ايه .. مين .. نعم !!.. بتكلم مين ؟؟
ايوه ياعم بكلمك انت
بكلمك يا ستي
بكلمكم يا شعب
بكلمكم يا ناس
قولوا رأيكم
امبارح الاقي مدون مصري في الامارات يغلق مدونته حزناً على التعديلات الدستورية
وواحد تاني اتكلم معاه يقولي
مفيش فايده
والتالت يقولي يعني انا اللي رأيي حيفرق
طب متروح تقول رأيك يا عم
قول رأيك بقا ياشيييييييخ
دعـــــــــــــــــــــــــــــــــوة
لكل المدونين.. كل من يرتاد هذا العالم المتفاعل
كل صاحب رأي
كل انسان حر
قول رأيك
يوم 26
يوم مشهود في تاريخ مصر
ومن وجهة نظري من المممكن ان يصبغ هذا اليوم بلون قاتم في التاريخ
لازم نروح ونقول رأينا
انا حقول رأيي
طب وانت؟؟..وانتي ؟؟؟
انتم؟
ياريت نعملها دعوة من النهارده
لحد يوم الاستفتاء
نشجع بعض
وننزل نقول رأينا
لو قولنا لأ ييقا قولناها وعملنا اللي علينا
لو قولنا آه يبقا برضه قولنا رأينا
بعيد عن وجهة نظري
ووجهة نظر اي حد
بس لازم نقول رأينا
بس نقول
وعلى الاقل نبقا عملنا حاجه
حتى لو ادام نفسنا
يارب الدعوة دي تلاقي الصدى اللي بحلم بيه
لأني مؤمن اوي اني حـــر
وعلشان كده حقول رأيي
وبكل طريقة
وبأعلى صوت
لأ
-------------------------------------------
على الهامش
واحد صاحبي بيقولي طب لو انا مش عايز اي حاجه من الاختيارات المتاحة
في اي انتخابات
قولتله روح بوظ صوتك
مع اختلافي التام مع هذا الاسلوب اللي اراه سلبي
لكن اهو يشارك
وبرضه يبقا قال رأيه
يارب تشاركوني في هذه الدعوة
ياااااااااااااااارب
--------------------------------------
تحديث
احمد عيسى حاطط في لحظاته
التعديلات الدستورية الاصل والمقترح
زوروها
بالنسبالي انا شايف ان التعديلات كويسة
ماعدا 4 مواد
وبسببهم
حقول رأيي بعد لما ادرسهم كويس
27 comments:
برافو عليك و الله
جميله جدا تلك الدعوة مع انى مش هاقدر اروح
كان نفسي اكون موجود و اشارك مع الاسف انا من المغتربين اياهم
حاسس بتانيب ضمير و زهق و قرف
كان نفسي اكون موجود و اقول لا بالفم المليان
اشكرك على دعوتك الجميله و احييك على حبك الجارف لمص و حفاظك على كرامتها و كرامتنا جميعا
زحل
أشكرك علي زيارتك الجميلة واهتمامك بما أكتب أيا كان رأيك فيه ولكن لي عتاب بسيط وعتاب فقط أتمني تقبله بصدر رحب الا وهو انك كان لازم تعرفني انك هتجيب سيرتي في مدونتك ومكنش يصح أعرف من ضيوفك .. عموما ده مجرد عتاب مش زعل .. عتاب ليه بقي لأنك للأسف فهمتني غلط ولو كنت سألتني كنت هاجاوبك لأني طبعا وبالتأكيد أؤيد دعوتك وبشدة للتصويت والبعد عن السلبية ولكن ما باليد حيلة للمغتربين أمثالي
في انتخابات الرئاسة الأخيرة لم يسمح لنا بالتصويت في السفارات رغم احتجاجات الكثير منا بحجة ان السفارات غير مجهزة .. ياخي أحة لموخزة لما بعدها بكم الاخوة العراقيين ينتخبوا واحنا لا .. عشان كده أصلا أنا شايف ان اخر انتخابات للرئاسة باطلة لحرمان شريحة كبيرة من المصريين اللي بيحبوا مصر وبيعتبروا مصدر دخل كمان للبلد يتمنعوا من الادلاء باصواتهم .. عشان كده مكنش قدامي للتعبير عن احتجاجي ومش زعل زي حضرتك كاتب وفيه فرق كبير بين الزعل والاحتجاج زي مانت عارف طبعا ولو حبيت تزور الاخت نوارة صاحبة مدونة جبهة التهييس الشعبية هتلاقيني سايب رأيي عندها بضرورة التصويت حتي لو كنا متأكيدين من التزوير
انا اسف طولت عليك بس حبيت اوضح وجهة نظري
أيمن قاسم
مصري مقيم بالامارات وممتنع عن التدوين حتي موعد الاستفتاء احتجاجا علي التعديلات المزمع عملها في الدستور
السلام عليكم
حنقول رأينا
إن شاء الله
دي فرصتنا الوحيدة
بس لا أخفي عليك
أنا معنديش أمل
سلاماتي
هنقول
ما احنا ياما بنقول
بس هنقول كتيييييييييييير
تفتكر صوتنا هيوصل وهيبقي في امل
الله يرحمك يا سعد الراجل قالها ومات
مفيش فايدة
شخبطة ملوكي
ارحب بك في مدونتي في اول زياراتك
ويكفي تضامنك
وممكن تبدأ تحمس عائلتك هنا في مصر علشان يشاركوا
ان تم حرمك من التصويت
وده شئ انا أأسف له بشدة
ولكن طالما ما باليد حيله
يبقا اضعف الايمان نحاول نقول للي نعرفه
اشكرك مره اخرى على انك نورت المدونة
قاسم افندي
اولا اهلا وسهلا ومراحب بيك في المدونة
منور بجد
عتابك على عيني وراسي وانا اسف اني ذكرتك بدون استئذان
وايضاً سعيد اني تفهمت وجهة نظرك
وعلى راسي من فوق تعاتبني لو شايف فيه تقصير وسأكون سعيد بهذا العتاب
احييك على روحك الوطنية جدا تلك
ويارب يفتحوا التصويت المره دي في السفارات
وبرضه طالما ما باليد حيله نحاول اننا نخلي المعارف في مصر
يروحوا يصوتوا
واسف مره اخرى لتفهمي سلوكك على انه سلبي
وبعد لما فهمت
عرفت انه قمة في الايجابيه
تحياتي
منور والله
مش قادره
حتى لو معندناش امل
يكفينا اننا ادام نفسنا
وادام ربنا
عملنا اللي علينا
وخلينا نبدأ نقول لأصحابنا وجيراننا
وننشر الدعوة دي في مدوناتنا
كل واحد بإسلوبة
كل واحد بطريقته
وكل واحد برأيه
المهم نشارك
ونقول رأينا
سواء بالرفض
او القبول
شكراً لزيارتك الكريمة لمدونتي المتواضعة
سمراء
بالرغم من الكلام اللي شامم فيه رائحة الاحباط
اللي احنا كلنا مصابين بها
بس كويس لمحة التفاؤل
وحنقول
وحشتينا ووحشنا كلامك والله
زحل
الله ينور
إنشاء الله حنروح، و إنشاء الله ربنا مش حيخزلنا، المهم الواحد يعمل اللى عليه، " إن الله لا يغير ما بقوم حتى يغيروا ما بأنفسهم". مش مهم ننجح المهم نحاول و نبئى يد واحده.
حتى وان لم يصل صوتى
فلن اسمح لنفسي ان اجلس في بيتى
و تكون حجتى ان صوتى لن يصل
فما على هو الادلاء بالرأى
ومن ثم يصل او لا يصل
فتلك مرحله متقدمه
ولنعتبرها حتى تدريب لنفوسنا على كيفيه لاختيار والادلاء بالرأي
تحياتى
سونيا
اهلا بيكي في مدونتي للمره الاولى
وفعلا ان الله لا يغير ما بقوم حتى يغيروا ما بأنفسهم
يارب نتغير
جوسي
احييكي على حماسك
وشكراً على شعورك الطيب
ويارب الحماس ده ينتقل لجميع اصحابك
لازم طبعا نروح و نقول لأ علشان كده انا رافض بعض اصوات المعارضة اللي بتدعو لمقاطعة الاستفتاء لأن على كده اللي هيروحوا الناس اللي هتقول نعم لان محدش راح وقال لا و ديه حاجة متسقطش الاستفتاء لكن لازم نرفض و نروح و نكون ايجابيين
احييك يا شريف على روحك الايجابية
ويارب كلنا نبدأ نجمع اصدقائنا واخوانا واحبابنا علشان نشارك في الاستفتاء
ونقول رأينا
Hello!
Very good. Thank you
have good day
david
thank u
انا محتارة جدا في الموضوع ده عايزة اروح و مش عارفة خايفة اروح انا عارفة ان ده عجز بس مش عارفة
قبل مانروح نقول راينا في تعديلات الدستور مش لازم نعرف الاول ايه مواد الدستور اللي اتعدلت ولو فيه سلبيات او ايجابيات للتعديل ده؟
ياريت فعلا اللي يروح يروح يقول رايه وهو فاهم وعارف هو بيعمل ايه مش يروح يعارض لمجرد المعارضة..
وانا معاك يا كتاتني دعوة جميلة قوي عشان نرمي السلبية في البحر..بس نقول راينا صح..ولا ايه
ربنا ميحير مؤمن يا توته توته
بكل بساطه روحي وقولي رأيك
بدل مييجي حد تاني يقول مكانك
وحتبقي روحتي من غير متروحي
-------------------------------
كلام سليم يا عيسى
بس ساعات فيه كام ماده يبقوا يخلوا الناس كلها توافق
وممكن ماده واحده تخلي الناس كلها ترفض
فاهم قصدي
ومن هنا لحد يوم الاثنين ممكن كل واحد يعرف ايه التعديلات المطلوبة
ويروح يقول رأيه
انا منزل التعديلات الدستورية المقترحة عندي في بوست..تعالي ياكتاتني بقي
يا ريت الناس تبقى ايجابية مرة واحدة في حياتها
كلامك مظبوط
على الاقل لما تقول لا
وهما لعبوا فى الاصوات يتحملوا وزرها يوم القيامة
ربنا يصلح الحال ليكى يامصر
تحياتى
احمد عيسى
جايلك في السرييييييع يا باشا
ياسلام
ده انت جيبت المفيد
---------------------
Sharm
منور يا باشا واهنيك على هذه الروح الايجابية
تامر
انت كده جيبت المفيد
هو ده اللي انا عايز اقوله
بالظبط
احييك ويارب كل واحد فينا يبدأ يقول للناس
علشان يروحوا يصوتوا
السلام عليكم
أولا انا أسف انى هخرج عن الموضوع لان
ووأحب أدعوك الى ان تنضم معنا الى رابطة عملناها للعزاب
أنا عارف ان الوقت مش مناسب
والرابطة دى عملنا لها مدونة تسمى
( عاوز اتجوز )
ونأمل ان تشارك معنا بمواضيعك
وحاول مشكورا ان تنشرها بين اصدقاءك والفكرة هتعجبك ان شاء الله
وجزاكم الله خيرا
أنا زرت مصر و عرفت مصر
و حبيتها من كل قلبي
و لأول مرة أحس بأني واحد من الشعب
لو تروح مدونتي كنت أتكلم عن موضوع الفساد في مصر قبل قضية تعديل الدستور
يا سيدي هو مين عارف حيحصل ايه و الله شيء يوجع القلب فعلا
كل القهر و الظلم و الفقر و النصب و التخلف و بعد ذلك تعديل دستوري أسود
هو ذنب مصر إيه و شعبها علشان يعيشوا المعاناة عشر مرات؟؟؟
يا ابني قلتلك مش في فايدة
اللي راحوا زي اللي مش راحوا
دة حتي احمد جاي اوف صن قالهالك
احنا ذنبنا ايه
وبعيدن تعالي هنا
ابطحك باي حاجة دلوقتي دستور ايه اللي انت موتفق علي تعديلاتهيا ابني دة من غير ما يدرس مرفوض مرفوض يا ولدي
Post a Comment