Wednesday, January 07, 2009

شكلك فاهم يا نصة



النهارده الصبح نازل من بيتنا وانا في المعدية لقيت 2 شباب ناشئين لابسين ترنجات النادي المصري
لقيت واحد فيهم بيقول للتاني العراق وامريكا
شدني الحوار وقررت اني ارمي الهلب واسمع بيقولوا ايه
وهم صوتهم عالي اصلا يعني

المهم لقيت الكبير فيهم بيقول للتاني امريكا حتخرج من العراق
رد عليه ياعم دي مضربتش العراق
قال الاول ازاي ياعم ضربت علشان البترول والخير اللي في العراق
قاله التاني اه
قال الاول ودلوقتي حيخرجوا لو بوش كمل كان حيخرج واوباما دلوقتي حيخرج من العراق
قاله التاني ليه
قاله علشان خلاص ماشاء الله خلصوا على كل حاجه واخدوا البترول وكمان عملوا فتنه وخلوا العراقيين يقتلوا بعض
زي معملت اسرائيل في فلسطين وخليتهم يقتلوا بعض

قال التاني وكمان رئيس فرنسا كان هنا امبارح
قاله الاول هو لسه اللي ماسك جاك شيراك قاله التاني لا ساركوزي
"لاحظوا ده حوار بين 2 ناشئين يعني اكبر واحد فيهم ميعديش 14 سنه "
المهم قال الاول ده جاك شيراك كان بيحب مصر اوي وتلاقي مبارك رايح فرنسا وواقف معاه كأنهم اخوات
واضاف الاول زمان كانت بورسعيد دي بيحاربها فرنسا
بس ده من زمان اوي
وكنا بنرد عليهم بالحلل علشان مكانش معانا اسلحة
زي فلسطين كده كنا بنضرب لا اصعب من فلسطين علشان فلسطين اكبر من بورسعيد
وكنا بنرد عليهم بالطاسات والحلل وكانوا يعملوا انزال بالبراشوط وكل واحد ينزل يلاقي حلة في وشه

انا مش حضيف
حديث بليغ بيقول ان فيه امل
شكلك فاهم يا نصة

13 comments:

Anonymous said...

الي يرمي ودنه فيما لا يعنيه يسمع مالا يرضيه. سيبك انت و الله بورفؤاد ومزربه الشباب وحشاني جدآ.

Shimaa Esmail said...

السيد الأستاذ صاحب مدونة / زحل الفلكي
اعتذر عن الخروج من موضوع التدوينة لقد أرسلت لك الجزء الثالث من الاستمارة (7صفحات)، أرجو منك إرسال رسالة توضح أن الجزء قد وصلك وأنه ليس هناك مشكلة في إرساله أحالت وصله لسيادتك .
تحياتي وتقديري
شيماء إسماعيل
باحث ماجستير- كلية الآداب جامعة القاهرة.

maha said...

سلام عليك يا زحل
ياااه بقالي كتير مجتش هنا
معدية :)
..
المهم
عايزة اقولك ان فعلا فيه ناس بتقكر و الجميل انك تلاقي اطفال او حتي كبار شوية و بيحاولوا يفهموا الدنيا حواليهم ماشية ازاي
يعني العادي انك كنت تسمع
"ايه اخر اغنية و اخر كليب ..ايه اجدد كلام ممكن نقوله .."
انما لما شباب او ممكن نقول اطفال يتكلموا و يحاولوا يفكروا بجد
الحمد لله
يا رب نفهم بس صح و منموتش في الجيل الجميل اامل اللي باقي
..
مم
شكل نصه فاهم فعلا
:)
سلام
مها

أحلى حياة said...

السلام عليكم ورحمة الله وبركاته

كان نفسي بجد اعلق عند حضرتك بس للاسف ماقدرتش لاني اصلا ماعرفتش اقرا البوست اساسا
:D:D
لون الكتابه مع لون الخلفيه عاملين قافله الاتنين مع بعض والنتيجه اني مش شايفه الكتابه عشان اقراها
:D
ياريت بس يبقى فيه حل للموضوع دا عشان اقرا واعلق باذن الله
:)

ولا تكونش المشكله دي عندي انا بس من جهازي
^o)
امممم اصل صحيح في ناس اهو قريت وعلقت كمان يبقى ازاييي امممممممم مش عارف بقى بصراحه بس نبقى نشوف بردو
:D

Ahmed EIssa said...

اللي حسيته من الكلام ان كل واحد فيهم سمع الكلام ده من حد ونقله للتاني

يعني يبقي في امل لو هم متابعين فعلا مش بتجيلهم الاخبار وحواديت التاريخ بالمعلقة ونظام اعرف حاجة من كل حاجة

مش عارف بس محستش بالامل قوي

Unknown said...

السلام عليكم
مدونتك بجد جميلة واسلوبك وتعليقك على مواقف الحياة المختلفة به فكر وراى
وفقك الله الى ما يحبه ويرضاه

Unknown said...

الامل موجود ولا يزال

واضعف الإيمان هو خروج الاحتلال فقط

البوست جميل والمدونة جميلة تسلم ايدك

Crazy Moly said...

حلوه اوى المدونه وجامده جدا يا زحل
وكويس ان الكلام ده والاشبال دول بورسعيد
تحيا بورسعيد حره مستقله

اكيد هتابع المدونه بتاعتك دينا بعد كده
سلااااااااام

-_- said...

كل سنة و انت طيب

Unknown said...

ههههههههههه

عملت زيي يا زحل انا تقريباً بركب المواصلات عشان أرمي ودني هههههههه .. أصلهم بصراحة بيقولوا درر فعلا وحاجات الواحد لا يتخيل إنها موجودة أساسا

أرمي ودنك ياعم ولا يهمك

:D

Entrümpelung wien said...

شكرا على المووووضوع

Räumung said...

شكرا ع المجهههود

Unknown said...

ناشئين :D :D :D
mostl7 2adym msm3tosh mn zaman :))))