الانتمـــــــــاء

اولا عايز اشكر كل اللي تفاعل معايا في الموضوع السابق

وبجد عايز اقولكم اني كنت سعيد اوي بالمناقشة جدا وبجد استفادت كتير برضه

----------------------------------------------

نخش في الموضوع على السريع علشان عندي امتحان بكره الصبح وقولت اخد ريست دقائق

عايز اتكلم النهارده عن الانتماء

يمكن الكلمة دي مش بنسمعها دلوقتي غير في الاغاني والمسلسلات ورأفت الهجام ودموع في عيون قليلة الادب وحتى في العميل تلات الاف وواحد

انا عايز اتكلم غلى الموضوع ده بسبب اكثر من حاجه

اولها اني بورسعيد اهلاوي

وكتير كل شوية يتهموني اني معنديش انتماء

ليه

علشان انت اهلاوي المفروض تشجع المصري او تبقا معندكش انتماء للبلد

تعريف الانتماء في نظري هو ان الواحد ينتمي للمكان العام او الحاجة عامة

يعني انا مسلم

عربي

مصري

بورسعيدي

بورفؤادي

بيتي

عائلتي

حد فهم حاجه

مفيش حاجه اسمها انتماء تهدم الترتيب ده

يعني لو انا جاي اشجع نادي وتشجيعي للنادي ده حيخليني يبقا معايا عداء مع الناس

يبقا الناس فاهمة الموضوع غلط

وبقول الناس مش انا علشان عمري مكرهت مشجع اي نادي تاني ولا اتهمته بالخيانه مثلا او عدم الانتماء

لو كوني مصري حيخليني ابقا عدو لاخواني العرب والمسلمين فأبقا كده غلط

علشان الاسلام بعدنا عن العصبيه القبليه بتاعت زمان اللي هي بتاعت انت من قبيله خزاعة

وانا من قبيله فزاعة

والكلام بتاع يا ويلي وشلت ذراعي ده

الخلاصة اني لو عملت حاجه تهدم انتمائي بالترتيب اللي انا كاتبه ده يبقا انا غلط

ولو حد عمل كده

في وجهة نظري اكيد غلطان

نتكلم عن الموضوع من جانب تاني وهو الجانب اللي مضايقني الصراحة

ييجي الواحد من دول يجري يسافر دولة اجنبيه

ويفضل قاعد هناك

سنه واثنين وثلاثة وحتى 10

ويفضل يقول اااااه بلدي واحشاني بلدي عايز ارجعلها

طب ياعم مترجع

لاا مش حرجع ارجع فين في الظلم والجهل ووجع القلب

طب مأنت عملت مركز محترم وتقدر تيجي هنا تشتغل في اجدعها مصنع وتوكيل اجنبي كمان وبمرتب اكيد حيتجاوز ال5000 جنيه واكثر

طب مترجع

متفهمش ليه ميرجعش

وبرضه يفضل يقول البلد والانتماء للبلد وحب البلد ولازم البلد والولد والطين والارض اللي هو اصلا مشافهمش ولا عاش فيهم بقاله كتير

ولما ييجي بييجي زياره ويرجع يجري علشان يروح البلد الغريبة تاني ويفضل على طول كده

انا لحد دلوقتي مش قادر افهم ازاي انا اكون عندي انتماء لبلدي وبقول اني بنتمي للبلد دي

وفي نفس الوقت كاره اني اعيش فيها ومش عايز اصلح فيها الا من بعيد لبعيد

مفهمش الانتماء اللي من النوع ده

وبعتبره مش انتماء

الموضوع ده في نفسي من فتره وكنت عايز اطلعة

ونفسي حد يفهمني

ينورني

اعرف ايه هو الانتماء

اصلي مش عارف من كتر اللي حوليا معملوله معاني اكثر مما يمكن

بس اللي اعرفه اكيد

اني كمسلم

معنديش عصبيه قبليه

يعني بحب بلدي جدا لكنها مش فوق اي حد علشان كلنا

سواااااء

او ده المفروض اننا نكون متأكدين منه

---------------------------------------

على الهامش

يابلدي يا حبيبتي فيكي حاجه محيراني

نزرع القمح في سنين

تطلع الكوسة في ثواني

مقتبسه من توقيع مورو عضو منتدي بورسعيد اونلاين

راجل واللا رجولة واللا بنت واللا ست؟؟ ده السؤال

تحديث

فيه موضوع جديد نزل اخيرا في
بهارات الاتصالات

----------------------------------------

ندخل في الموضوع على طول اصل التدوينة دي كبيره وي ومش عارف طولت مني كده ليه
عايز اتكلم النهارده عن موضوع مهم ددا ددا دداً يعني
وهو وجهة نظري عن الجنس الاخر
البناتيت يعني
من الاخر وبدون مقدمات طويلة وحشو والذي منه
اقول ان البنات في رأيي 4 انواع
يمكن اكثر بس هو انا ده اللي شايفة
النوع الاول وهو البنت الراجل

النوع الثاني وهو البنت الرجولة
والنوع الثالث وهو البنت البنت
والنوع الرابع هو البنت الست
نفسر الموضوع بروقان
اجري يا عبده هاتلي بقرش صغ لب وهات المنشة ووطي الفونوغراف وتعالى اسمع

النوع الاول وهو البنت الراجل

وهو من الاخر البنت المسترجلة اللي تبصلها تلاقي نفسك واقف مع واحد صاحبك
مفيش فرق ومفيش اي مظهر من مظاهر الانوثة خالص
والبنت الراجل دي لما تيجي تعاكسها في الشارع مثلا تبص تلاقيها لبست فردة شراب في وشها
زي سيمون في مسرحية كارمن كده وتلاقيها قالتلك
نااااااااعااااااااااااااام يا رووووووووووح اماااااااااااااك
احم اعتذر عن اللفظ ده يعني لكن هو ده اللي بيتقال وانا مراعي اساسا ان مدونتي نظيفة
فنمشيها رأس القر..قصدي نمشيها روح امك




النوع الثاني بقا وهو البنت الرجولة

والبنت دي تلاقيه جدعه كده معاك وبنت بتاعت مواقف بتقف وقفة من اللي هي دي
!!
ومحدش يسألني ايه دي ..
والبنت دي تلاقي كل الناس بتعزها وتلاقيها ماشية مع الكل زي السكينه في الحلاوة او الجبنه البيضاء الجاية من حيث تدليل الابقار
الاعلانات بتاعت لورباك مأثره



النوع الثالث علشان ده المهم




وهو البنت البنت يعني البت الانوثة
البنت اللي بتبنجك وانت واقف
رقة ايه ..وذوق ايه ..وشياكة ايه..وايه وايه وايه
لا واللا الصوت
بيبقا محتاج مكبر من بتاع الراجل اللي بيشتري الوق القديم ده اللي بيمشي تحت البيت وبيصحيني من النوم
والنوع ده يا معلم بيكون تعاملة صعب مع الناس وةسهل ينضحك عليها لكن
الكل بيكون متبنج معاها علشان كده ممكن تدخل قلوب الناس بسرعة وتصعب عليهم فمحدش يضايقها



النوع الرابع بقا

هو البنت الست
وتلاقي البنت من دول شغالة ست بيت من الدرجة نمبر وان وهي في الكلية تقولك سمعت يا خويا برنامج اسامه اطيب
لا
لا ازااي اقولك انا بس انت تعالي واحنا بنتمرن في مصر وهاتلنا مواعيد تدريب كويسة وانا كل يوم حعملك محشي وتدوق طبيخي امااااااال ياني على المحشي اللي بعمه ياني
ده هي اللي بتقول
واللا الاصناف بقا بتاعت الاكل حتاكل صوابعينك وراها
ده برضه هي اللي بتقول
طب عملتي ايه امبارح ذاكرتي
ده انا اللي بقول
قضيته غسيل مش عارفة كانت طالبة معايا غسيل
اممممم طب ربنا يخليلك عيالك يا حاجة الا قوليلي
ازي البيه
بيه مين !!!!!!
لا ولا حاجه ان شاء الله نذوق اكلك ان شاء الله قريب

عايز اقولكم يا شوباب ان الواحد شاف الانواع دي كلها وبصراحة ان جيتو للحق اللي بتكون اي نوع من الانواع دي متنفعش تعيش في مجتمعنا ولازم تاخد من ال 4 انواع علشان تبقا البنت اللي من الاخر
يعني تكون زي النوع الاول
ايواااا ابو شراب مقلوب ده في حالة وجود خطر مثلا او مشكله عويصة ومفيش حد يساعدها
وفي نفس الوقت تكون رجوله مع اصحابها واللي حوليها جدعه يعني
وتكون بنت في تعاملاتها يعني بقا شيكة واهتمام بالشكل والمظهر وطبعاً الجوهر محفوظ يا معلم هوا ينفع مظهر وجوهر مفيش
وتكون ست بيت اذا اقتضت الظروف لحد متتجوز واكيد ست البيت لازم تظهر ساعتها
البوست طول اوي
نبقا نكمل بعدين
----------------------------
على الهامش
يارب محدش يضرب النهارده
ومتنسوش تعدوا تقولولي رأيكم ولو عندكم تقسيمه تانيه اهو منكم نستفيد

انا بقا حقلد

السلام عليكم ورحمة الله وبركاته

اه بقا ان حقلد

مهو فضلت من زمان يعلموني ويقولولي

كن نفسك ومتقلدش حد ومتعملش حاجه زي حد ومتتصرفش زي حد

وفضلت على كده

لحد الكلية

وجه دكتور اتكلم معانا

وفتح موضوع التقليد ده

وقالنا اه نقلد مفيش مانع

طبعاً ضربة للأساسات اللي الواحد متربي عليها طول عمره

بس بعدها بفتره

اتأكدت ان كلام الدكتور ده صح

حد يسألني يقولي ازاي

اقولكم ازاي

مؤخراً اكتشفت ان فيه كتير الواحد محتاج يغيره في نفسه

وانت...وانتي

وكل الناس

كل واحد محتاج يقلد

ويغير في نفسه

لما اخذ من صاحبي صفة الاهتمام بالاصدقاء كل واحد على حدى

يبقا من حقي اقلد

لما اخذ من صاحبي التاني الشجاعة في مواجهة المشاكل اكثر واكثر

يبقا من حقي اقلد صاحبي

لما اتعلم من صاحبي الثالث ازاي اصبر في الوقت اللي بتكون فيه حكاية فقد الاعصاب دي عند كل الناس

يبقا من حقي اقلد صاحبي

لما اخذ من صاحبي تكبير الدماغ لما بتكون فيه مشاكل ملهاش لزوم وتضايق

يبقا من حقي اقلد صاحبي

لما لما لما

يبقا كلام الدكتور صحيح

وحقلد وميهمنيش
طالما اللي بقلده ده وبحاول اكتسبة

هو صفة كويسة تكمل النقص الجامد اللي عندي

ايه رأيكم

حتقلدوا ؟؟؟

--------------------------------

على الهامش

ادعولي علشان الامتحانات خلااااااص

نزلي بوست في المصري اليوم يا جدعاااااااااااااااااااااااااان

هيييييييييييييييه
البداية كانت في تعليق على بوستي

يوميات تحدث لي

كان التعليق كالتالي

يالهوووي يا زحل .. ايه دة ما علينا الله يكون في عونك انا سارة نور الدين صحفية في المصري اليوم ، خدت قطعة من تدوينتك باسمك و اللينك وهانشرها في ص 14 يوم الأحد الجاي ان شاء الله تعليقا على معاناة الكليات العملية في مصر لانها بالفعل تستحق ذلك و عامة انا خدتها بصيغة الجمع للتعبير عن طلبة الكليات دي

وبعدها النهارده قالي محمد جوده صاحب مدونة بحري

ان التدوينة نزلت في المصري اليوم

بجد شكراً اوي يا استاذة سارة ومتتخيليش حضرتك فرحتيني اد ايه

ان صوتنا ممكن حد يقراه ويعرف عنه
بجد شكراً اوي

وشكراً لمحمد جوده انه نقلي هذا الخبر السعيد

اوي

Fallin

I just feel that i am fallllllllllllllllllin

and i hope not to be destroyed this time

because it is seem to be very hard one

ask god 4 me to elp me these hard days

plz

كل حلفائك خانوك يا ريتشارد

بقالي يومين الجملة دي مش عايزه تطلع من دماغي
وعايز اكتبلها بوست واقولها اخرجي بقا من دماغي
وانا بدور في المدونات
لقيت اخونا
harmless
كاتب تدوينة تحت نفس العنوان تقريباً
الخونة

بس انا هنا حتكلم عن الموضوع ده من وجهة نظر تانيه

بحس كتير اني مشغول ومع الناس و و و و

يمكن

او اكيد الشعور ده عندي لنفسي بس مش عارف هل فعلا انا مشغول واللا عامل نفسي مشغول واللا عايش دور المهم

بس المهم

اني في الاول وفي الاخر

بفضل حاسس اني مشغول

المهم ان وقت لما اقرر اني اخلي نفسي مش مشغول

علشان اكون مشغول بالمذاكره

الاقي كل الناس اللي بتكون موجوده وقت لما بكون مش مشغول بالمذاكره

ومشغول معاهم

الاقيهم انطبقت عليهم العبارة دي

كل حلفائك خانوك يا ريتشارد

ويمكن ريتشارد في الفيلم قالها بنفس مكسورة او بإستنكار

وده اللي شبهي فيه

لكن الفرق ان خيانتهم لريتشارد كانت قاتله

لكن منظوري هو يادوب بس

سؤال

رنه

رسالة

اهو حاجه تخلي الواحد يشد ويتحمس ويلاقي حلفائك لم يخونوك

يا ريتشارد

وبرضه بتعجبني شخصية ريتشارد ده اوي في الفيلم وان كان عليا فيها بعض التحفظات

فهو قائد مغوار لا يهاب الموت ولا يهاب

(الامتحانات)

ولكنه في الوقت نفسه يعمل لمجده الشخصي

وده اللي نفسي معملوش يعني اكون شغال لهدف اسمي من انه يكون هدف شخصي

حاجه تانيه وهي ان الواحد خلاص بدأ يحس انه معادش فاهم حاجه في اي حاجه

معادش فاهم هو عايز ايه ولا عايزه ازاي

اروح امبارح وكان عندي امتحان النهارده

الاقي نفسي نازل اشتري اكل وال ايه اصلي عايز اغير يعني واكل حاجه جديده ولحسن واللا لسوء الحظ مش فارقة

ان الاكل طلع ماسخ ومستمتعتش بيه زي مكن متوقع

وادي الامتحان فات والحمد لله

ياتري الامتحان الجاي اللي هو يادوب باقي عليه 9 مواعيد اكل

هل حلحق اغير واعمل حاجه اكون عايزها فعلا

بس الاكيد اني بعد كل اللي انا فيه ده

نفسي مقولش لنفسي كل حلفائك خانوك ياريتشارد

ااااااه تصدقوا اني لحد دلوقتي ملقيتش ولا ارثر

علشان اقول عليه امين

--------------------------------

اسرع يا دمشقي واحضر السائل المقاوم للأبراح

هل انت واثق يا دمشقي من فاعليه السائل

نعم ولكني لم احضر هذه الكمية من قبل

حذاري يا رجل

اتريد ان تحرقنا

السااااائل المضاد للأبراج

صدق الله وعده

لولولولولولولولولوليييي

يوميات تحدث لي

طبعاً قبل محد دماغة تروح لبعيد ويقول العنوان ده شبه مدونة تاني

بس احب اقول اني كتبته علشان مناسب اوي للموضوع من وجهة نظري

لما تلاقي واحد شبهك في الشكل واستايل اللبس

ماشي

لما تلاقي نفس الواحد شبهك في اسمك الاول

بتحصل

لما تلاقي نفس الواحد شبهك في اسمك التاني

برضه مبلوعة

لكن لما تلاقي نفس الواحد شبهك في اسمك الثلاثي

وتلاقي مفتاح شقته شبه مفتاح شقتك مع العلم انه مفتاح فريد ونادر انه يتكرر

ولما تلاقي نفس الشخص ساكن جنب محل ميلادك

ولما تلاقي نفس الشخص بيلبس نظاره برضه

ولما

كفايه علشان انا عارف ان حواجبكم لزقت في شعركم زي محصلي مع صديقي العزيز

اللي بتكلم عنه دلوقتي

-------------------------------------------

نيجي بقا للموضوع الاهم وهو

هوا انتوا فاكرينا بنلعب في الكلية واللا ايه

والكلام ده موجة لكل واحد بيبصلي ويمصمص شفايفة ويقولي ايه دااااااااا انت جايب مقبوووول

اقوله تعالا هنا

بص معايا

النهارده ايه في ايام ربنا

الاحد 6 مايو

لما تعرف اننا كان عندنا امتحان اعمال سنه في السكشن يوم الخميس اللي فات

ماشي

طب وعندنا امتحان اعمال سنه في السكشن النهارده

مبلوعة

طب لما يكون عندك كمان تسليم تقريرلمادة ثالثة الاثنين 7/5

ماشي

طب لما يكون عندك امتحان يوم الخميس10/5 في مادة رابعة

برضه نقدر نقول فيه مسافة

طب ولما يكون عندك امتحان عملي في مادة خامسة يوم الاحد 13 وفي نفس الوقت مقابله شخصية على المنهج كله بتاع الماده الرابعة

ويوم الاثنين 14 امتحان وانترفيو على المنهج كله في المادة الثالثة

والخميس 18 امتحان اعمال سنه في المنهج كله في مادة غير كل اللي فات

والامتحانات رسمي يا جماعة اللي هي بتاعت اخر السنه دي المفروض تبدأ يوم الاثنين 21

واليوم ده بقا للصدف السعيده

فيه انترفيو



ولا عزاء لي

ومحدش يقولي بتجيب مقبول ليه؟؟؟

وحسبي الله ونعم الوكيل

بقيت كلمة اخيره وهي

اننا كل يوم من الايام اللي مفيهاش امتحانات واللي فيها امتحانات

بنروح بيوتنا الساعة 4 رسمي يعني بنخلص محضرات على 4 او 3 ونص

قولولي اذاكر امتا

-----------------------------------

بقالي كتير مكتبش هامش

هي فين المدرثة

ايه

المدرثة

اااااااااه اهييي

ازيك يا مفعوثة

عادل امام لسهير البابلي في مدرسة المشاغبين