اهلاوي وسط الزملكاوية !!!!

عنوان غريب
الزمان

الساعة السادسة والنصف مساء يوم الاحد
28/1/2007
المكان
استاد القاهره الدولي
الحدث
ماتش الزمالك ضد فريق افريقي كده لحد دلوقتي مش فاكر اسمه في بطولة دوري الابطال الافريقي
الحدث الاهم تواجدي وسط جمهور الزمالك
زمالك !! ازاي يا جدعان ده انا اهلاوي
اهو ده اللي حصل
طيب نرجع الشريط من الاول يمكن نفهم
النهارده كنت متجه للقاهره علشان نروح رحلة معرض الكتاب والحسين كالعادة مع الكلية
فوجئنا بشبوره ازالت الرؤية تماما
من 6 الصبح يا جدعاااااان لحد الساعة 9 في بورفؤاد

الجامع اللي عند المعدية مش شايفينه واحنا جنبه


سبحان الله


المهم بعد شد وجذب وانتظار وعطله


خرجنا من بورسعيد الى القاهره حوالى الساعة 10 ونص الصبح


الى معرض الكتاب


يوم طويل عريض الحمد لله عملت فيه رقم قياسي جديد لي في القاهره


من معرض الكتاب لجنينه مول وراجع لمعرض الكتاب تاني ثم استاد القاهره ثم معرض الكتاب ثالث ثم الحسين او بالظبط نص الطريق من معرض الكتاب للحسين


كل ده مشي


الله اكبر متقرش يا جدع انا رجلي مش شايلاني دلوقتي خالص
!!!!!!!!!

المهم نرجع للموضوع الاساسي


جه صاحبي زملكاوي كان معايا في الرحلة قالي متيجي ندخل استاد القاهره


التذكره ب 5 جنيه درجة ثالثة وقشطة اوي يعني وماتش افريقي وحنهيص


مكدبتش خبر


قطعنا ودخلنا الماتش وبعد مدخلت من حدود الاستاد وبعد (التفتيش الذاتي ) المهم


افتكرت اني لابس فانلة الاهلي


تحت هدومي


رحت مظبط الهدوم علشان الفانله متبانش لحسن الناس تفتكرني جاي اضايقهم واللا حاجه


وتوكلنا على الله ودخلنا الاستاد


الدرجة الثالة شمال تحت يافطة رابطة محبي الزمالك في طنطا


قولت لما نستمتع بالتشجيع


ماتش افريقي


الزمالك الاقوى


ومفيش مشاكل لما يكون اسلوب جميل في التشجيع


فضلت اتفرج على الماتش وهوب جول في الدقيقة الثانية برأس عمرو زكي


كويس


والثاني بعده حازم امام


قشطة الماتش للزمالك ومبروك لمصر


شوية ولقيت بقا الجمهور المحترم

اللي عمال يشجع الزمالك بإستماته

بعد الهدف الثالث

ضمنوا الماتش

وتحولوا بقدره قادر من تشجيع الزمالك

الى سباب مستميت بأسوأ الالفاظ

الزمالك

بداية من الزمالكوية راجعين يا .......ين برضة

والحرامي مين.... شوبير

الى سب معتز اينو بشتائم عجيبة

!!!!!!!!!

وطبعاً سيرة الحاجه الوالده كان جاي بقوه في المواضيع دي كلها

لأ ويبدأ الجمهور بتاع طنطا

في الدرجة الثالثة يشتم

يرد عليه الجمهور من الدرجة الثانية بصوت اعلى

وبعدين الجمهور من الثالثة يمين ويشتم

واتقلبت المباراه الى مباراه في فن السباب ان صح الاسم فن

وشتيمة في الحكم

وشتيمة في معتز اينو

وشتيمة في الاهلي

وشتيمة في الناس عامة

تضايقت جدا من هذا التصرف الهمجي

كان نفسي يكون معايا كاميرا علشان اسجل اللحظة التاريخية اني اكون استاد القاهره

وحرجع اقول انا اهلاوي

متكسفتش اني ادخل ماتش للزمالك

علشان اشجع في مكان جميل زي استاد القاهره

فريق مصري

في بطولة افريقية

ربنا يهدي الجميع

كان معكم

محمد ابو العافية

مراسلكم من الدرجة الثالثة شمال ورا الجول

==================

على الهامش

الكورة مع احمد ... احمد مع الكورة

الا هو مين احمد ده ؟؟؟؟