لما حد يقولك تعالى حساعدك ويقنعك انه حيساعده
متطلعش فيه قرفك
ومتهاجموش
ومتحبطوش
طالما عنده امل
متهدش الامل اللي جواه وحاول تاخد شوية من نور الامل اللي عنده
وتساعده
مواقف
----
من فتره كان فيه مسابقة على مستوى الجمهورية اسمها مشروعك حقيقة
المسابقة دي تختص برياده الاعمال
يعني لو عندك فكره مشروع كبير تقدم فيها وتاخد تدريب مهم جدا ومجاني علشان تطور من مهاراتك وبعدين فيه 20 مشروع حيكسبوا ويتنفذوا ده غير ان اللي حيشترك وياخد تدريب حيستفاد جدا بالتدريب
لما جم بتوع المسابقة دول بورسعيد ونظمنالهم لقاء كبير
وللعلم المسابقة دي معمولة مع مركز تحديث الصناعة ووزارة الصناعة والتجارة وكمان المؤسسة العربية للعلوم والتكنولوجيا
المهم يعني
لقيت الناس عمالة تهاجم بتوع المسابقة
اللي يقول قدمت اختراع مش عارف ايه واترفض
واللي يقول انتوا جايين تقولولنا شاركوا متشوفوا الحكومة
طب عيني في عينك كده يا انسان يا بشري
اللي جاي يقولك هات مشروعك علشان اساعدك ده
المفروض تتخانق معاه وتزعقله
واللا المفروض تشكره وتبدأ معاه امل جديد
------------------------------
موقف 2
حرجع لموضوع البوست اللي فات
لما تكون كلية الهندسة في بورسعيد
ححكيلكم عن الكلية من سنتين
التخت مكسره
الغرف دهانها قديم ومكتوب على الحيطه
كهرباء مش اوي والكلية 4 ادوار ومدرج واحد بس
ولو قولنا السنه اللي فاتت
كانت الامتحانات بنظام غلط
بمنتحن 3 مواد اسبوعيا وامتحانات التخلفات في جدول الامتحانات يعني ممكن حد يمتحن 4 مواد في اسبوع
امتحانات الميد تيرم في اي ميعاد
وبمزاج الدكتور
والدنيا حيص بيص
وفي سنه
بقينا بنمتحن يومين في الاسبوع
التخلفات لها جدول مستقل منفصل عن جدول الامتحانات وبفرق اسبوع
امتحانات الميد تيرم في ميعاد ثابت
النتائج بقت على النت
معامل النت اتفتحت
الطلاب بيحطوا جداول امتحاناتهم بما يتناسب معاهم
التخت كلها بقت جديده
والغرف بستاير وبقا فيها داتا شو واجهزة كمبيوتر
فيه مجمع مدرجات وقاعات جديد بيتشطب واشتغل فيه 3 قاعات وحيكون شغال على بداية السنه الجاية
المهم يعني كل ده
ونيجي نقولهم تعالوا اشتركوا في مناقشات مع ادارة الكلية بحيث لو عندكم اي مشكله تانيه تقولوها علشان نتناقش فيها وتتحل بإذن الله
يبصوا بكل قرف
ومن طرف مناخيرهم ويقولك
يوم اجازة اروح انام وبعدين هو انتم حتعرفوا تغيروا حاجه اساسا
لا تعليق التعليق ليكم
-------------------
مواقف كتير
ملخصها
لما تلاقي حد بيقولك حساعدك
ويديلك الدليل انه حيساعدك
متطلعش عينه وتقرفه علشان هو متخلص من اليأس ده بالعافية
اما تساعده وتتحمس معاه
او ترد عليه بحاجه متخليهوش عايز يموتك يعني
انا خلصت
وانتم ايه رأيكم ؟
20 comments:
يعني موافقك جزئيا لأن ساعات بيكون اللي بيقول أساعدك ده قالها كثير وأثبت عدم مصداقيته وأحيان أخرى بتكون النوايا دعائية ففي الحالة دي المساعدة بتستمر وقت الدعاية بس لكن كقاعدة عامة مبدئية موافقك
ازي حضرتك يا باشمهندس
مظبوط كلام حضرتك وانا بسبب نقطة عدم المصداقية دي ذكرت ان اللي بيقول حساعدك يثبت انه يقدر وبأكثر من دليل
وهو ده اللي لازم نسمع منه ونقف معاه
نورت المدونة يا باشمهندس
حلو اوي التدوينه دي
مش عارفه انا فرحانه اوي ان فيه حد لسه بيتكلم عن التفاؤل
اصل الواحد زهق تشاؤم لان في الاخر احنا المضرورين
يارب نساعد بعضنا دايما ونسعي للافضل بدل التخريب والسكوت اللي احنا فيه
تدوينه حلوه فعلا
معااااك طبعا
اعداء النجاح كترواا اوى الايام دى
اصحاب النداره السوداء بقوا مليين كل حته
فعلا اى فكره اى طاقه ايجابيه
بيقضوا عليها فورى قبل متلحق تبدع
السلام عليكم ورحمة الله وبركاته
...........................
عندك حق يا محمد باشا والله
دى مشكله انهم بيتكلموا اكتر ما بيسمعوا !
بحب فيك الايجابية اوى
تحياتى يا صديقى
عندك حق ,
بس من كتر ما الوحش كتر في ناس مش بتصدق ان في حد ممكن يساعد بدون مقابل او مقابل صغير و نيتهم سليمة
لازم بيفكر الأول : طب هو مصلحته ايه من مساعدتي ؟؟
مش بلوم التفكير ده بردو لأن اللي بيعملوا كده كتير
بس الواحد لازم بتفائل و يشجع اللي بيساعد فعلا
تدوينة جميلة
نفسي كليتي كلها تقرا البوست ده
بذات دفعتي دفعه سنه اولي اللي مش مجربين الهم و مش عاجبهم العجب (مش كلهم طبعا)
انا مبسوطه اوى انك بتبص للنص المليان من الكوبايه .
بس يارب نظرتك دى ماتتغيرش من الواقع اللى احنا عايشينه.
ممكن اسالك سؤال ملوش علاقه بموضوع البوست خالص.
انت حاطط الاغنيه دى ع المدونه ازاى؟؟
تعرف هو عندك حق
و معندكش حق
عندك حق فى اللى يساعدك لازم نشكرة
لكن لما يكون بيساعدك و بيتكبر عليك
تعمل ايه
لما يكون بيساعدك و عامل فيها انه ابن بارم ديله تقول ايه
لما تروح تقدم و تلاقى واحد قاعد منجعص
و يقولك بكل عواجان خد املى الاستمارة دى
و لو اتغلبط فى ملوها و عاوز تسأله فى حاجة
يهاجمك و يقول احنا ما وراناش غيركوا
طب يا حضرة المحترم وارك مين غيرنا هو ده مش شغلك
يروح قالل ادبة عليك
----------------
بالنسبة بقى لكلية الهندسة
كتر خيرهم والله
انهم افتكروا ان فى كلية عاوزة يتعمل لها صيانة
من الفلوس اللى الشعب بيدفعها
اصل ههما المفروض يخدوا الضرايب لنفسهم
كليه واحدة
تعالا شوف مجمع الكليات فى اسكندرية
مكان اثرى
اى والله اثرى
معبد الكرنك
ابو سمبل
لسة فاكريين دلوقتى يعملوا فية حاجة
مفاية كده
تحياتى ليك
عاشقة الفردوس
منورة المدونة
اشكرك على كلامك الرقيق
وانا مش بتكلم عن التفاؤل لمجرد الكلام عن التفاؤل
وده السبب يمكن ان الناس حاسه بقرف ومعندهاش استعداد للتفاؤل
انا بتكلم من واقع ملموس وهو اللي بيشجعني اكثر واكثر اني اتفائل
وطبعاً الامر كله بيد الله سبحانه وتعالى وتفائلوا بالخير تجدوه
وبرجع واقول تاني ان فيه كتير يخلينا نحس ان فيه امل
يبقا ليه منفائلش
تحياتي وشكراً لزيارتك
دكتورة اجدع بنوته
شكراً لزيارتك وتعليقك
بالنسبة لأصحاب النظاره السوداء انا بديهم عذر يمكن علشان ممكن يكون منهم اللي حاول ومقدرش
لكن اللي مش بديله عذر
اللي الحاجه بتبقا ناقص تتكلم وتقوله افهم بقا اهو فيه امل
وبرضه يفضل مصمم على التشاؤم وارتداء النظاره السوداء والنظر بشكل تشاؤمي للامور
واللا ايه ؟
يوسف باشا المصري
منور يا باشا
والله الايجابيه موجوده طول مفيه دعم وكلمه طيبة
تعرف سهل ان الواحد يكون ايجابي
لو فكر انه لما يكون ايجابي حيقدر يفيد نفسه وغيره ويسيب حاجه قبل مييجي الوقت اللي ميبقاش فيه موجود
وينوي ان كل ده لوجه اللي سبحانه وتعالى
ساعتها سهل اوي يبقا ايجابي
الا قولي
اخبار الصورة اللي على العلبة ايه ؟؟
:D
بونجو
معاك حق
لكني حرجع واتكلم في نقطة محدده
انا ذكرت وقولت لما ييجي حد يساعدك
ويثبتلك انه حيساعدك
ومش عايز منك غير انك تقف وتشد حيلك علشان تاخد حقك
يبقا لازم نسمع كلام اللي بيقولنا كده
وزي مقولتلك مش بلومهم على النظره دي لكن بلومهم ان فعلا فيه حاجات تخليهم يتحركوا بقااا ويطالبوا بحقهم
منور المدونة
bella
هاتيهم زياره هندسة بورسعيد
او دخليهم المدونة
وخليهم يقولوا اللي عندهم
ونرد عليهم سوا
وان شاء الله يقتنعوا
ويااااارب
pussy
يااااااااااااااارب
ان شاء الله مش حتتغير
بس نساعد بعض
الاغنية هي كود بيتحط فيه لينك الاستماع من اي موقع فيه لينكات استماع
هاتي اللينك وان شاء الله اديلك الكود كامل
مواطن مصري نايم
متفق معاك تمام الاتفاق
ولكن اللي بتكلم عليه هنا حاجه تانيه بتكلم عن ناس
بتحب تساعد وتخدم
وبتزعل لما بتلاقي سلبيه
وبتتجنن لما السلبي يعمل حركات تفيد بعدم اهمية المجهود بتاع المتطوع ده
فهمت قصدي
بص يابني هي المشكلة في اللي انت بتقوله
المشكلة ان شريحة كبيرة قوي اتعودت يجيلها كل حاجة لحد عندها من غير متبذل اي مجهود
يعني انت بالنسبة لهم من الاخر مصباح علاء الدين
ماشي اتعودوا انهم تجيلهم الحاجه لحد عندهم انا معاك بس ساعات بتيجي حاجات مينفعش نجيبها ولازم يساهموا فيها علشان تتجاب وبعدين حلاوة ومتعة انك تجيب حاجه اكبر بكتير من متعة انك تروح تنام
فاهمني وانت راجل نشاط قديم وعارف لذة انك تعرف تقتنص حاجه وانت ناوي نيه خير
:D
وشبيك لبيك عبدك وبين ايديك
:D
ذاكر بذمه يا نوفا
عايزين تقدير
قدها و قدود
اللهم وفقه و وفق ابناء المسلمين
و سلام :)
Post a Comment