الدفاع خير وسيلة للنصر الجزء التاني

تحديث

موضوع جديد في بهارات الاتصالات

حكــــاية عــم محمد

-------------------------------------------

وصلنا البوست اللي فات اني بصيت على رئيس الجبهة

وروحت بيتنا

لما روحت بيتنا كان خلا حان الوقت لإغلاق المصيده وضرب الجبهة دي بالكامل في سنه اولى علشان اللي حصل ده مينفعش السكوت عليه

مش كده واللا ايه

ايون كده خليكوا صاحيين معايا

عملت قائمه فيها اسمي واسم واحد معايا في قسمي من جبهة البورسعيديه

و2 من قسم حاسبات من الجبهة التانيه المختلطة

طبعاً ..منا نازل لوحدي المعركة كلها بين القوائم وانا مع نفسي

نازل مستقل

المهم عليها بقا اتكلمت مع مجموعة من المرشحين زمايلي وضربنا القائمة

وهنا السر بقا

اسمع يا معلم وشوف الافكار البسيطة اللي تغير المسار

جيبت قائمة الجبهة البورسعيديه

وشيلت اسم منها وحطيت اسمي مكانه

وصورتها نسخ كتير.... ونفس الكلام مع القائمة التانيه

وصورتها برضه

بقا ايه يا معلم بقا

ايون عليك نور

بقت القوائم تعدي من ايد الناس يفتكروا ان القائمة بتاعتهم علشان عليها اللوجو بتاعهم

سواء دول او دول

وطبعاً محدش واخد باله من الحركة بتاعت تغيير الاسم دي

ولا حد يشك ان ده ورقهم بس اساسي متغير بقا زي مقولنا

اختارت كمان معايا شوية مش مرشحين نفسهمن لكن صحابي وجدعان اوي

وعليه عملت جبهة ثالثة مختلطة بقيادتي انا والمجموعة اللي معايا في سنه اولى بس

اليوم ده منساهوش في حياتي ..كان اكثر يوم مرهق لدرجة اني وقعت في الارض من كتر التعب مكنتش قادر اتحرك وكان عندي برد شديد ده غير ان اسم الشهره بتاعي مكانش مكتوب اصلا وده تطلب مجهود زياده علشان احط الاسم بتاعي بالشهره

المهم النتيجة اللي طلعت بعد انتهاء الانتخابات كانت ايه؟

هاااااا

ايون الواد اللي لابس ازرق هناك ده جاوب صح

نكمل بعد الفاصل

صوتك امانه ..متبيعوش ببتنجانه

عدنا

بعد لما طلعت النتيجة ظهر اللجنة الفنيه

الاول شهاب وده كان من الجبهة المختلطة ب134 صوت

الثاني العبد لله ب 132 صوت

واول الراسبين في لجنتي كأن شبيهي في الاسم ب 130 صوت

ياااااه

متتخيلوش بعد الموقف ده الواحد اتغيرت حياته في الكلية كتييييييييييير

المهم نرجع للأصل

شوفتوا الانتظار واتخاذ وضع الدفاع انك لما تحس بالخطر تأخذ جنب وتستنا اللي ادامك يغلط

ويتمادي في الخطأ ساعتها مش حينتبه وانت بتنسج خيوطك حوليه وتقفل عليه المصيده

طالما هو غلطان

على فكره

السنه دي الي كان نازل يمسك الاتحاد اللي عمل في الحركة دي سقط في الانتخابات من الاصل ومبقاش عضو اتحاد

شوفتوا بقا كان اقوي وسيله للنصر ازاي

-----------------------

على الهامش

انا خلصت امتحاناااااااااااااااااااااااااااااااااااااااااااااااااااات

اطول سنه في حياتي

سنه 3 هندسة الاتصالات والالكترونيات ببورسعيد

سنه رهيبة

ماراثونية

مش مصدق انها خلصت

يارب تطلع النتيجة على خير يارب

الدفاع خير وسيله للنصر

الدفاع خير وسيله للهجوم ثم النصر
بوست كنت قرأته من زماان عند ستورم
كيف يصبح الدفاع خير وسيلة للهجوم وبالتالي للنصر ؟
الان وبعد رفضي الشديد لهذه العبارة وجدت انها قرب للصواب ولكن برضه في بعض الحالات

لو بصينالها من ناحية تانيه

الدفاع خير وسيله للهجوم ثم النصر في رأي ستورم هو انك من الاخر تتقل يا معلم على اللي ادامك لحد ميقع في الفخ ولما يقع في الفخ تسيبه متقفلش عليه لحد لما يغوص

ويغوص

ويغوص كمان وبرضه تسيبه

لحد لما يتحرك في الفخ كأنه بيته وقتها تقفل عليه المصيده

بكل هدوء

وتخلص الموضوع

ستورم عمل الموضوع ده اكثر من مره ونفع

وبرضه حصل معايا مواقف تخليني ابدأ اثق في ان الكلام ده سليم

وزي مقال ستورم في سلسلته الدفاع خير وسيله للنصر

انا برضه حتكلم عن انتخابات اتحاد الطلبة في كلية الهندسة ببورسعيد

في سنه اولى كليه
اولى اللي يعني بعد اعدادي دي

دخلت انتخابات اتحاد الطلاب

وكالعاده في الوقت ده كان الاتحاد في الكلية منقسم الى قسمين او يعني من الاخر جبهتين

جبه بورسعيديه وجبهة مختلطة بين البورسعيديه والمغتربين

المهم كان نفسي ادخل الانتخابات اجرب

روحت لواحد مقرر اسره وداني لواحد تاني في الاسره المهم التاني ده وداني لواحد ثالث

المهم في الاخر اتعرفت على اللي ماسك جبهة البورسعيديه في الانتخابات

واللي كانت وقتها لسه بنحضرلها ونجهز وكده

المهم بعد لما اتعرفت عليه قولتله انا فلان وبعمل كذا وكذا وعلاقاتي كذا وممكن اقدر افيد يعني في الجبهة

المهم اتفق معايا ورتبنا التظابيط وانا معاهم

لحد لما بدأت احسن ان فيه بيعه في لموضوع (موسيقي تصويرية بتاعت الخطر دي ) وبدأ الفكاك من الاتفاق

الكلام ده كان احساس مني وطبعاً كان بناء على شوية تصرفات

المهم من الاخر يا جدعان كنت حاسس اني اتفرقعت

تقلت عليه شوية شوية ولحد ليلة الانتخاباات.............

نكمل بعد الفاصل

اشرب شاي العروسة ...ده شاي مزاج الناموسة

عدنا

في ليله الانتخابات بقا كان قائد جبهة البورسعيديه بيوزع على المرشحين بتوعه قوائم الطلبة اللي بتشمل 12 طالب في كل سنه على اساس في كل لجنه 2 طلبة

وبفتح قائمة اولى

ملقيتش اسمي في اللجنة الفنيه اللي كنت قدمت ورقي فيها

ولقيت اسم 2 مرشحين منهم واحد شبهي في الاسم الثلاثي وكنت اتكلمت عليه في بوست يوميات تحدث لي

المهم بصيت على رئيس الجبهة

وروحت واخد بعضي وماشي

طبعاً خلاص كده هو وقع في الفخ وتقلت عليه اوي اوي انه باعني وانا كنت بدأت اجهز للبيعة دي

ولحد دلوقتي خلاص انا كده مش على قوائم يعني هو يريح دماغة مني علشان الطالب اللي اسمه مش في القائمه

مبينجش في الانتخابات مهما عمل

المهم ايه بقا اللي حصل

نكمل البوست الجاي علشان عندي امتحان كمان شوية

جرررررر

just angry

عندما نسيت الالة الحاسبة

تحديث

لقاء المدونين الاول في بورسعيد

يعني البانر اللي علي ايديكم اليمين ده

تفاصيل اللقاء موجوده هنا

http://shymaaa.blogspot.com/2007/06/blog-post_11.html

عند شيماء الجيزي في صحفية مع ايقاف التنفيذ

--------------------------------------------

ازيكم يا جماعة
والله البلوج وحشني

زي متقولوا كده الواحد بقاله يومين عايش في حالة من القرف مش عارف جايالي منين
بدأت من بعد منسيت الاله الحاسبة في الامتحان اللي فات
وكانت فرجه
ماشي في امان الله ورايح ومعايا الادوات
وكان عندي شعور عجيب وانا بقفل باب البيت
اني نسيت حاجه
نزلت زي الشاطر وامنت على الموبايل والمقلمة
ونزلت سخنت العربية واستنيت اختي
ورحنا الكلية
وانا طالع اللجنه والساعة 9 الا 3 دقائق
وداخل استلمت ورقت الاجابة وحبدأ اسطر بقا واجهز
ابص ملقيش الالة الحاسبة
!!!!!
يا نهار ازرق
الالة
وايه بقا دي اصعب ماده
مقدرش اوصف التوتر اللي كنت فيه وانا اللي بقول على نفسي اني بارد واعصابي في الثلاجة في الامتحان وبتضايق بس لما بيكون الامتحان غلس لكن عمري مبنهار في امتحان
لقيت نفسي بجري على المراقب وبديله ورقة الاجابة تاني وبقوله نسيت حاجه
عنها
وعندك يا معلم كل الجماهير الغفيره في الكلية سامعها بتقول الواد ده بيجري ليه
في اقل من دقيقة كنت عند باب الكلية والكل عمال يقولي على مهلك... وبالراحة ...وبيجري ليه ده
!!
اوصل عند الباب والاقي عم حمدي مساعد في الحرس الجامعي
يا عم حمدي الاقيش عندك اله ضايعة لحسن نسيت الاله
ينده عم حمدي على عسكري معاه ويفتحوا الدرج
الاقي اله قديمة من العصر الحجري معرفش استخدمها
وانطلق تاني بقصي سرعة
وانط من ادام تاكسي
واجري على مكتبة
الاقيش عندك اله حاسبة اف اكس 82
يقولي مش ببيع الات حاسبة
طبعاً خلاص حجري على العربية والزق ايدي على الكلاكس لحد موصل البيت علشان الحق الامتحان
لقيت الراجل ربنا يعمر بيته بيندهلي وبيقولي تعالا شوف دي
اجري
الاقيها اله حديثة اوي
يانهااااااار
ياللا بقا ميضرش
قولتله الف شكر واخذتها وجري على اللجنه

وطبعاً منسيتش وانا بجري اني انط نطه جهنمية من بتاعت سوبر مان معرفش نطيتها ازاي

لأن كان فيه تاكسي خلاص حيدوسني لكن ربنا ستر
وانا طالع مكنتش قادر اقف من التعب والشد
وواحد صاحبي يقابلني على السلم
ويسألني في حاجه واحنا رايحين اللجنه
اجاوبة وانا بنهج وباخد شهيق من نوعيه
اللي بتشفط الهواء اللي في المنطقة والاجواء المحيطة ده
والاقي ام وائل ودي اللي في الدور لثالث وماسكه الكافتريا
نسميها فرضياً كافتريا يعني
بتقولي انت بتنهج وكنت بتجري من شوية
قولتلها اه اصلي نسيت الاله الحاسبة
ودخلنا الامتحان
المفروض بقا خلاص
لا يا اخوانا اذ افوجأ ان الاله دي مش بتطلعلي كسر عشري
لا بتطلعلي كسر بسط ومقام وبتكتبهولي على الشاشة
يااااااافرحتي
واقعد في الامتحان اعمل اختبارات على الاله لحد لما الحمد لله عرفت احول الكسر الفقر ده بطريقة عجيبة كل اللي معاهم الالة دي فضلوا يضحكوا عليها علشان فيه زرر بيحول مباشره
انما انا استخدمت زرار بيحول الكسر لزاوية وبعدين كسر عشري
بس الحمد لله عدت على خير وربنا يستر بقا
علشان الامتحان ده كان
one way
سكه اللي يروح مينفعش يرجع يشوف اي اجابة هو كتبها علشان يلحق يجاوب اساسا
المهم من ساعتها رجعت بيتنا قعدت على الكمبيوتر شوية ونمت
صحيت روحت ازاكر
لقيت نازل عليا وخم رهيب
روحت نمت
صحيت بدري
وبرضه لقيتني بتطوح
روحت نايم تاني
اقوم على الظهر
اقف واغير هدومي
الاقي نفسي الدنيا بتلف بيا وبقع
لا حول ولا قوة الا بالله
وعلى ده الحال لحد مفوقت وبعدين جه عليا دور قرف مش عارف افتح الماده
لاحول ولا قوة الا بالله
مهو انا لازم اذاكر
والحمد لله قومت فضلت اتفرج شوية على انجازات اتعملت من فتره مع موقع بورسعيد اونلاين
شحنت نفسي
وابشركم خلصت باب ونص لحد دلوقتي وحقوم اكمل ان شاء الله
رفعت ملفين فيديو لمعرضين صور عملناهم في بورسعيد
في 2005
و2006
اسيبكم مع الفيديوهات ويارب يدوكم امل
زي مشحنوني بالظبط

تهييس ليله الامتحان ريتشارد قلب الاسد

تحديييييث

احمد البلاسي صديقي العزيز

ظبطني في 23 حلقة معاطي شو

حنعييييييييييييييييييييش يا جدعاااااااااااااااااان

------------------------------------------

سعات بسرح مع نفسي وافضل ابص في المرايه

من شوية يعني لما كان شعري طويل قبل محلقة

بسرح والاقي نفسي ريتشارد قلب الاسد

تيجي اختي وتبص عليا وماما وخلاص يقولوا لاحول ولا قوة الا بالله الواد اتهبل خلاص

كنت متقمص شخصية ريتشارد قلب الاسد لما كان بيهاجم اورشاليم

اللي هي القدس النهارده

وعمال يقولهم لقد ارسلت اوروبا بفلذات اكبادها

ان الطريق الى اورشاليم يستحق ان يفتل في كل خطوة عشرات وعشرات

اذهبوا

وارفع ايدي لفوق واقولهم الى اورشالييييييييييم

المهم بقا اننا لو روحنا للجانب التاني حنلاقي عيسى بيه العوام

اللي هو واخد مقاولات البحر في جيش صلاح الدين

كان راح من نص ساعة في الفيلم

يعني من كام يوم كده المفروض في الحقيقة

كان راح علشان يجيب الدمشقي من عكا

والدمشقي هو العالم اللي جاب شوية احماض وعمل السائل المضاد للأبراج

نرجع بسرعة للمشهد والابراج داخله على الحصن

ويروح المسلمين عاملين شوية صرر كده وكل صره فيها شوية سائل مضاد للأبراج

ويروح السائل المضاد لفرجينيا ده يضربوه فيحرق الابراج

وتلاقي الجيش اللي كنت قولت عليه

على اساس اني ريتشارد قلب الاسد يعني

اللي قولت عليه انه يستحق ان يموت في الطريق عشرات وعشرات

الاقي معادش فيه عشرات ولا خمسات حتى

وارجع انا وشوية الحمير اللي راكبين عليهم دول وانا متوقع الهزيمة

بعد بقا لما صلاح الدين افندي في اول الحرب لما راح وقابل ريتشارد اللي هو انا وقاله انكم تحرقون اغصان الزيتون

فريتشارد اللي هو انا يعني قاله لا يجب ان تكون اورشاليم من حقنا لأنها مهد المسيح

راح صلاح لدين ساحب وقاله والله لوريك يا ريتشارد بس بالذوق كده

طبعاً محنا عارفين ان صلاح الدين ذوق

وبعد لما فرجينيا اتفقت مع الواد كونراد وفيليب اغسطس اللي هو محمود الحريري

وباعوا ريتشارد للمسلمين وبعتوله عايزين يسلموه عسقلان وكام اماره تانيه علشان يوصلوا لأورشاليم

راح ريتشارد قلب الترابيزه عليهم وبعدين رح يزور صلاح الدين في القدس

راح وهو داخل باب المدينه

اوم ايه بقا

ينضرب بسهم مسموم

طبعاً كلنا عارفين مين اللي ضرب السهم المسموم

ايون شاطرين

ارثر الفيتامين

اللي كان عايز فرجينيا بس هي قالت ده عجوز وانا لسه شابة مينفعش معايا

بس فرجينيا لما شافت السهم المسموم وقالت بقا لا ده الواد ارثر ده دماغ ولازم الهفة قبل مالبت التانيه تاخده

مش عارف تاخده على ايه

بس صلاح الدين بقا راح عمل حركة جدعنه وقام رايح معسكر ريتشارد علشان يعالجه

رح ريتشارد لما فاق قال لصلاح الدين انه حيغزو القدس

قام صلاح الدين قاله ليه محنا كويسين معاكم

راح قاله لااا ده بلدنا ولازم ناخدها

راح صلاح الدين لافف وكان حيديله بظهر ايده بالقلم بس مسك نفسه وقاله ولماذا يجب ان تكون انت ملكاً على اورشاليم

ياابااي يا اخي

مش احنا بنظبطكم والمسيحية تخدم وتصان

قاله ريتشارد لا انا اصلي عايز اظبط المملكة وارجع بمفاتيح اورشاليم

نرجع تاني لعيسي العوام

ايوه اللي كان واخد مقاولات البحر ده

فضل يحب البت لويزا الفارسة الصليبيه

اللي في اخر الفيلم حترجع تتجوزه ويعيشوا في تبات ونبات ويخلفوا صبيان وبنات

المهم بعد لما صلاح عالج ريتشارد

رجعنا للنقطة اللي بدينا منها ان ريتشارد قالهم الى اورشاليييييييييم

وبعدين لما الابراج اتحرقت

راحت كمان فيرجينا بقت فرجينيا المشوية

ويوميها بلليل جت لويزا تعالج فرجينيا معرفتش

طبعاً مهو اللي واقع عليها برج مش كوخ

راح كان مين موجود بقا

ايوه كده اصحوا معايا

ارثر الفيتامين

راح قال للويزه وكمان فرجينيا

ايه ده

فيرجينيا اللي كنت عايزها راحت وبقت كده من غير وش

لااا

راحت فرجينيا اتخضت ليضربها بسهم عربي مسموم

راحت فاتنه عليه لمين

ايون

للويزا

وهي بتفتن راح ارثر ماسك فرجينيا ومخلص عليها

لويزا بقا مش تبقا جدعة كده وتدافع عن فرجينا

لاااا راحت بايعاها وجري على ريتشارد

ووصلت الخيمة

طبعاً مهو فيلم عربي

قالتلهم فرجينيا اكلتها النار

اصلها كانت جعانه

والسهم العربي

اطلقة ارثر

وخلاص المخرج هنا قالها انت دورك انتهي

راحت واقعة في الارض ولا نفس

وطبعاً ريتشارد بقا في نص ذقنه

كل شوية واحد يبيعة

قال لنفسه لاااااا انا ابيعهم كلهم

وراح رايح لصلاح الدين وعقد معاه الهدنه وروح على بلاده

وهو ماشي بقا راح رافع المطوة اللي كان شايلها في عب البنطلون

راح صلاح الدين قاله انت حتصيع علينا واللا ايه

لا حط مطوتك في جيبك لحسن الرجالة وخصوصاً عيسى العوام

ايوه اللي واخد توكيل البحر ده

يخلص عليك

راح ريتشارد قاله طيب وراح حاطط الخنجر في البنطلون تاني وراح قايله خد يا عيسي البت لويزا

طبعاً مهو العمر مش بعزقة يعني

المهم راحت لويزا راجعة للواد عيسي العوام

وبدل مياخد توكيل البحر زي مكان في الاول

بقا واخد توكيل البحر وكمان توكيل لويزا

طبعاً مهم بيحبوا بعض من ساعت بحيره طبريه

لا بحيره طبريه دي حكاية تانيه وانا كده الفيلم طول مني

ومينفعش الكلام ده

في الاخر خلص الفيلم على مشهد جميل لعيسي العوام واخد البت لويزا وبيتفسح باليخت في بحيره طبريه

وصلاح الدين واخد القدس اللي هي بعد بحيره طبريه بشوية

وريتشارد قلب الاسد مشي من هناك

ايوه من جنب بحيره طبريه

وتلاقي الست اللي عمالة تقرج الجرس بتاع الكنيسة في القدس

اه برضه اللي كانت شربت من بحيره طبريه

وخلص الفيلم

بعد لما مات رينو السفاح في اول الفيلم وتقريباً مكانش معاهم فلوس يقبضوه

وسمعنا انهم رموا جثته في بحيره طبرية

الا قولولي هي فين بحيره طبريه

سلام

اضحك وفرفش وغير مووووووووودك

النهارده بمناسبة مود الامتحانات بقا وكده

وبمناسبة الشد والجذب واني عندي فتره قبل الامتحان الجاي والحمد لله يعني

فقولت افرفش نفسي

وافرفشكم معايا

بكام لينك كده لبرنامج

معاااااااااطي شووووو

للكاتب الكبير يوسف معاطي

برنامج ساخر اوي ويهلك من الضحك

على طول من غير كتر كلام اسيبكم مع الكام حلقة دول

حملوهم واسمعوهم وادعولي

اكله اوبرالي

اكشن اوبرالي--دااد وهريدي

احلام سعادتك اوامر

آكلي لحوم البشر

الكنباوي

اجمد واحده

عدي دي

تحديث الحلقة اللي كانت ناقصة

مع نفسي

بشكر خالد شكراً جزيل على انه اداني الحلقات دي
شكراً
اجزوتك ماتر

-------------------------

على الهامش

لسه فيه حلقات تانيه منهم اجمل حلقة انا بحبها وحرفعها واجيبها في اسرع وقت