تحديث
موضوع جديد في بهارات الاتصالات
-------------------------------------------
وصلنا البوست اللي فات اني بصيت على رئيس الجبهة
وروحت بيتنا
لما روحت بيتنا كان خلا حان الوقت لإغلاق المصيده وضرب الجبهة دي بالكامل في سنه اولى علشان اللي حصل ده مينفعش السكوت عليه
مش كده واللا ايه
ايون كده خليكوا صاحيين معايا
عملت قائمه فيها اسمي واسم واحد معايا في قسمي من جبهة البورسعيديه
و2 من قسم حاسبات من الجبهة التانيه المختلطة
طبعاً ..منا نازل لوحدي المعركة كلها بين القوائم وانا مع نفسي
نازل مستقل
المهم عليها بقا اتكلمت مع مجموعة من المرشحين زمايلي وضربنا القائمة
وهنا السر بقا
اسمع يا معلم وشوف الافكار البسيطة اللي تغير المسار
جيبت قائمة الجبهة البورسعيديه
وشيلت اسم منها وحطيت اسمي مكانه
وصورتها نسخ كتير.... ونفس الكلام مع القائمة التانيه
وصورتها برضه
بقا ايه يا معلم بقا
ايون عليك نور
بقت القوائم تعدي من ايد الناس يفتكروا ان القائمة بتاعتهم علشان عليها اللوجو بتاعهم
سواء دول او دول
وطبعاً محدش واخد باله من الحركة بتاعت تغيير الاسم دي
ولا حد يشك ان ده ورقهم بس اساسي متغير بقا زي مقولنا
اختارت كمان معايا شوية مش مرشحين نفسهمن لكن صحابي وجدعان اوي
وعليه عملت جبهة ثالثة مختلطة بقيادتي انا والمجموعة اللي معايا في سنه اولى بس
اليوم ده منساهوش في حياتي ..كان اكثر يوم مرهق لدرجة اني وقعت في الارض من كتر التعب مكنتش قادر اتحرك وكان عندي برد شديد ده غير ان اسم الشهره بتاعي مكانش مكتوب اصلا وده تطلب مجهود زياده علشان احط الاسم بتاعي بالشهره
المهم النتيجة اللي طلعت بعد انتهاء الانتخابات كانت ايه؟
هاااااا
ايون الواد اللي لابس ازرق هناك ده جاوب صح
نكمل بعد الفاصل
صوتك امانه ..متبيعوش ببتنجانه
عدنا
بعد لما طلعت النتيجة ظهر اللجنة الفنيه
الاول شهاب وده كان من الجبهة المختلطة ب134 صوت
الثاني العبد لله ب 132 صوت
واول الراسبين في لجنتي كأن شبيهي في الاسم ب 130 صوت
ياااااه
متتخيلوش بعد الموقف ده الواحد اتغيرت حياته في الكلية كتييييييييييير
المهم نرجع للأصل
شوفتوا الانتظار واتخاذ وضع الدفاع انك لما تحس بالخطر تأخذ جنب وتستنا اللي ادامك يغلط
ويتمادي في الخطأ ساعتها مش حينتبه وانت بتنسج خيوطك حوليه وتقفل عليه المصيده
طالما هو غلطان
على فكره
السنه دي الي كان نازل يمسك الاتحاد اللي عمل في الحركة دي سقط في الانتخابات من الاصل ومبقاش عضو اتحاد
شوفتوا بقا كان اقوي وسيله للنصر ازاي
-----------------------
على الهامش
انا خلصت امتحاناااااااااااااااااااااااااااااااااااااااااااااااااااات
اطول سنه في حياتي
سنه 3 هندسة الاتصالات والالكترونيات ببورسعيد
سنه رهيبة
ماراثونية
مش مصدق انها خلصت
يارب تطلع النتيجة على خير يارب
24 comments:
ده انت معلم كبير يا باشمهندس زحل
ايه ياعم المعارك اللي انت عايشها دي
بس بيني وبينك في ناس متجيش الا لما تنضرب على نفوخها
انا سعيد جدا اني متابع مدونتك يا زحل والله
تقبل تحيتي
الحمد لله بس يارت تكون عدت على الخير انا طبعا قصدى على الامتحانات والنتيجة تكون على حجم المجهود المبذول وانا فاكر اليوم اللى انتا بتحكى عليه وفعلا فاكر ان اسمك كان موجود فى القائمتين لحد مشرحتلى اللى حصل
يلا بالتوفيق وعقبال انتخابات الاتحاد الجاى بس عايزين الامين
كاسبر باشا
والله سعيد بمتابعتك الدائمه وبعتذرلك عن عدم انتظامي في الرد في مدونتك
بالنسبة للمعارك
فدي حلاوة الانتخابات من غير المعارك دي ميبقالهاش طعم
وانا سعيد اكثر انك بتشرفني بالزياره
محمد باشا حسين
الحمد لله عدت على خير الامتحانات او متهيألي يعني
وربنا يستر يارب في النتيجة الواحد معادش مستحمل السنه دي خلاص
اه اليوم ده فعلا انا فاكر اني فسرت لمجموعة ناس عن الموضوع ده بتاع القوائم وانت كنت منهم
وبعد لما خلصت الانتخابات فضحت الدنيا على الحركة دي
:))
كانت ايام لذيذة اوي وربنا يرجعها يارب السنه الجاية في انتخابات يااااااااارب
ولا يهمك يا زحل
بس خلي بالك انا كنت عاذرك عشان الامتحانات
لكن دلوقتي ملكش عذر عندي
:)
مبروك أولا انتهاء الدراسة وبالتوفيق
سنة ثالثة اصعب سنة دائما ونفسي أفهم حتى كانوا بيسموها المذبحة عندنا
المهم حضرتك عملت إيه لما نجحت بقة في الانتخابات
أوعى تكون قضيتها نوم ولب
مبرووووووووووووووووووووووووووووووووك
ألف مبروك يا زحل ، عقبال ما تخلص خالص وتتخرج بقى من هندسة
بس يا ترى ناوى ترشح نفسك فى الانتخابات السنة الجاية ولا ايه
ما تنساش التاج بتاعك يا زحل
مبروك انتهاء الامتحانات يا زحل..و انت في سنة تالتة دي اصعب و اتقل سنة في هندسة..افتكر اني كنت بكلم نفسي فيها و مبانامش...بصراحة يا ابني احمد ربنا انها عدت على خير...ربنا يكرمك
و ده انت بدأت الانتخابات بدري بدري..بس عارف...كل معركة و ليها باب للنصر فالحرب خدعة...بس في حالة لو فهمت الطرف التاني كويس و عرفت تخدعه...بس متبقاش دفاع..تبقى هجوم منظم
محمد ... عارف رغم انى انغمست في موضوع الانتخابات ده
من غير مناسبه
الا انى حبيت فيه التعب والنتيجه
واتعلمت منه كتييييييييير
الا انه في الحقيقه
مقرف جداا من جواه
مؤامرات وناس بتكذب وناس بتزور
وقال ايه
نرجع نقول الحكومه بتعمل كده ليه
ونعيب على تزوير انتخابات مجلس الشعب مثلا
من بعد الانتخابات
عرفت ان العيب فينا
ودايما بقول لو مش احنا احنا يبقا هما مش حيكونوا هما
بالنسبه للنظريه الاستورميه
اشهد انها بتنفع فعلا مع هذا النوع من البشر
همسه صغننه: لو عايز تعملها صح وتلجم الفار في بيته
متكتبش ده هنا
(ايموشن بيغمز بعينه)
zo7al basha.
heyya el 7arb ah 5ed3a bas ana mo5talefa m3ak fel 5ed3a bta3tak de..
3aref ana law makanak? a2of a7ott esmy 3afya w amshy qanoony w yeb2a kol wa7ed 3aref el wara2a ely f 2eedo de bta3et eh ya emma mad5olhash aslan..
heyya fekra 7elwa bas fekra sawdaweyya shwayya mesh 3la noor ya3ny..
howa ah kol she2 masmoo7 fel 7arb w fel 7ob bas de ente5abat w bas..
thanks
فكره عبقريه يابشمهندس زحل بس محتاجه نفس طويل قوي
وممكن عدوك يموت بالشيخوخه قبل ما يعرف أنه في فخ
بس لما تضرب بتكون في الجون
بالمناسبه : أنا مدون اسكندراني صغير العمر التدويني
وبحب بورسعيد جدا جدا جدا
شوف يابنى
انت استاذ ورئيس قسم
ايه ده مش مصدقه عويناتى
تكتيك تمام
يلا محدش يقدر ينزل فى المعمعه
غيرك يا معلم
........
مبروك يا كبير على الاجازة
وعقبال النجاح بأذن الله
تحياتى
بسم الله نبدأ الرد على باقي التعليقات
كاسبر بيفور
وانا ان شاء الله بما اني خلصت حرجع اوظب على المتابعة تاني ان شاء الله
:)
------------------------------
عصفور المدينة
الحمد لله ان سنه 3 خلصت وهي فعلا مذبحة علشان هم بيضغطو مناهج قوية اوي مع بعض في السنه الثالثة دي علشان تكون رابعة اخف شوية فنفوق للمشروع
بس ده مش معناه ان رابعة مش صعبة
بس 3 اصعب
بالنسبة لعملت ايه بعد لما نجحت في الانتخابات
فالحمد لله لجنتي اللي كنت نجحت فيها وبقيت عضو
اللي هي اللجنة الفنيه
عملنا مسرحية انت حر تأليف لينين الرملي المسرحية دي كان عملها محمد صبحي بس مش مشهورة اوي
كان مدة العرض ساعتين وكان النجاح بفضل الله منقطع النظير
غيره في باقي لجان النشاط الحمد لله كان لي دور في جميع الانشطة منها الاجتماعي ومنها الرحلات و و و
اخيراً كان السنادي فيه مشروع تشجير الكلية والحمد لله تم زرع 50 شجره وشجيره في انحاء الكلية وشكلهم دلوقتي يفرح جدا
وان شاء الله ناوي السنه الجاية انزل الانتخابات تاني بس على منصب افضل يمكن ربنا يكرم واقدر اني عمل شئ احسن بمساعدة مجلس الاتحاد واعضاء الاتحاد والطلبة برضه طبعاً
سؤل في الجول على فكره
:)
بحبك يا مصر
الله يبارك فيكي يارب
بالنسبة للإنتخابات فناوي بإذن الله انزل السنه الجاية على امانة الاتحاد في الكلية ان شاء الله لو ربنا كرمني يعني وقدرت اظبطها واقود جبهة محترمه
ومش ناسي التااج انا جاوبته على فكره ومستني ينزل اهو
:)
نقطة ميه
فعلا سنه 3 اصعب سنه وكلمة بنكلم نفسنا فيها دي قليله
انا نفسي بس في كاميرا اوريلكم ماده واحده من مواد السنه دي وخصوصاً التيرم ده
لحد دلوقتي مش مستوعب ان السنه دي خلصت
بالنسبة للحرب خدعة وكده
بس انا مؤمن ان الانتخابات طالما الناس اللي فيها محترمين يبقا الجبهة تبقا منظمة ولو حصلت مشكله تبقا قابله للحل
انما بالنسبة للي حصل هم اللي بدأو بسوء تخطيط علشان لو كانوا خططوا صح كان الوضع اختلف كتير ومكنش حصل حاجه زي دي وانا مكنتش مبسوط وانا بعمل كده بس كان لازم يكون فيه رد فعل قوي علشان متحصلش تاني الحركة دي
والدفاع اللي انا اقصده
اني اسيب اللي ادامي يتمادى ويهجم ووو وفي الوقت ده بتكوني درستي ازاي تقلبي الترابيزه عليه
فاهمة قصدي
فوكيره
فعلا ده بيحصل ولازم تلاقي اللي بيكذب واللي بيغش واللي بيمشي حاله واللي باكل بعقل الناس حلاوة
ده اكيد موجود
وانتي لما دخلتي كنتي في الانتخابات علشان تكوني عضوة اتحاد وبعد كده بيبقالك دور في الشغل
لكن اللي اكبر منك وللي صعد لمستوى اعلي منك ليكي تحاسبيه لو مشتغلش ولو فضل مش شغال متديلوش صوتك في السنه اللي بعديها
علشان زي مأنتي عارفة عضو الاتحاد اللي بيشتغل بيكون محبوب والناس بتنتخبة وساعاتها بتكوني قوه محدش يستهون بيها حتى لو داخل مستهتر بالشغل
فاهمة
بالنسبة لأكتب هنا الكلام ده فأنا عايز اني مكونش خبيث فكتبت كده علشان الكل يعرف اني لو معرفتش احل موضوع في ساعتها
حستخدم الطريقة دي
خصوصاً لو كان اللي ادامك لئيم
queen
انتي فاهمة اللي حصل غلط
:)
بصي
القوائم دي مش حاجه رسمي او قانوني
هي بس الجبهة اللي بتتكون علشان تدعم بعضها بتعمل قائمة
انما ممكن ينزل اي حد من غير قوائم لكن زي مفهمتك القوائم دي علشان اللي ينزل مع الجبهة فيقدر المشتركين معاه يساعدوة بإنهم يسوقوا القائمه دي وكل واحد يقنع الناس باللي في القائمة فينتخبوهم
فهمتي ايه الفكره ؟
بس انا كنت وقتها الحمد لله اقدر اسوق القائمة لكن علشان اسمي اتشال فحطيته في القائمة وسوقته انما الكلام ده مفيهوش قانوني او غير قانوني
فاهمه قصدي؟
keda-sponser
مش لازم تستنا كتير اوي
بس الفكره انك تستنا لحد متحفظ اللي ادامك
وانا مدون قديم نسبياً
وبورسعيدي
وبعشق اسكندرية جدا جدا جدا
-------------------------------
شيماء
الله يخليكي شكرا
الله يبارك فيكي وعقبال مخلص خالص
يا سلام على الفكاكة بتاعة الناس الجدعان بتوع بورسعيد .. على فكرة مدونتك بتاع الاتصالات جميلة جدا بجد بس أنا قلت اعلق هنا عشان دى الأاصل بقى ..
ربنا يكرمك ويزيدك من علمه
تحياتى
اخف دم
منور يا باشا والله
وربنا يخلك والله كلامك ده ومثل ردودك للي بتشجعني اكتب بزياده في بهارات الاتصالات
وان شاء الله حنزل فيها موضوع النهارده يارب يعجبك
السلام عليكم ورحمة الله وبركاته
ايه دا كله ، دانت ينفع الحكومه تتفق معاك بعقد احتراف ابام الانتخابات وتضرب بيك الجبهات المعارضه ....ههههههههه
انا بقي لما رشحت نفسي في اتحاد الطلبه كان في سنة رابعه ( رابعه بعد اعدادي )
وكان في ناس مرشحين برضو نفسهم معايا في نفس اللجنه
بس العميد قالك ايه بقي ما ينفعش الطالب والطالبه المثاليين يسقطوا في الانتخابات اشطبوا كل اللي معاهم في نفس الجنه علشان ينجحوا بالتزكية ، وعنها ...و اشطب يا جدع ونجحت بالتزكيه مهو اصل اختك كانت الطالبه المثاليه علي مستوي الكليه في سنة رابعه ..ههههه
بلد كوسه صحيح ....ههههه
-----
مبروك علي انتهاء الامتحانات وعقبال النتيجه ، وعارف زي ما باشمهندس عصفور بيقول ان سنة تالته دي اصعب سنه في كل الكليات دا حتي عندنا في صيدله ثالثه دي دماااااااااااار
ربنا يوفقك
تحياتي
:)
خمسة فضفضة
نظام التزكية ده مكانش ماشي عندنا في الكلية لحد السنه اللي قبل اللي فاتت
بعد الحركة اللي حكيتلكم عليها
نزلت السنه اللي بعدها في اللجنة الفنيه
محدش نزل قصادي علشان كان نازل معايا في نفس اللجنه واد تقيل اوي
فخافوا ينزلوا قصادنا
ونجحنا احنا الاثنين تزكية علشان محدش نزل قصادنا مش علشان شطب ولا حاجه
السنه اللي بعدها
الجبهة البورسعيديه يأست وباعت الانتخابات بقا فأصبحت كلها تزكية لنفس التيار المختلط
عقبالي يارب لما اشم الطالب المثالي دي وان كنت لا اعتقد يعني
3
اصعب سنه علشان اللي قبلها تمهيد واللي بعدها مشروع فبيحطوا كل الضغط في 3 وانا شايف ان ده غلط
على فكره السنادي لمفروض عندنا مواد اختياري
لكلية حطت اعلان لطلبة سنه 3 مكتوب فيه
قد تقرر ان تكون المادة (الاختياريه)
كذا وكذا
وربنا يعافينا
ألف مبروك انتهائك من الامتحانات
نتمنى ان نقرأ لك جديدك قريباً
تحياتي
صاحب البوابة
بارك الله فيك
وبإذن الله تجد الجديد قريباً
وفيه جديد في مدونتي التانيه تقدر تنورني هناك ان شاء الله
والف شكر على تشريفك بزياره مدونتي المتواضعة
Post a Comment