجزء الثاني

سلام علييييكم ورحمة الله وبركاته
ميت مسا على الناس الكويسة
نخش في الموضوع على السريييع
ونكمل
عم وهبة ده بقا يا عمونا زي مقولتلك
مبينامش ..ومبيسكتش
لما دخلت العنبر كنت مراته قاعده معاه وده عمال يتكلم ويقولها هوا الواد فين؟؟
تقوله راح يريح شوية وجايلك
يعني حييجي؟؟
اه حييجي
طب اصل ال ....دودودودودودودود
الممرضة : خلااااااااص يا حاااااااج بقااااا كفاااااااايه
هوا انا بتكلم ..انا مبتكلمش .. انا ساكت اهو!!
شوية ويتكلم تاني
ومراته قاعده ربنا يصبرها يارب مستحملاه بشكل ربنا يقدرها
المهم شوية وجت مرات عم صالح بتاع السمك ده وجايبين حاجات مش عارف هي ايه
المهم يعني فضلوا ياكلوا
وبعدين أكلوا القطط اللي في العنبر !!
ده على اساس ان القطط دي نزلاء يعني
وفضلت قاعده معاه
شوية والواد اللي في النص بين عم صالح وعم وهبة الريان او وهبة النجار
جتلة العائلة
وشوية وضربوا لب بقا وهيصة
شوية لقيت عم وهبة عمال يقول يا حجة يا حجة
بينده على الممرضه
يقولوا عايز ايه
يقولهم عايزها بس في موضوع كده
جتله الممرضه
راح مادد ايده في جيبة وبيطلع ال5 جنيه اللي هو اساسا كان واخدها من مراته وبيقولها عايز بجنيه لب
!!
ياعم خليك في اللي انت فيه ياعم
قالتله مراته انت عايز لب
راح احمد والعائلة عازمين عليه بشوية لب
طبعاً الراجل نايم على السرير فكان مصير اللب ده ان معظمه وقع على الارض
ومحدش يقولي انت قاعد واخد بالك من اللب
حقولكم منا قاعد فاضي بقا والمفروض معملش أي حاجه خالص
كان الواد محمد ابن عم وهبة وصل
ومراته مشيت
لقيت عم وهبة ده عمال يعافر وعايز يقوم
راح ابنه يساعده ويقومه
ورح قعدوا يتكلموا بقا
وتسمع الحكم والمواعظ

عم وهبة بيقول لأبنه
والبني ادم ده بقا بيظلم نفسه
بيعمل معاصي وربنا بقا يعاقبه ومن معاصية فربنا ميظلموش وهو اللي بيظلم نفسه
أيوه يابا
فانا مثلا اكون عملت المعصية الاولانيه يقوم ربنا يعاقبني وعلشان انا عملت المعصية دي
والواد مركز تركيز اللي عايز يتعلم يعني
وده شئ عجبني في الواد يعني
المهم شوية وقاله عم وهبة
المعصية التانيه
المعصية التانيه
والراجل علق بتاع 10 دقائق عمال يقول المعصية التانيه
ويفكر
لحد مقاله المعصية التانيه بقا يقوم ربنا يبتليك بواحده زي اللي معايا دي
ملحوظة :اللي معاه دي يعني مراته اللي هي ام محمد
يقوله ربنا يبتليك بواحده زي اللي معايا دي تسيبني وتمشي
طبعاً الواد عمال يقوله اه يابا
يادي المصيبه الراجل حيوقع بين الواد وامه
وانا قاعد اسمع
شوية ولقيت عم محمد اللي هو عم نزار ده وصل
ومعاه مراته وصاحبة
اخذ سرير
وكالعاده دخلت الممرضه
فييييييييين اللي لسه داااااااخل
قالها انا
قالتله طيب
ومشيت
وشوية ودخلت بحقن
والعنبر كله اتشكشك يامعلم والحمد لله اني متشكشكتش علشان الحقنه كانت في اللي..
ما علينا
شوية وجت مرات عم نزار دي وجابتله بطانيه
طبعاً في الخلفيه صوت كحة رهيبة والم من يوسف اللي مطلعش صوته خالص في العنبر غير بقوله اااه دمااااااغي ويكح
شوية وجت مرات عم صابر تعزم عليا ببسبوسه
قشطه دحنا قاعدين في كازينو يا جدعان
طبعاً مرضيتش اخد
مع ان البسبوسة مغرية جدا
بس الفكره اني مينفعش اكل حاجه فيها زيوت خااالص
واااء
اعتذرتلها وهي مصممه
قولتلها مينفعش اكل الحاجات دي علشان اللي عندي
راحت عزمت على عم نزار
ولفت على العنبر كله
شوية بقا وعم نزار لعلع
ازيك يا عم وهبة
تاخد جبنه نستون  ..جبنه نستون حلوة
عم وهبة يقوله انا بشبه عليك انا بشوفك كتير انت عارفني
يقوله انا كل بورسعيد عارفيني وعارفك يا عم وهبه حبيبي

يقوله الله يكرمك
يقوله عم نزار خدامك يا عم وهبة
ويلف لعم صالح يقوله انت تاجر سمك يا عم صالح
يقوله اه
يقوله عارفني ياعم صالح
يقوله طبعاً انت بتسرح بتبيع ينسون
يقوله ايوه
عندك ايه ياعم صالح
تعبان شوية عندي النقرص
وده من ايه
من الكابوريا والجمبري
والجمبري والكابوريا
وال....
مش عارف قالها كام مره بس كتيييير
وقاله مهو بيقولك النقرص ده مرض الملوك
كل ده وانا قاعد اتفرج
شوية ودخل ابو احمد اللي كان بياكل لب ده
ودخل في الحوار وانتقل الحوار للكلام على الشغل والوظائف
وطبعاً لازم يحصل شتيمه في اللي بيحصل وفي حال البلد
يقوله عم صالح مهو دلوقتي الاستثمار ده نعمة الناس بتشتغل هناك كتييير
يقوله اه بس بيمصوا الدم ياحج
يعني الشاب يشتغل هناك ب 300 جنيه دول يعملوا ايه ده علشان يعيش عايزله حوالي 2000 جنيه
يقوله عم صالح عندك حق
بس برضه اهو يشتغل احسن ميقعد من غير شغل
يقوله انت عندك حق برضه بس برضه بيمصوا دم الشباب
نرجع لعم وهبة اللي قرر يقوم علشان يدخل الحمام الفاخر بتاع المستشفى
وجابوله عربية بعجل متفهمش الواد ابنه عرف يتصرف فيها ازاي
وبدأت رحلة المعاناه
اظبط كده يابني ايووووه شيل من هنا
لا متتنيش رجلي دي
ايوه شمال بقا
هوب
وهكذا تعليمات واوامر واشتغلات من عم وهبة لابنه اللي خلاص فاض بيه الكيل والواد قافل بقه مش عايز ينطق
ودي حاجه عجبتني فيه
قام عم نزار اللي هو بيقولوله عم محمد بتاع الينسون
وراح يساعد عم وهبة
لحد مأخيراً حطوه على الكرسي وخرج للحمام الفاخر
وانا مصمم اقول عليه فاخر
وفضل عم نزار مستني عم وهبة لحد مخرج من الحمام وفضل يساعده ويقوله خدامك يا عم وهبة
والراجل بصراحة بيساعده بطيبة قلب وعمال يقول لمحمد انت يا محمد ربنا يديلك حسنات من فوق ومن تحت
وبعدين يا عم وهبة هي مراتك فين
يقوله سابتني ومشيت يا عم محمد
يقوله ازاااااي المفروض تبقا معاك انت شوفت مراتي جاتلي وجابتلي الحاجه اهو والمفروض مراتك تكون قاعده معاك
يقوله اهو بقا ربنا بيبتلي الواحد وقال بقين برضه ملهمش لازمة على مراته
مع ان مراته دي الصبح لسه كانت مديالة فلوس وفضل يتأمر ويقولها اهرشيلي واعمليلي والست مش سايباه ومهتمية بيه
المهم نهايته
راح عم نزار متغطي ونام
وكل نص ساعة
اسمع شخير قوي يرج المكان
انط ابص الاقي عم نزار بيمسي
شوية واتعودت ان كل نص ساعة كده عم نزار وهو نايم يعمل كده
قولت خير مهو لو بإنتظام كان الواحد مات مش كفايه عم وهبة
وطبعاً نسيت اقولكم ان في الخلفية برضه كان فيه الصبح صوت فيلم الايدي الناعمة ومن بعدها اغاني وحاجات
وبلليل بقا طول الاحداث دي شغال برنامج البيت بيتك
وعيش يا معلم
وكل شوية صوت اللاسلكي بتاع العساكر اللي كانوا مع مريض الايدز ده
عمليات عمليات
ابدأ
برررررررررررررم مش سامع بقا باقي الحديث
قررت اني اتخمد بقا منا بقالي كتير صاحي
اني انام ابداً
كان في العنبر اللي جنبي بنت صغيره تعبانه وعماله تكح وتعمل اصوات غريبة
وقاعد معاها ست
ولحد وقت متأخر والرجاله يقولولها ياست ده عنبر الرجالة مينفعش حريم يقعدوا هنا
وفهمت من مضمون الحديث ان الست دي وصية على البنت والمفروض تاني يوم تروح المحكمة مش عارف تنقل الوصاية لجدة البنت وحاجات كده
يمين شمال والست مش راضية تمشي
بعيداً عن موضوع الست اللي في الاخر مشيت وطبعاً النور منور وانا معرفش انام والنور منور
فقاعد اسمع من العنبر التاني وبما ان العنابر مفتوحة على بعض من فوق فالصوت عادي بقا
رجل 1: عارف عباس ده هو اللي بيدي العيال الضريبة الكيف بتاعهم
رجل 2 : يقوله لا ياشيخ
زي مبقولك كده..وبيقولك مات باين عباس ده
شوية ولقيت محمد ابن عم وهبة بيقول ايه ده بيتكلموا عن عباس جوز بنت خالتي
ايه يا جدعاااااااان عايش انتوا بتتكلموا عليه موتوه خلااااص
يعني عاااايش طاااااايب بس هو زي مبقولك اللي بيدي الكيف للعيال الصايعين
اتنرفز محمد ويقول في عنبرنا موتوا الراجل وخلوه تاجر كيف
يرد عم وهبة ولقى فرصه انه يتكلم تاني
فيه ايه يا محمد
يقوله موتوا عباس يابا
يقوله موتوه ازاي
يقوله بيتكلموا عليه وبيقولوا مات وعمال الواد يضحك
فضل عم وهبة يتكلم كلام كتير انا مش فاكره
وفجأه روحت في النوم
صحيت الساعة 3 ونص الفجر على صوت مين
طبعاً عم وهبة هو فيه غيره
كان بيقوم من على السرير
والدنيا ضلمة
والواد محمد ابنه صحي من النوم يساعده ومعاه عم محمد اللي هو عم نزار
وعم وهبة مش راضي ان ابنه يساعده وكل مأبنه يبدأ يتعصب يروح باصص لعم نزار ويقوله شايف يا عم محمد بيعمل ازاي
يقوله يا عم وهبة محمد بيحبك وبالراحة
وفضل في تعليمات بصوت عالي لحد مالواد محمد ابنه قاله يابا حرام علييييييك يابا حكفر على ايديك ياااااباااا
الراجل يقول شايف يا عم محمد شاهد بيعمل ايه
يقوله بالراحة على ابوك يا محمد انت كده بتاخد حسنات
وشوية شوية لحد مقام ورجع وفضل يتكلم مع عم نزار
ويقوله ياعم نزار انت تديني رقم تليفونك وعنوانك وخد عنواني
لما اقوم بالسلامة
حعملك حتة عربية
يقوله خدامك يا عم وهبة حجيلك
تاخد جبنه نستون .. جبنه نستون جميله
يقوله الله يخليك
ويقوله حعملك حتة عربية قشطه وخد العنوان من محمد
محمد يقوله حديلك العنوان
يقوله حجيلك يا عم وهبة
وبعدين عم وهبة يتكلم مع ابنه ويقوله عم محمد ده راجل كويس وانا عايز اخدمه
وبعدين سكتوا
اخيراً
نمت شوية
لقيت عم صالح على الفجر بيصحيني وبيزغدني
وبيقولي اصحى الفجر اذن
قومت وبعدين لما رجعت ونمت
فضلت نايم ..صحيت مع اول ضوء نور وعامل نفسي نايم
شوية ولقيت الممرض
يا كابتن
يا كابتن
خد الحرارة
وبديني ترمومتر
لما في اخر مخرجت عرفت ان الترمومترات هناك مش بتتغسل اساسا مابالك بقا انهم يعقموها
المهم
اخدنا الحرارة وجت مرات عم وهبة ومشي ابنه
وفضل عم وهبة يشتم في ابنه مع مراته!!
راجل عجيب عم وهبة ده
:)
المهم بيقولها الواد جه وهو خارج بيقولي سلام يابا مش عايز حاجه
قولتله لا
راح بايسني
قولتله هات بوسه كمان
راح مواااه وبايسه
وجت ام احمد اللي كان بيقزقز لب امبارح ده
وفضلوا يعزموا على بعض بشاي وحاجات كده
المهم فضل عم وهبة كان بيتكلم مع عم نزار ده ويقوله اسأل عليا في المنطقة السابعة
يقوله حجيلك يا عم وهبة ان شاء الله
يقوله معروف هناك في المنطقة السابعة اسأل عليا أي حد هناك
عارف قهوة كذا
يقوله اه
القهوتين اللي جنب بعض دول
يقوله اييييييييييييوه
يقوله اللي بيقعد عليهم الشبيحة دول واللي كل شوية يتخانقوا والحكومة بتجيلهم كل شوية
ااااه
يقوله طب عارف البقال اللي هناك يقوله ايوه الراجل التخين الاقرع ده
يقوله اه
يقوله ادعيله ربنا يشفيه
وكل ميحكيلة على حد يقوله اعرفه يقوله ادعيله ربنا يشفيه
لحد محسيت ان البلد كلها عيانين
وعم وهبة بيكمل
اسأل عليا أي حد هناك
أي قطة
أي كلـب
أي حمــــــار
وانا طبعا قاعد ماسك نفسي من الضحك
خلاص يعني معروف لدرجة ان الحمير عارفينه يعني
:D
وهكذا قضيت الليلة دي وصباح اليوم التالي
وخرجت من العنبر وانا بحمد ربنا الف مره على الدرجة اللي كنت بتريق عليها وعمال اقول هي دي الدرجة وهي دي اللي مش عارف ايه
حمدت ربنا الف مره اني خرجت من العنبر ده سليم
وفي نفس الوقت اشتقت اني اعرف اخبار عم نزار ايه
وعم وهبة عمل ايه
وعم صالح عامل ايه
واحمد ويوسف
ياللا ربنا يشفيهم
والهي ربنا ميرجع الايام دي عليا خالص وميوريكم يوم من الايام دي ياااااااااارب

--------------------------------------------------------
الموضوع كان ملون والله وعامل فيه حبشتكنات بس الظاهر ان النت بوظه وبيني وبينكم مش فايق الونه تاني دلوقتي
سلااااام