السلام عليكم ورحمة الله وبركاته يا مدونتي ويا كل المدونين حبايبي اللي بيشرفوني في المدونة
فتره عصيبة عدت على الواحد الفتره اللي فاتت
فضلت اني معلقش على الردود
واعمل بوست منفصل
لإضاح الاسباب
ولأشياء اخرى
اولها
اني اشكر كل من اهتم بالرد والقراءه والاتصال والسؤال وحتى اللي فتح المدونة وقفلها تاني
بجد اشكركم جدا جدا
فتحتوا عيني على حاجات الغضب والضيق بيخفيها عن الواحد
مع انه بيكون عارفها
الموضوع ومافيه يا جماعة
هو اني منتظر نتيجة سنه 3 طبعاً زي مصدعتكوا وعارفين اني في 3 هندسة بورسعيد قسم اتصالات
المهم ان لما النتيجة تطلع بإذن الله
وبإذن الله خير
نبقا في رابعة
يعني بكالوريوس
سنه رابعه بقا فيها المشروع
وعليه لازم نظبط مجموعات يكون فيها افراد المشروع متفاهمين علشان نقدر اننا نطلع مشروع كويس ونقدر ناخد عليه تقدير كويس بإذن الله
اللي حصل اني كنت معتمد اني مع مجموعة ولنسميها مجموعة رقم 1
فجأه خبر جالي من المجموعة واحد اني مش فيها
قولت طيب
روحت لمجموعة 2
واخذت شبه موافقة
وفجأه
مجموعة 2 بتبلغني اني مش فيها
طبعاً لا يخفى على اي حد فينا اني لما اروح لمجموعة 1 هم اصحاب الدرجة الالى
ولما اروح لمجموعة 2 فهم اصحاب الصف التاني او اللي علاقتي بيهم اقل شوية بالاحتكاك يعني
طبعاً لما لقيت كده
بصيت لنفسي وقولت ليه
انا اتأخرت على اي حد في ايه
هل انا بقيت نقطة ضعف للدرجة دي ؟
هل كل الموجودين اقوى مني علمياً او عمليا او مفيدين اكثر مني ؟
طب هل جه الوقت اللي اطلب من حد طلب وانا محتاج اني اكون فيه معاه ويساعدني وبعدين تحصل شبه اتفاق اجماعي اني مكونش موجود؟
طبعاً كنت واثق ان العيب عندي
وعلشان كده بدأت احط نفسي مطرحهم
واحد بيجيب مقبول
مشتغلتش عملي الا السنه اللي فاتت وعملت شغل بسيط
يعني مبدأياً دي اسباب رفض
وعليه مزعلتش منهم كأشخاص
ولكن زعلت من الموقف
اللي مينفعش مكانش يضايقني
ولكن مر يوم وبعده يوم
واراد الله ان يرزقني بما يفرحني
رؤيتين فرحوني جداً في المنام
وكان فيه نتيجة اختبار كنت منتظره للتدريب في احدي الشركات الكبرى في بورسعيد
وبفضل الله جاء الخبر بإني عديت الاختبار انا وزميلة واحده في قسمي
فياسبحان الله
احمدك يا ربي واشكرك على كرمك وسعة رزقك يا كريم
الحمد لله افضل حالا الان
الحمد لله كل ما مضى انتهي ونسيته وفتحت صفحة جديده بيني وبين نفسي وعلاقتي بصدقائي انفسهم
ولن اغير تعاملاتي بإذن الله
واسألوا الله لي الثبات اني ممنش على غيري بفضل ربنا هو اللي وفقني اعمله
اشكركم جدا يا جماعة
بجد
----------------------------------
تابعوا في مدونة بهارات الاتصالات
حكاية عم محمد الجزء الثاني
23 comments:
هات حتة بطاطا
هو بتاع اﻵيس كريم عندكم بيبيع بطاطا
شد حيلك يا عم والله ممكن تعمل مشروع كويس في أي مجموعة
الحمد لله يا راجل
بس أحنا معرفناش أنت هتشتغل مع أنهو مجموعه
بعدين هو انت بتحب الآيس كريم بالفانيليا ولا ايه
مبروك على التدريب و لو عاوز اسكندريه كلها تبقى في المجموعه بتاعت المشروع بتاعك شاور انت بس يا معلم
سلااااام
:)
الحمد لله ربنا يسعدك يارب على فكره أنا كنت كل ما أدخل المدونه بتاعتك ده كنت باضحك من قبل ما أقرأ كلمه مش عارفه ليه:)))
ولما قريت البوست المقرف الى فات سورى يعنى اضايقت قوى قلت ياربى دا أنا كنت ما صدقت لقيت حد متفائل
وعلى رأى جدتى أمشى أهز كتافى واحد حنين وواحد قاسى
يالا سلام
السلام عليكم ورحمة الله وبركاته
ولا يهمك ، اكيد هاتلاقي مجموعه كويسه وتقدر انك تشتغل معاهم في المشروع ويكون بينكم تفاهم اكثر من اصحتبك الانتيم او اللي انت كنت فاكرهم كده
وزي ما حبيبنا المصطفي صلي الله عليه وسلم فيما معناه " لو علمت الغيب لاخترتم الواقع "
----------
الصوره فكرتني ببورسعيد وجمالها للاسف ماروحتش السنه دي في شم النسيم مع اني كنت خلاص بحضر للسفر اللي اتلغي علي آخر لحظه وقعد زعلانه فتره بس لما قريت عن الحادثه بتاع الطلبه وان بورسعيد كلها إتقلبت ميتم كبير قلت الحمد لله اني ماروحتش ،وعسي ان تكرهوا شيئا وهو خير لكم
اصلي مش بستحمل مواقف الحزن دي
بجد فرحانه انك قدرت تطلع من الحاله الى كنت فيها
وبجد انت من اكتر الاشخاص الى فى حياتى الى بيدونى امل واضايقت اوى من الحاله الى كنت فيها بس كنت عارفه انك قدها وقدرت تتغلب عليها
سيب كل حاجه على ربنا وانت دماغك كبيره وان شاء الله ربنا هيقف معاك
يا زحل هو انت كمان غبت...انا كتبتلك اسبابي في بهارات الاتصالات...
و متزعلش...آخر سنة كل واحد بيبان على حقيقته و خاصة في مجموعات المشروع..ده انا طلعت عيني...و ناس مكنتش اتوقع منهم الخيانة...فخلي بالك و ركز على مصلحتك كويس..و ربنا ينجحك و يوفقك..و يا سيدي لو عايز مساعدة في االمشروع عنيا
:-)
زحل
ممكن ماكنتش تقول اسبابك خالص..انا عن نفسى مش محتاجه مبرر لحزنك,كل واحد بيجيلو وقت كده بيشوف حاجات و يجرب بنفسه انه يتعامل مع عينه متعاملش معاها قبل كده,المهم النتيجه انك بقيت أحسن الحمد لله و قدرت تتعامل مع الموقف و عموما كله بيعدى المهم النتيجه و ربنا يوفقك بس بردو تيك كير اوى منهم.
سلام يا زحل
الحمد لله يا زحل قدر الله وماشاء فعل
وفعلا ربنا سبحانه وتعالى
كريم اوي اوي
فوق ما يتخيل اي حد
و في عز ما بنكون شايفين جفاء من كل البشر اللي حوالينا تلاقي ربنا سبحانه وتعالى كده بيبعتلك حاجة تعوضك عن كل حزن او اسى مر عليك
فعلا الحكاية دي اتكررت معايا اكتر من مرة
ربنا يوفقك ويرزقك الثبات ويمكّنك من تحقيق احلامك وطموحاتك
تقبل تحيتي
الحمد لله انك احسن دلوقتي
وربنا يفرحك دايما يامحمد
انت تستاهل كل خير
عصفور المدينة
ازي حضرتك يا باشمهندس
ومبروك المركز الثالث
البطاطا اه
هو كان في الخلفية اينعم بس انا مش بشتري بطاطا الصراحة
اللي باكله يتهيألكم انه ايس كريم لكن ده سندويتش عادي في رغيف كبير ونلفة كده علشان الكفته متقعش
:):):):):):)
وانا سايبها على الله والحمد لله الواحد بفضل الله قدر يتجاوز الموضوع ده في يوم او يوم وشوية بس ان اتشغلت جدا بعدها وده اللي اخرني في كتابة البوست
منور يا باشمهندس
keda
الله يخليك يا باشا انت تسيب الاسكندرية دي كده على جنب علشان الواحد ليه فيها ذكريات من احلى ما يكون
على شاطئ المنتزه
وكنت حموت في دوامة في العجمي
دي ذكريات وحشة
بس لسه فيه الجميل
زي مركز شباب الانفوشي ومطعم كببجي ابو راوية
ومحطة الرمل والقصص اللي على الرصيف
وخروب امال
ومسجد القائد ابراهيم والمكتبة و و و و
متعدش يعني
على فكره المعموره شبه بورفؤاد جدا جدا جدا اول مدخلتها حسيت اني رجعت الحي بتاعي
بالنسبة للمجموعة فأن بإذن الله حشتغل مع مجموعة ثالثة :)
وفيها ناس كويسين والحمد لله
اه اللي باكله ده سندويتش كفته علشان بس التوضيح
:)
واحده من الناس
اولا متزعليش مني اني ضيقتك وضايقت جميع اصدقائنا الكرام بسبب البوست ده
بس زي مأنتي عارفة مفيش واحد بيفضل موده عالي على طول
لازم شوية فوق وشوية تحت
والحمد لله اني قدرت اعدي الازمة
وعلى فكره انا قصدت احط الصورة دي علشان ابين اني الحمد لله بقيت تمام
:):):):)
منورة ومتقطعيش الزيارات
مجلة المدون
بإذن الله ازور السايت على طول اهو
-----------------------
دكتورة خمسة فضفضة
فعلا صدق رسول الله صلى الله عليه وسلم
لو كنت اعلم الغيب اللي جالي بعد المشكله دي
كنت قولت اهلا بالمشكله فعلا
سبحان الله
بالنسبة لبورسعيد في شم النسيم
السنادي فعلا كانت فاجعة يعني
انا كنت عملت بوست هنا انا ومجموعة مدونيين بورسعيديين علشان نعرف الناس الوضع هنا
انا في بورسعيد مشترك في منتدى بورسعيد اونلاين
المنتدى ده بيعمل مشاريع في كل حته
وفي شم النسيم بالذات
لو كنتي حضرتي بورسعيد السنه اللي فاتت
كان فيه مهرجان اللمبي امام الباتروس
وكان فيه صور بورسعيد زمان من النشأه والى عام 56 ايام العدوان
ده كان بتاعنا
المهم بعد لما بدأنا في تعليق معارضنا للمشاركه في المهرجان
جاء الخبر الاليم
وتم ازاله جميع مظاهر الاحتفالات
وعدى شم النسيم على بورسعيد بشكل مقدرش اقولك كان عامل ازاي
وعامة تنوري بورسعيد في اي وقت
على فكره اديلك ملحوظة
الصورة على بحر بورسعيد
لكن بحر بورفؤاد احسن واحسن كمان
rana
الله يخليكي
شكراً اوي على كلامك
والحمد لله قدرت اعدي اللي حصل ده بفضل الله وتوفيقه والحمد لله
شدي انتي بس حيلك في التدريب
------------------------
نقطة ميه
الحمد لله انا مش عايز اخسر اي حد فيهم وبلتمسلهم العذر في اللي اتعمل ده
والحمد لله ان الموضوع عدى
بالنسبة لمساعده في المشروع
منتحرمش منك يارب بجد
وربنا يكرمك
كوين
انا قولت اسبابي لأي اللي سأل واهتم لازم مني اني اشكره اوي لأنه اهتم في وقت كنت محتاجه فيه
وطالما اهتم
يبقا لازم اقوله السبب
عرفتي ليه انا قولت الاسباب
وبفضل الله الواحد دلوقتي احسن كتيييييييييييييييير
شدي انتي بس حيلك
وسلميلي على سان استيفانو
:D:D:D:D
كاسبر بيفور
الله يخليك يا باشا
وربنا كريم اوي اوي اوي
وكرمه ملوش حدود
الف حمد والف شكر لك يارب
شكراً على زياراتك اللي مش بتتقطع يا كاسبووووور
ولكم منور والله
*-*-*-*-*-*-*-*-*-*-*-*-*-*-
كورتييي
ازيك عاملة ايش
الحمد لله والشكر لله يارب
منورة والله
شدي حيلك بقا الصيف جه اهو
:):):):):)
السلام عليكم
ربنا يوفقك يا رب وتلاقي مجموعه كويسه احسن من الاتنين
ربنا معااااااك
يااااااااااه يا زحل.. فكرتنى بالذى مضى
عموما هى ده سنة الحياة وما تزعلش نفسك كلنا مرينا بنفس التجربة، المهم ركز فى المجموعة اللى حتدخلها وخلى بالك برده لان دايما الناس بتبان على حقيقتها فى مشاريع التخرج والعمل الجماعى يعنى حتلاقى ناس بتفكر فى نفسها وبس، حتلاقى ناس بتحب تفرض رايها وما بتعرفش تتناقش وحتلاقى حاجات كتير، فحاول تختار مجموعة متفاهمة حتى لو مش أصحابك.. وربنا يوفقك
احلى حاجه في البوست ده
انه خلانى احمد ربناا من جووووووووه اووووووى
ربنا يبارك لي في عمرك يا محمد وميحرمنيش منك حتى لو فرقتنا الحياه
ربنا يبارك فيك ويوفقك وتبقا احسن واحد في الدنيا
وانت فعلا احسنهم في عنيا
حتى لو اختلفنا في الرأى او في اى حاجه
ستبقى دائما الافضل
الدمعة
منورة في زيارتك الاولى
وامين يارب
---------------------
بحبك يا مصر
سعيد اني فكرتك بالذي مضى
وفعلا في الاعمال الجماعية دي بيبان كل واحد على حقيقته
وربنا يعافينا يارب
فوكيره
ايه الكلام الكبير ده
لا ده كلام كبير اوي وكلام من اللي هو
اختي يا جدعاااان
ربنا يخليكي ياااااااارب
ربنا يوفقك ياعم واحسن حاجة انك دورت على حاجة غلط فيك عشان تصلحها ماختش الموضوع زعل منهم وخلاص
تحياتى ليك
Post a Comment