عارفين اعلان ضعف الرصيد بتاع اتصالات
اهو انا عايز اقول
القانون الجديد ضعف الرصيد
القانون السعيد ضعف الرصيد
القانون الشديد ضععععف الرصيد
هو ده قانون المرور الجديد
بما اني ماشي من غير ترخيص بقالي اكثر من 8 شهور وده لأسباب خارجه عن ارادتي لظروف الروتين المصري
بس عجبني قرارات قانون المرور الجديد
التشديدات عجبتني
بس فيه عقوبات فرستني
--------------------
في القانون السعيد ان محدش يمشي من غير حزام واللي جنبه كمان ولو ملبستش الحزام
ذنبك على جنبك
تدبس في غرامة فورية
وكما قال الشعباني شعبان عبد الرحيم زعيم عائلة الشعبانيين
اربط الحزام وكفايه كلام
-------------------
في القانون الحديد
ان لازم تقابل بين كل كمين وكمين 3 كمائن علشان ضبط المجرمين معتدي الاجرام من سائقي السيارات اللي اوقعهم حظهم العاثر مع لجنه من ال500 لجنه لحفظ الامن والامان وهم بينتهكوا اقصي حرمات القانون الجديد
ومش معاهم مثلث عاكس
يااااااااااااااااه
فينك يا شعبولا لما تقولنا ظبط المثلث لحسن م الغرامة حتفلس
------------------------
في القانون الشديد
ممنوع تدخن في عربية اجرة
وده شئ اسعدني جدا
بس انا حسيت انه لما تيجي تروح القسم وتبلغ عن موبايل مسروق
يقولك استعوض ربنا لو كان ثمنه مش اد كده يعني
وفي نفس الوقت يدفع سيادتك غرامة فورية 50 جنيه للراكب وحوالى 75 جنيه باين للسائق في حالة انك بتدخن وممكن توصل الغرامة ل 300 جنيه
خير بس شايفين توازن العقوبات والقرارات
مش بقولكم النظام الشديد
--------------------------
في القانون الجديد انك لو مشيت عكس السير
تدفع من 1000 ل 3000 جنيه يا معلم وفيه احتمال وارد تتحبس سادتك
قشطه جدا
طب ليه
اصل سيادتك كده بتشرع في القتل
يا حلاوه يا حلاوة
يافرحة طنط ام ممدوح اللي متحبسش ولا يوم واحد عن كل واحد مات هناك
ايوه في الحته اللي بيعملوا فيها بلام بلام بلام
-------------------------
في القانون الجديد لوح معدنية جديده
عليها اسم
مصر
وعلى اسم مصر التاريخ يقدر يقول ماشاء
ده نمر مصر عندي احب واجمل الاشياء
بس ياتري النمر دي
حتلغي نمر الهيئة الدبلوماسية
والهيئة القضائية
والشرطه
والكوسة
والمحسوبية
والفيمية واتفضل ياباشا
واللي قالب نمر وحاطط نسر واتفضل يا بيه
ياتري
-----------------------
وانا وانت والقانون وسمعني سلام قوم يا مصري وسيب الكرسي
بتاع العربية علشان متقومش في كمين ويعملوك ملوخيه
-------------------------
حبه جد
عجبني التزام الناس غصب عنهم بالقانون علشان العقوبات الغليظة
ويارب يطبق على الناس كلها
التاكسيات بقت رخمة جدا عايزين نعمل حملة نبلغ عنهم فيها علشان يتربوا شوية
عجبني جدا انه مفيش تدخين
عقبال مننتهي بقا من رشوة العساكر
اللي بتبقا في عز الظهر في ميدان رمسيس
وفي كل حته للاسف
وربنا يعافينا
ضعععععععععععععف الرصيد
5 comments:
ههههههههههههههههههه
هو انت كمان بتسوق م غير رخصه
اهلا وسهلا
انا دلوقت ملتحقه بمدرسة المرور
ههههههههههههههه
يالرخصه يالحبس
يالموتورجلى
بس ع فكره
بدا يهدى تانى
بعد مالناس شالت السبح والدباديب
وخربشت الاستيكرز والنسر وبتاع
رجع الحال كما هو عليه
زيارة أولى..
موضوع جميل..
لكن أنا عايز أبدي اعجابي بالموضوع بتاع أحمد السقا..مش الموضوع نفسه بس طريقة تفكيرك ونظرتك للفكرةاللي كانت في بالك..طريقة كلامك مثيرة للاهتمام ..اتمنى يكون الانطباع اللي وصلي صح ..
اسمحلي اتابع...
دمت في حفظ الله
دكتورة اجدع بنووته
انا بسوق برخصة
وبعرف اسوق كويس الحمد لله
بس العربية هي اللي ملهاش رخصة
:D:D:D:D:D:D
وعندك حق فعلا
احنا نهيص نهيص ونطلع على مفيش في الاخر
---------------------------
ميرو
منور المدونة
وفعلا اللي وصلك صح انا بحاول الاقي الجانب الايجابي في الحاجه اللي ادامي علشان السلبي بقا كتير والواحد محتاج يلاقي ايجابي بس اليومين دول
مريت بالصدفة وعجبتني المدونة
وعجبتني اوي الطريقة
اللي اتناولت بيها موضوعاتك
انا علقت اهو فين الشاي بقى؟؟:D
تقبل تحياتي
بما اني ماشي من غير ترخيص بقالي اكثر من 8 شهور وده لأسباب خارجه عن ارادتي لظروف الروتين المصري
:):):):) 3o2bal 100 sana :D :P:P:P:P
Post a Comment