عارفين الشخص ده
ايوه سواق التاكسي او سيد فوكس في تامر وشوقية او
بطل سلسلة اعلانات السياحة
اللي بتيجي في او تي في
ايوه اللي بيضايق فيها السياح دي
اهو ده بقا اللي انا عايز اتكلم فيه
اينعم الدنيا رمضان و10 اواخر والعيد جاي وكل سنه وانتم طيبين بس انا برضه لازم اتكلم عن سلسلة الاعلانات دي
ايه رأيكم فيها ؟؟
ياتري عاجباكم
واللا عادي يعني
واللا مش عاجباكم
حستنا رأي كل واحد فيكم
بس انا حقول رأيي برضه
-----------------------
سلسلة الاعلانات دي اكثر اعلانات استفزازية شوفتها لحد دلوقتي
من بعد لما مصر كانت عاملة الاعلان بتاع مصر البيت بيتك اللي بيبدأ ببنت لابسة استغفر الله العظيم مايوه بكيني وكأن مصر بلد هاواي
لحد سلسلة الاعلانات بتاعت سيد فوكس ده
الاعلان الاول
بييجي الباشا ده ويعاكس واحده اجنبيه ويحاول يشدها من ايديها علشان يدخلها المحل
وتزعقلة الاجنبية وتتشملل وتقول للكاميرا ان الموضوع ده بيديها انطباع وحش عن مصر
الاعلان التاني يا شطار
ايون صح
بتاع الراجل الاجنبي العجوز ده اللي بيشتري من بازار وعايز يجيب طبق عليه نقش
وييجي سيد فوكس برضه "ياسبحان الله" ويقوله ده ب 200 دولار وعلشان خاطرك 150 دولار
وبغض النظر ان ازاي الاجنبي عرف ال 200 واللا ال 150 اللي بيقوله عليهم بالعربي
المهم انه فهم ان السعر 75 دولار زي مهو مكتوب وان الراجل بيضحك عليه
وال ايه ييجي صاحب البازار يطرده "شوفوا الذمة" وتيجي كمان مراته تزعقله وتقوله حندفع فلوس المدارس منين
ياسلام
وييجي الاجنبي يقول ان السلوك ده برضه مش حلو وينصحنا وهو قرفان
الاعلان الثالث
طبعاً عرفتوه
لما سيد فوكس بيعاكس واحده راكبة في الاتوبيس السياحي على طريق السفر
ودي حاجه تخلينا نتسائل
الاعلان ده خيالي واللا حقيقي
اصلا اصلا في الاصل مفيش عربية بتعدي جنب فوج سياحي على طريق سفر
واللي ربنا ابتلاه وامه داعية عليه يلاقي فوج سياحي وهو مسافر
حيلاقي قبله عربية بوكس
وبعده عربية بوكس
وخارج من العربية كام شاب كده شاطرين وشايلين بنادق ويقولوله ارجع والضابط اللي في العربية عمال يطلع ايده ويشاور للناس يرجعوا
فالمهم سيبكم من كل ده
وفوكس طبعاً عدي
وقرب من الاتوبيس وفضل يبصبص للبت الاجنبية ويعاكسها
وبعدين لبس في مقطورة واللا وقع من على الطريق بالعربية
المهم يعني اتجبس ومراته راحتله تقوله زعلانه على العربية واكل عيشنا
طبعاً سردت الاعلانات من وجهة نظري وحناقشها واحده واحده
اولا حوار الاعلان ده بيدور حولين المشاكل اللي بيتعرض ليها "السياح " في مصر
وهي المعاكسة
والاستظراف
والغش
ماااااااشي
هل بقا ده اللي بيتعرض ليه السياح "بس" واللا المصريين كمان
يعني لما اجي اقول اعلان وتكلفة اولا اقاوم سلوك في المجتمع وهو سلوك الغش او الاستظراف او المعاكسة
يعني مش حقول بلاش تعاكس الاجنبية
والمصرية حلال ومباح
ولا حقول بلاش تغش الاجنبي
واعمل زي بتوع الاقصر لما بيلبسوا اتخن مصري العمة وهم بيتعاملوا معاه معاملة جاز ومش بيرضوا يبيعوله اي حاجه
ولا حقول بلاش تستظرف مع الاجنبي
وتعالا اخنق على خلق الله المصريين الغلابة
اللي استفزني في الاعلان ده
اننا لما نعمل حملة توعية لازم نعملها على السلوك
يعني المبدأ
مش علشان خاطر السياح بيدولك فلوس "ياعالم هي فين " نقوم منعملش معاهم ونعمل مع غيرهم
ولما نحب حد يدي توعية
مجيبش اجنبي يوعي المصري علشان عيب وبعدين يعني هو مفيش اجنبي فيهم
اتسرق في بلده
او اتعاكست في بلدها
او حصل فيهم حاجات افظع كمان
ال انطباع وحش عن مصر ال
انا قولت رأيي
وانتم حرين في رأيكم طبعاً
وفي انتظار ارائكم
8 comments:
أهو بيحاولوا يا زحل ... مرة تخيب ومرة تصيب إنشاء الله
يمكن اللي يستفيد من الإعلانات المرة دى الأطفال - المرة الجاية تحقق هدفها و لو محققتش كفاية الجيل اللى طالع يكون فاهم الغلط فين
فاطر إعلانات طول ما ندي ضهرنا للترعة عمر البلهارسيا فجتتنا ما ترعى ... الحملة دي و بعد يجي 20 سنة أهو أثبتت نجاحها
فاكر حملة كريمة جفاف بتاعة المحلول ... برضة رسقت - أهو كل الأطفال اللي شافوا الإعلانات دي بقوا عرايس و عرسان و هما سبب الزيادة السكانية اليومين دول :))
فاكر حملة البوطاس اللي العيال بيشربوه ...
فاكر حملة رغيف العيش المتقطع أربع تربع :)
أهو بيستصلحوا أرض لسة بكر - ولا إييه :))
لا فض فوك
بينا توارد خواطر
انا من يومين بالظبط كاتبة نفس الكلام
http://tahyyes.blogspot.com/2008/09/blog-post_3213.html
لا بصرااااااااااحه
انا بالنسبالى
ليه تسكن ف شقه 150 متر
لما ممكن تسكن ف فيلا وتلعب جولف
وتقعد ف 150 فدان خضرا
اكثر استفزازززززا
ولا شرين اللى وفرت وجابت لنفسها ولابنها كتاب
وعادل اللى اتجوز بعد ماصلح الحمفيه
هههههههههههههههههههه
كل سنه وانت طيب
عيدك سعيد
جدو اسكندر
مع حضرتك يا باشمهندس في ان الاعلانات اللي بتتكلم عليها اثبتت نجاحها فعلا وانا بشجع الاعلانات دي وشايف زي محضرتك شايف بالظبط
لكن اعلان السياحة ده يختلف
الاعلانات اللي حضرتك بتتكلم عليها بتعلم سلوك بشكل عام
يعني لو حدي ظهري للترعة في مصر
برضه حدي ظهري للترعة في باريس ده لو فيها ترع اصلا
:)
لكن لما يقول بلاش تعاكس السياح او بلاش تغش السياح ده مش تقويوم لسلوك لأ ده تقويم لتعامل مع فئة محدده وده فيه تفريق وخطأ وده اللي بيستفزني
ارجو ان تكون وجهة نظري قد اتضحت بشكل اكبر يا باشمهندس
ومنور في اول ردودك في مدونتي
وشكراً لزيارتك
:)
جبهة التهييس الشعبية
سعدت جدا لما قرأت البوست عندك وسعيد اكثر بتزايد عدد اللي بقا عندهم توارد افكار
:)
-----------------------
دكتورة اجدع بنوته منورة
بصراحة دي اعلانات مستفزة جدا فعلا برضه
بس زي مبقولك الاعلانات دي ممكن تعدي يعني لو اعتبرنا انها لفئة معينة من الناس
لكن اعلانات السياحة دي واللا بتاعت اربط الحنفية دي فعلا مستفزين اوي علشانهم موجهيينها لكل فئات الشعب
وحسبي الله ونعم الوكيل
"اتبرعتي لمستشفي 57 واللا بنك الطعام واللا لسه"
دي اعلانات كويسة برضه بصراحة مش مستفزه
عم زحل
كل سنه وانت طيب
بص انا مش مجمعه الموضوع قوى عشان بقالى قرن غزال ماباشوفش فيه التليفزيون
بس افتكر انى شفت اعلان مستر فوكس ده وهو سايق تاكسي ومعاه اجنبي عاوز يروح المتحف
وقعد يلفلفه كتيييير عشان ياخد فلوس
اولا انا اتخنقت ساعتها من تعليق الاجنبي فى الاخر
شكلنا بقى وحش قويييي
ويعنى هما لما يعملوا اعلانات يبينوا فيها الوحش فاكرين ان الناس هايطلع فى وشهم الاحمر ويتعدلوا
بالعكس
الناس ماشيه بسياسه العند
هاتقول يمين هايقولوا شمال
كمان عندى سؤال
هى مراته بتتكلم عادى كده وهو بيبصبص لأجنبيه؟؟
بس خلاص
انت اكيد عندك حق ان الكلام المفروض يتوجه لكل الفئات .. مش معاملة السياح بس
بس تعالا نبصلها من ناحية تانية ان اولا وزارة السياحة هي اللي عامله الاعلانات دي .. ثانيا انت عارف اكيد اللي بيحصل مع السياح من اشخاص من فئات محددة .. و انت ميرضيكش ان السياح تروح بلدهم تقول علينا كلام مش اد كده كفاية الفكرة اللي عندهم اصلا
انا عن نفسي بتدايق جدا من نظرة الحكومة للشعب في تعامله مع السياح .. يعني لما كنت في الاقصر و اسوان كان فيه تعلميات شديدة ان محدش يتعامل مع السياح .. و انت عارف لما بيكون فيه بس سفينة في المينا عندنا بيعملوا ايه
و ده ميرضيش حد
شركة تنظيف شقق بالقطيف
شركة مكافحة حشرات بالقطيف
شركة المثالية للتنظيف
شركة المثالية لمكافحة الحشرات
شركة تنظيف منازل بالخبر
شركة تنظيف فلل بالخبر
شركة تنظيف شقق بالخبر
شركة عزل اسطح بالخبر
Post a Comment