السلام عليكم ورحمة الله وبركاته
اه بقا ان حقلد
مهو فضلت من زمان يعلموني ويقولولي
كن نفسك ومتقلدش حد ومتعملش حاجه زي حد ومتتصرفش زي حد
وفضلت على كده
لحد الكلية
وجه دكتور اتكلم معانا
وفتح موضوع التقليد ده
وقالنا اه نقلد مفيش مانع
طبعاً ضربة للأساسات اللي الواحد متربي عليها طول عمره
بس بعدها بفتره
اتأكدت ان كلام الدكتور ده صح
حد يسألني يقولي ازاي
اقولكم ازاي
مؤخراً اكتشفت ان فيه كتير الواحد محتاج يغيره في نفسه
وانت...وانتي
وكل الناس
كل واحد محتاج يقلد
ويغير في نفسه
لما اخذ من صاحبي صفة الاهتمام بالاصدقاء كل واحد على حدى
يبقا من حقي اقلد
لما اخذ من صاحبي التاني الشجاعة في مواجهة المشاكل اكثر واكثر
يبقا من حقي اقلد صاحبي
لما اتعلم من صاحبي الثالث ازاي اصبر في الوقت اللي بتكون فيه حكاية فقد الاعصاب دي عند كل الناس
يبقا من حقي اقلد صاحبي
لما اخذ من صاحبي تكبير الدماغ لما بتكون فيه مشاكل ملهاش لزوم وتضايق
يبقا من حقي اقلد صاحبي
لما لما لما
يبقا كلام الدكتور صحيح
وحقلد وميهمنيش
طالما اللي بقلده ده وبحاول اكتسبة
طالما اللي بقلده ده وبحاول اكتسبة
هو صفة كويسة تكمل النقص الجامد اللي عندي
ايه رأيكم
حتقلدوا ؟؟؟
--------------------------------
على الهامش
ادعولي علشان الامتحانات خلااااااص
10 comments:
ربنا يوفقك يا رب
موضوع التقليد ده بقى أنا معاك فيه طالما بتقلد حاجة كويسة ، بس أعتقد ان فى الحالة ده ما يبقاش اسمة تقليد ، ممكن نسميه اقتداء يعنى انت بتقتدى بحد انت شايفه كويس أو بتقتدى بصفة أو سلوك كويس
ما تنساش تبقى تدعيلى انت كمان علشان برده الامتحانات على الابواب
متفق معاكي جداً ان الموضوع ده مسموش تقليد
ولكن بصي كده لما واحد بييجي يلتزم مثلا
او يعمل حاجه كويسة زميلة بيعملها
شوفي بنقوله ايه
بنقوله انت مالك بتعمل زي فلان كده
مالك بتقلده ليه
فاهمة قصدي
وخلين نغير نقلد ونقول
نتشبه بالصفات الحسنه
وربنا يعينك في الامتحانات يارب
الطبيعى اننا نقلد و نتقلد
حتى و لو ماعترفناش بده
انت بتتعامل مع ناس اكيد حيحصل تاثير
لكن انك تبقي نسخه من حد لأ مش ده المطلوب خااااااااااالص
قلد بس خليك متفرد :)
اه نسيت
ربنا يفك حبسك أأقصدى امتحاناتك :)
بالتوفييييييق
جميل انك تقلد الاخرين فى الخير وتاخدهم قدوة ليك
لكن اللى بيحصل دلوقت ان التقليد بقى اعمى القلب والعنين .. خاصة التقليد فى شكل الملابس والموضه زى مثلا البنطلون الساقط والشبشب ابو اصبع
شد حيلك فى المذاكرة هانت كلها كام يوم ونخلص كلنا من هم الامتحانات
esmeralda
عندك حق الناس بتبهت على بعض كتير نتيجة للتعامل حتى تلاقي نفسك بقت طريقة كلامك شبه ناس بتتعاملي معاها كتير
لكن لو انتبهتي لده ممكن ميأثرش فيكي
وفعلا مهو لو بقيت نسخة من حد يبقا انا كده فقدت هويتي
وده اللي مش ممكن اعمله ابداً
وربنا يعيننا كلنا في الامتحانات يارب
شكراً على تشرفيك مدونتي بالزيارة والتعليق
على فكره مدونتك جامده جدا والموضع اللي قبل الاخير قتلني من الضحك
:)
--------------------------
شاب مصري
اه يا خويا والله موضوع الشبشب ابو صباع ده مجنني
ولاد وبنات
لا وفيه كمان موضوع برضه مستفز اوي
موضوع الجيبة القصيره والبنطلون اللي بيقلبوه بقدره قادر شورت مع انهم بنات محجبات
ربنا يعينك ويعننا في الامتحانات يارب
ياعم زحل ده مش اسمه تقليد اسمه تعديل للافضل ،وحتى لو تقليد المهم نكون بنقلد الايجابيات مش السلبيات
صديقي زحل باشا
ربنا يوفقك و تجيلك الامتحانات سهلة
افكارك دائما جديدة...النقطة هنا...لو احنا الصح اننا نقلد الحاجة الكويسة بيبقى نقتدي بشخص معين...بس لازم فيه شخصية لينا نرتكز عليها عشان نقيم الصح من الغلط و منضيعش اسلوبنا و فكرنا و نبقى مجموعة شخصيات في بعض
تحياتي
قلوب حائرة
اتفق معك في المسمي انه تعديل للأفضل
وان كنت سميتها تقليد علشان الواحد بيشوف حاجه فيعمل زيها
بس
تمام
------------------
الصديقة نقطة ميه
تمام مهو اكيد لازم يكون اللي بنقلده يعتبر جيد بالنسبة لشخصية نرتكز عليها كشخص الرسول على الصلاة والسلام
يعني فلان ده بيهتم بأصدقائه ويصل رحمه
فأخذ منه هذه الصفات اللي بجد انها ناقصة عندي او مش منتبه ليها
وده نوع من انواع تصيد الصحيح
عكس تصيد الاخطاء
Post a Comment